De suite de trieues lxviii.

D e suite de trieues enfraintes doit l en sauoir que ele ne poet estre fete se les trieues ne furent donnees auant en cort qui doie porter recort.

⸿ Et si doit l en sauoir que trieues si comme l en les prent en laie cort est asseurement qui est fet par la foi du cors que celui qui la donne ne fera mal ne par lui ne par autre a celui a qui il la donnee.

⸿ Se aucun se plaint apres cel asseurement qui est fet. il se doit plaindre en ceste forme. Je me plaing de Richart qui puis les trieues que il mauoit donnees en cort massailli en felonnie en la pes deu et le duc et me fist cest sanc et ceste plaie que ie mostre que ie sui prest de fere li connoistre en une hore de ior. S e l autre le noie mot a mot. et offre a defendre les gages doiuent estre receus si comme nos auon dit.

⸿ L en doit sauoir que en ceste forme de suite de roberie et de trieues enfraintes se l en fet par d enqueste du pais que harou ne fu pas crie. celui qui suit encharra de la suite. et autresi que s il ne poet estre recorde que les trieues fussent donnees ce lui qui suit encharra de la suite.