De deliurer nans

P or ce que les nans doiuent estre deliurez par la iustise et que la deliurance en apartient a la iustise nos treteron apres de la deliurance de nans.

⸿ L en doit saueir que se aucun tient les nans a ses hommes et il ne les uelt deliurer. il doiuent estre deliure par le duc ou par son iustisier en ceste forme.

⸿ Le seriant doit uenir au segnor qui tient les nans son homme. et li doit commander de par le duc que il recroie les nans par pleges.

⸿ Et se le segnor ne le uelt fere. le seriant doit prendre les pleges et metre les nans hors de tout en tout et assigner ior a l un et a lautre as premieres assises ou as premiers plez. se le segnor ne mostre aucune reson par quoi il ne doit pas relaschier les nans. de quoi il est prest de sostenir iugement. et lors doit le seriant prendre de lui pleges de sostenir iugement. et li doit asseoir ior si com il est dit deuant.

⸿ Se le segnor uelt deliurer les nams prenge pleges et les recroie. Se aucun plaintif dit que aucun a pris ses nans en autri fieu ou il ne poueit pas ne ne deuoit prendre por ce que le fieu n est pas tenu de lui. et celui qui les prist noie ce. et dist que il les prist la ou il poueit et deuoit. le seriant doit prendre pleges de celui qui se plaint et deliurer les nans et asseer ior de pledier a l un et a lautre

⸿ Quant il seront uenus a cort et le plaintif aura fet sa plainte et l autre aura noie. et dit que il prist nans la ou il poueit et deueit se il n ofre a deresnier ce que il dit il l amendera. et se il l ofre a deresnier ueue doit estre assise du lieu ou l autre dit que il ne poueit ne ne deuoit prendre ses nans.

⸿ Et si doit l en saueir que se cil qui se plaint n a tesmoing il encharra de la querele.

⸿ a la ueue doit celui qui se plaint mostrer le lieu ou il dit que les nans furent pris.

⸿ Et quant la ueue sera fete et les parties seront uenues a cort. se celui de qui la plainte est fete respont que il prist les nans el lieu qui li a este mostre et que il les poeit et deuoit prendre comme en son fieu et l autre noie que la terre n est pas soue et que il nia nule segnorie et que ele n est pas tenue de lui et que il en a la sesine. ia soit ce que l autre reconnoisse que il prist les nans en la terre que le plaintif tient et gaaigne et enqueut les bles ou par soi ou par autre. il remaindra en sesine et l autre en amende qui les nans pris a tort se il noffre aprouer saisine ou son droit par brief de nouele dessesine ou par loi appareissant.

⸿ Et se il noie que il ne prist pas les nans el lieu qui li a este mo stre et l ofre a deresnier la deresne doit estre tenue.

⸿ Et se il la fet. les nans soient rendus de quoi il aura pleges ains que il les recroie que pleuiront celui qui les nans sunt destre a droit. ne il ne li conuendra pas mostrer la ou il les prist des ce que son auersaire est enchaiet dela querele de quoi il l acusoit.

⸿ Auant l en prist des ce que son auersaire est enchaiet dela querele de quoi il l acusoit.

⸿ Auant l en doit saueir que le seriant qui uient les nans deliurer aura xi deniers por sa liureison.

⸿ Se uns hons tient plusors nans d aucun ou il sunt en plusors lieus il doiuent touz estre deliurez par une liureison des ce que il ne les requiert forz i

⸿ Dun plet qui est entre ii persones n aura le seriant que une liureison por les nans deliurer.

⸿ Tant comme il iaura de plaintis ou de plaintes ou de cels de qui l en se plaint. tant aura le seriant de liureisons.

⸿ L en doit saueir que se aucun prent nans en son fieu. il les doit tenir en tel lieu que cels qui il sunt i puissent auenir soufisamment por donner lor a mengier une fois le ior. et que il s en repuissent aler au leu ou les nans furent pris.

⸿ Ceus qui tienent nans ne doiuent pas estre quis en lieus estranges ne tenir i les nans que il ont pris.

⸿ Et se le seriant treoue celui qui tient les nans es leux deuantdiz ou en plus prouchainz ou son atorne ou son preuost ou son seneschal il doit deliurer les nans si comme nos auon dit. et se il ne treoue ne lui ne les nans il doit forment iustisier par lui ou par autre le tenant iusqu atant que les nans soient deliurez.

⸿ Et se il ne treoue nul qui soit de par lui. le seriant doit uenir a celui qui maint en la meson ou les nans sunt tenus et deliurer les si comme nos auon dit. et prendre pleges de celui qui il sunt que il seroit a droit.

⸿ L en doit saueir que cels qui tienent nans ne lor doiuent pas donner a mengier. mes il se doiuent porueer de metre les en leu conuenable que il nenpirent por la reson du leu ou il seront ne por la uilaine maniere de tenir les.

⸿ Se ceus qui tienent nans neent que il ne les ont pas ne ne tienent le seriant doit prendre pleges de sostenir en d enqueste. et les doit aiorner as ples ou as assises.

⸿ Et se aucun est conuencu par d enqueste que il les prist il les doit rendre et doit estre en grant peine de ce que il les noia. quer ia soit ce que l en ne die pas ce soit larrecin nequeden il semble que il ait sauor de larrecin. et se d enqueste dit que il ne prist pas les nans cels qui se plaignent doiuent estre condempnez par grande amende por la fausse clamor.

⸿ Et se d enqueste le met en non sauoir celui qui se plaint poet suirre ses nans comme chose emblee se il ne les treoue. mes se il les treoue il les poet demander comme chose adiree et les poet prouuer a soues par le tesmoig du uisne.

⸿ Aucuns tienent de lor segnors nu a nu. et aucuns ont maien entre els et lor segnors. et le segnor poet par tote sa terre et par cele qui est tenue de lui prendre por sa droiture les nans a cels qui la tienent. et quant il les aura replegies il seront tenus a obeir a droit en sa cort. et celui qui tient nu a nu de lui et cels qui ont autre segnor par desouz lui.

⸿ Nul ne poet prendre ne tenir les nans a cels qui ne tienent de son fieu ne ne sunt soumis de riens a lui. se deu vesine il ne les troeue a present forfet en son fieu si comme adamagier ses prez ou ses herbages ou ses bles ou ses autres fruis ou se il n en portent sa costume ou son panage ou son tholneu ou autres choses semblables qui doient amende si comme le tens le requiert a la fiee ou les costumes des uiles et des marchies et des foires et des passages.