Brouillon, papier, 14x11 cm., Arch. dép. Orne, 4E 262/ 6, n°8

L'an mil CCC LXXI ou jour de semadi apres les octaves de la consecration notre seigneur, present Pierrot Hemmart notre metairie de Malaifre o toutes les appartenances excepté les boys et la telliere et ara ledit metaier XII porz frans en la posson, et pourra tenir ledit metaier porz et voleterez tant comme il li plaira et bestez chevaline ovec ce non pas qui appartiennent a autre que lui. Et ara les estrans de la de la deme de Columbiers sauf une laciee qui demourra au metaier doudit lieu. Et o tout ce print ledit Pierrot tel droit comme nous avon en la d'Arssonney de la Leyre et de la Boyterie. Et ce prendra les usaiges de la forest comme de droit est. Et puet aler ledit metaier recevoir son sauveur ou il li plaira, et li feron garder tielx privileges comme il doibt jouir selon le contenu des notres comme de droit est. Et esplaitera les patiz de devant ladite metairie comme faisoit dan Simon par lou il les esplaita et les prez de la Leyre. Et pour raison des dites chose doit et est tenu fere XV lb. de rente es festes qui s'ensuivent, c'est assavoir a la saint Remi C s., a Noel totedem, a la saint Jehan totedem hospitalité pour l'abbé, pour le celerier et pour les autres moignes quant il li cherra, et pour les charretiers de l'abbaie quant mestier sera, auxquelx il doibt trouver foin, avaine, chandelle, lingne pour table et pour liz, et telx biens comme il ara en son hostel. Et pour l'abbé et les moignez, vin et pitance et competente selon leur estat

Et pourra tenir ledit Pierrot deux beux en engres qui seront touz soenz par chacun an toutes foiz qu'il li plaira. Et prendra ledit Pierrot toiches les blez et herbez qui appartiennent a ladite metarie. Et sera son premier paiement a la saint Remi prochaine a venir, et par les termes ensuivant, si comme il est dit. Et sera tenu fere ledit metaier les reparations de toutes les mesons de ladite metairie et des plessez et des haies qui sont et est esté environ les lieulx et appartenancez de ladite metarie. Et doibt garder noz bois a ses propres coux et despens. Et ara la moitié des amendes qui sur ce cherront et touz les fruict des boys. Et nous rendra ledit metaier une charretee de foin a Alencon .

et tendra ladite baill. un an apres le déces, s'oblige Jehanne sa femme.

Registre du tabellionage ancien d’Alençon, Arch. dép. Orne, 4E 262/ 2, f°56 v° :

le XIIIIe jour

Pierrot Hemmart et Jehanne sa femme, autorisee souzmettant etc., confessent avoir prins a la vie dudit Pierrot et I an apres son deces de religieux hommes et honestes, l'abbé et le couvent de Notre Dame de Persaigne, la metairie de Mallaiffre o toutes ses appartenances, sauf et excepté les boys et la tieullerie ainsi que ledit metaier ara XII porz frans en pesson et pourra tenir en ladite metairie, pourz, voleterez, et bestes chevalines pour luy tant comme il leur plera, sanz y avoir aucun parconnier. Et avoir touz les estrans de la diesme de Columbiers, sauf une lacee etc. Et tel droit comme lesdiz religieux avoir en la diesme d'Arssonnay, de la Leire, et de la Boytiere. Et prendra les usages de la forest telx comme il est de droit et de raison. Et pourront aler recevoir leur sauveur ou il leur plera Et li feront garder les preveleges d'eulx telx comme les ont de leur droit. Et exploiteront les pastiz devant ladite metairie et les prez de la Leire par ou dam feu Simon les faisoit explecter. Et pourra tenir II beufs et engrosser chacun an pour eulx sans ce que les diz religieux y pringent riens. Et pour les chose dessus dites, lesdiz preneurs feront XV l. de rente chacun an a la saint Remy, a Noel, et a la Chandeleur par egalx porcions, la vie dudit Pierrot durant et I an apres son deces. Et commencera le premier paiement a la saint Remy. Et seront tenuz recevoir en l'oustel de la metairie l'abbé, le celerier et les autres moignes, bien et deument, quant il y vouldra aler et querir vin et pitance compectente selon leur estat. Et pour les charetiers, quant mestier sera, selon leur estat. Et prendront les blez et herbes qui appartiennent a ladite metairie. Et feront les reparations des mesons, des plesses, des hayes etc. Et garderont les boys et aront la moitié des amendes et aront touz les fruiz des boys et leur rendra une charretee de foin a Alencon etc. et jura etc.

Brouillon, papier, 21,5x29,5 cm. Arch. dép. Orne, 4E 262/ 6, n°7 r° :

S'est la baillee que la fame feu Jehan saignour a baillé a ses enfans par… commande s'est a dire touz le heritagez quy li peust appartenir tant devers fait son saigneur comme de son propre, tant en terres comme en rentez, en deniers, et ne peut james chause quy set ne vendre ne gagez et li prometez ses enfans a fere chascun VIII ll. de rente, IIII ll. a Nouel et IIII l. a la saint Jehan.

Ce sont les loz quy ont eté fez des herytages

La haraingere et les appartenances et la place feu Bernart et si comme el se porsiet, o le chant Boisel et II journiex de terre quy fait sus la meson Jelien Renaust, X s. que Guylois de Roules fet et une geline, X s. que Paparlon fet et une geligne, et la lettre de Jehan Serry si comme el s'est pour I lot et devra le lot de la metairie de Biauvaies aidez doubleys des cous des frans fuez ainsi que il reprendra le tiers dou dedommagement que lequel lot fera

La metairie de Biauvaies o les appartenanses, le molin de Bleves et les appartenances, le perrin feu Colin d’Alenson o les appartenances, L s. que Jehan Rogier fet, XXX s. que le lot de Bleve fet a… pour Michel

Quocheriere et les appartenances, la meson de Bleve et les terrez et les prez d'entour et d'environ et amendes sest lot XXX s. a la metayrie de Biauvaies comme que seluy lot a choisy monseigneur Michel, saignour por Robert, son neveu, et prent a dedomagez les autrez enfans des domagez que il li pourrasse jamais a quausse de seluy chois et se… et prend par sest lot madame III journiex de terre et I arpent de pré sa vie durant et redouca a sest lot

Registre du tabellionage d’Alençon, Arch. dép. Orne, 4E 262/ 2, f°39 r° :

le IIIIe jour

Jehan Guillemotet, Michel Guillemotet et messire Michel Guillemotet pour Robert Guillemotet, leur frere, confessent avoir parti par entre eulx certains heritages ci apres nomez et devisez ainssi que ledit Jehan ara la harangiere et la place feu Bernart si comme elle se pourssiet et les champs Boissel et II journex de terre sur la meson Julien Regnaut et X s. une geline de rente que fait Guilloys de Roulees et X s. une geline que Paparlon fait et ara la lettre de Serry o le droit qui y appartient et ledit Michel ara la metairie de Beauvoir et le moulin de Bleve o leur appartenance et L s. de rente que fait Jehan Roger et XXX s. de rente sur le partaige dudit Robert Et paiera le tiers de la finance des frans fieux et prendra le tiers de ce que Caillet en paiera Et ledit Robert ara la cocherrere et la meson de Bleve et les terres et prez d'entour et d'environ ainssi que la mere desdiz freres en tendra sa vie durant III journex de terre et I arpent de pré et sa demeure en ladite meson et fera lesdiz XXX s. de rente audit Michel chacun an.

Le IIIIe jour de mars l'an LXX

Perrote deguerpie feu Jehan Guillemotet, souzmettant etc., baille a Jehan, Michel et Robert ses fuilz, a la vie de le durant, touz les heritaiges et choses heritaux que elle a tant de son propre, de acquerement, comme a cause de son douaire, tant terres, rentes etc., sanz rien retenir sauf III journex de terre, I arpent de pré que elle tendra sa vie durant et sa demeure en la meson de Bleve ~ Et fut fait cest bail pour XXIIII l. de rente a paier a ladite Pierrote sa vie durant chacun an a la saint Remy et a la Chandeleur par moitié de chacun desdiz enffans VIII l. pour sa portion et jura etc.

Lesdiz Jehan et Michel, chacun pour sa portion, et messire Michel Guillemotet, prestre, leur oncle, pour ledit Robert, s'obligent faire et paier ladite rente a cause dudit bail a la vie de ladite Pierrote durant Et vouldrent que se il estoit deffaillant de paier ladite rente, que elle puisse prendre la saisine de telx heritaiges comme il li doit appartenir.

Brouillon, papier, 21,5x29,5 cm. Arch. dép. Orne, 4E 262/ 6, n°7 :

Le XVIIe jour Raoul de Saint-André, escuier, et demoiselle Jehanne sa femme, fille de feu Raoul Frocart, autorisée etc. souzmettant etc. vendent heritalement a Jehan de Saint-Cler, bourgeois d'Alencon, et Jehanne sa femme etc. une metairie qui est dite la Berssonnerie, en la paroisse de Saint-Paterne o toutes les appartenances a savoir etc. en la maniere que elle fut baillee anciennement en fieu a feu Lucas Somice et Guillaume Bersson, et leurs fames etc. pour IIIIxx VIII . frans quittes etc. en faisant les rentes qui ensuivent c'est a savoir a monseigneur de Harecourt uns gans de cerf et en faisant telles rentes comme lesdiz heritages sont tenuz fere a monseigneur Jehan de Garencieres, et XVI d. a l'iglise de ladite paroisse, et II s. a l'ospital de Gué-Liant, et II s. pour le fieu au Bougis se deuz sont, et XL s. aus hoirs feu Jehan Dreux se deuz en sont pour toutes rentes et en faisant et en faisant telx esclusaiges comme les heritages sont tenuz fere au moulin d'Osé et paiez presentement etc. et veuldr.

elle est en registre.

Registre du tabellionage ancien d’Alençon, Arch. dép. Orne, 4E 262/ 2, f°

Raoul de Saint-André, escuier, et demoiselle Jehanne, fille de feu Raoul Fretart, sa femme, autorisee etc., souzmettant etc. vendent heritalement a Jehan de Saint-Cler, bourgeois d'Alencon, et a Jehanne sa femme etc. une metairie qui est dite la Berssonerie, o toutes ses appartenances, assise en la paroisse Saint-Paterne, en la maniere et estat que elle fut ja pieca baillee a feu Lucas Sa… et Guillaume Bersson et leurs fames ~ Et fut faite ceste vention pour IIIIxx VIII frans quites, paiez presentement dont etc. Et pour en fere uns gans de cerf de rente au conte de Harecourt, et telles rentes comme lesdiz heritages sont tenuz fere a messire Jehan de Garennes, chevalier, XVI d. de rente a l'iglise de ladite paroisse, et II s. a l'ospital de Gué-Liant, et II s. pour le fieu au Bougis se deuz en sont, et XL s. aus hoirs messire Jehan Dreux, se deuz en sont ~ Et telx esclusaiges comme lesdiz heritaiges sont tenuz fere au moulin d'Osé, pour toutes autres rentes, servises et devoirs quiexconquez etc. Et jurerent etc. Et veuldrent que la meilleur lettre que l'en pourra en soit fete etc. Renoncent etc.

Brouillon, papier, registre du tabellionage de Trun, Arch. dép. Orne, 4E 142/ 2, f°59 r° :

L'an mil IIIIc XLV le premier jour d'apvril apres Pasques fut present Robin Troterel et Marguerite sa femme, a cause d'elle, autorisee etc. lesquielx vendirent a heritage perpetuel a Estienne …clerc, bourgeois de Trun, c'est assavoir XX s. t. de rente lesquielx ilz disoient prendre sur Leputaiz de la paroisse des Vinas a la cause contenue es lettres sur ce faites lesquelles ilz baillerent presentement audit achateur pour y annexer ces presentes Et fut la vente faite par le prix de X l. et X s. pour vin dont lesdits maries se tindrent comptents et loyaulement payes etc. Et promettent garantir, acomplir et fournir et les fere par par leurs mains par deffaut de… etc. Et obligerent biens et heritages etc. Jacquet Thebout et Perrin Morliez.

Registre du tabellionage de Trun, Arch. dép. Orne, 4E 142/ 1, f°

Le premier jour d'apvril

Furent presens Robin Troterel et Marguerite sa femme a cause d'elle auctorisee lesquielx vendirent a heritage perpetuel a Estienne Leclerc bourgeois de Trun c'est assavoir vingt soulz tournois de rente lesquielx ilz disoient prendre sur Colin Leputaiz, de la paroisse de Vignaz, ces hoirs ou ayans cause, a la cause contenue es lettres sur ce faictes lesquelles ilz baillerent presentement audit achateur pour y annexer ces presentes Et fut la vente faicte par le prix de dix livres tournois et dix soulz pour vin dont lesdiz mariez se tindrent comptens et loyalment poiez Et promistrent garantir, amplir, fournir et les fere par leurs mains par deffaut de paiement Et obligerent biens et heritages presens Jacquet Thyboult et Perrin Morlier.

Brouillon, papier, registre journal du tabellionage d’Alençon, Arch. dép. Orne, 4E 70/ 7bis, f°35v° :

Le XXVIe jour de decembre mil Vc et II.

Marion, veusve de deffunt Macé Blanchet, et Jehan Blanchet, son filz, ont congneure au rescour Colin Chevalier et Jehanne sa femme, de la vendition par eulx faite audit deffunct de la somme de cinq solz tournois de rente que lesdits Chevalier et sadite femme avoient droit d'avoir et prendre sur ladite veusve et hoirs dudit deffunt, jouxte les lettres de la vendition de ladite rente que ledit Chevalier en disoit porter ledit rescour fait… de ladite grace et condition de rescour Et desdits Chevalier et sadite femme, icelle veusve et sondit fils confesserent avoir receu la somme de cinquante solz tournois en principal, vin et facon de lettres Et au regard des XIIIes de ladite vendition, lesdits Chevalier et sadite femme demeurent en acquitter ladite veusve et hoirs par tant que aucune chose n'en avoit esté payé Et en signe de ce rendirent ausdits Chevalier les lettres de ladite vendition comme nulles Et garantir… Symon Galleron et Jehan Hucquet tesmoins.

Registre du tabellionage d’Alençon, Arch. dép. Orne, 4E 70/ 7, f°167v° :

Le XXVIme jour de decembre oudit an cinq cens deux.

Marion, veusve de deffunct Macé Blanchet, et Jehan Blanchet, filz dudit deffunct et de ladite veusve, confesserent que ce jourd'ui Collin Chevalier et Jehanne sa femme avoient rescour et remis en leurs mains la somme de cinq solz tournois de rente que lesdits mariez avoient autreffoiz venduz aux deffunct Macé Blanchet, jouxte le contract que en est de ce porter Et desdits mariez confesserent lesdits veusve et sondit filz avoir eu et receu le principal dudit contract, vin, facon de lettres dont etc. et en quittent etc. sauf des XIIImes dont lesdits mariez en actterent lesdits veusve et sondit filz Et en signe de ce, lesdits veusve et sondit fils et rendirent presentement ausdits mariez les lettres qu'ilz en portoient pour eulx en aisder etc. et pour toute garantie sauf etc. Et a ce obligerent biens et heritages etc. presens a ce Jehan Hucquet, Symon Galleron et Macé Esnoul tesmoings.