De terres qui sunt en defens. ⸿ viii

T erres sunt en un tens en defens et en autre sunt communes.

⸿ Totes terres cotiuees sunt en defens de quoi bestes poent legierement tolir les fruis.

⸿ Terres uoides sunt en defens de la mie mars iusques a la Sainte Crois en setembre. en autre tens eles sunt communes se eles ne sunt closes ou defendues d anciennete si comme haies et tex choses.

⸿ Le tens en quoi les terres sunt communes est apele uulgaument tens de banon. En quoi les bestes poent aler communement par les chans sans pastor.

⸿ Aucunes bestes sunt qui n ont point de banon. ains doiuent en tous tens estre gardees et les damages que eles font doiuent estre restores si comme chieures qui brostent les borions des arbres et des uignes et porceaus qui foillent les pres et les bles semes et totes bestes fraitieres et malfesans qui tous iors doiuent estre gardees et les damages que eles font doiuent estre restores.

⸿ Nul ne poet defendre sa terre en tens de banon se ele n est close. esceptes les defens des bois qui par us et par costumes sunt tous iors en defens. banon doit estre oste de terres de quoi le ble est appareissant qui porroit estre empeirie par les auoirs si que il n en i doit point auoir.

⸿