De justicier. iv.

J ustiscer est apele de iustise por ce que il a poeir de iustisier les autres. si deuon saueir que les uns des iustisciers sunt plus bas et les autres plus haut.

⸿ Les plus haut sunt cels que le duc a establi a garder sa terre que nul n est par desus fors le duc el pays qui lor est baillie a garder si comme sunt les mestres de l eschequier et les baillis.

⸿ De cels les uns sunt gregnors des autres.

⸿ Les gregnors sunt apeles cels qui ont la gregnor poeste si comme les mestres de l eschequier qui ont poeir d amender les tors que les baillis font. ⸿ Les baillis sunt apeles les menors iustisiers por ce il ont menor poeir. quer il nont pas poeir de fere iustise hors de lor baillies qui lors sont commises.

⸿ Les plus bas iustisiers sunt cels toz qui sunt pardesous les baillis.

⸿ Et si est iustisier apele le baillif d un pays qui est establi de par le prince ou par le duc. et a poeir de iustisier et de fere droit au poeple qui est soumis a lui. quer il est establi por garder la pes. por terminer les quereles. por destruire les larrons. les homicides. les ardeors. et les autres malfetors. et si est mis pardesus les autres por garder les droitures au duc. et por rapeler les par droit se il troeue que aucune chose en ait este estrangie.

⸿ Il sunt tenus a garder les lois et les costumes du pays leaument et rendre droit selon celes au people qui lor est soumis. ⸿ Toutes ces choses que nos auon dites doiuent touz les baillis iurer quant il sunt mis en baillie. que il lesgarderont feelment. et autresi doiuent fere touz les menors iustisiers. qui sunt desouz cels qui sunt establis a iustisier le pays.

⸿ Au iustisier doiuent estre les plaintes aportees et il les doiuent receuoir et prendre ple ges d une part et d autre. et asseoir as parties ior de pledier en et tenir en la cort et fere garder ce qui sera iugie.

⸿ Il doit fere iustisier les defaillans. et si doit retrere et recorder les choses de quoi iugement doit estre fet ou recort en cort. et si doit fere donner trieues seles sunt demandees pardeuant lui. cest asseurement de garder pes.

⸿ Il doit fere deliurer les nans qui sunt pris atort. et fere oster force. et de ce treteron nos apres plus plenierement en lieu et en tens.

⸿ Les sous iustisiers sunt cels qui sunt establis sous les iustisiers a fere les offices de droit. par quoi les uns sunt apeles uiscontes. les autres serians de l espee. les autres bedaux. des quex les offices sunt diuers selon ce que droit et la pes du pays le requiert