De la dignete au duc. xi.

L e duc de Normendie ou le prince est celui qui tient la segnorie de toute la duchee de quo i le roi de france a ore la dignite o les autres honors que dex li a donnees. et par cen apartient il a lui agarder la pais du pais. et a gouuerner le poeple par la uerge de iustise. et a finer touz les contens par loiaute et por cen doit fere querre par ses baillis et metre en prison les robeors les larrons L e duc doit auoir l aliance ou la loi les ardeors les homicides. cels qui desflorent les uirges et les rauisseors des femmes. et les mehaigneors. et les autres malfetors. et cels qui sunt de maluese renommee que il aient lor soudees. si que le poeple que il a a gouuerner puisse estre en pes.

De aliance. xii.

L e duc doit auoir l aliance ou la loi aute de touz ses hommes de toute sa contree. par quoi il sunt tenus adonner li conseil et aide de lor propres cors contre touz hommes meesmement et garder soi de nuire li en toutes choses et de sostenir en nule chose la partie a cels qui sunt contre lui. et le duc est tenu a gouuerner les et a garantir. et adefendre les. et si doit ses hommes mener par les lois et par les drois du pais.

Del resseant au duc. xiii.

T ouz cels qui sunt resseans au duc en la duchee de Normendie doiuent faire feelte au duc et garder le. et por ce sunt il tenus a consellier le en toutes choses sique il ne li porchaceront damage ne ne dorront conseil ne aide a cels qui sunt ses anemis apertement. et cels qui de cen sunt trouez copables sunt apele traitre au prince. et toutes lor possessions doiuent remaindre au prince a touz iors se il en sunt conuencu ou dampne.

⸿ Touz cels qui sunt en Normendie sunt tenus agarder feelte au prince. et por ce nul ne doit receuoir hommage ne feelte d autre. fors sauue la feelte au duc. et doit l en dire quant l en rechoit hommage et feelte entre les autres segnors et lors doit estre foi gardee en tel maniere que l un ne fera force a l autre ne ne metra main sus lui.

⸿ Et se aucun d els est de ce accuse en cort et uencu il est tenu aperdre le fieu de quoi il deuoit porter foi a son segnor.

⸿ Et se cest meffet est troue el segnor que il ait mis main sus son homme. lommage sera a celui qui est pardesus. etlomme sus qui le segnor a mis main ne paiera puis de son fieu rente fors cele qui est deue au chief segnor.

⸿ Et se cest meffet est troue en l omme. il perdra la terre et toute la droiture que il ia et ele remaindra au segnor. et ce doit estre entendu sainement se il en est conuencus as us et as costumes de Normendie

De monneage. xiiii.

L e mon neage est une aide de deniers qui doit estre paiee au duc de Normendie de tiers an en tiers an. que il ne face changier la monnoie qui cort par Normendie.

⸿ Et si doit l en sauoir que il ia ii ans quites. et au tiers doiuent paier generalment le mon neage touz cels qui ont moeble et qui sunt resseant es terres es queles le dit mon neage sout estre rendu.

⸿ De ce sunt qui tes toutes gens de religion et touz les clers qui sunt en saintes ordres. si comme soudiacre diacre prestre et les serians fieufes des yglises et touz cels qui ont benefice en yglise et toz

les cheualiers et les enfans que il ont de lor propres femmes et les ueoues femmes qui sunt sanz sousteneor qui nont uaillant  xx souz de moeble hors lor robes et lor oustix de lor meson. doiuent remaindre quites de monneage.

⸿ Plusors sunt quites de ceste aide par la franchise de lour mesons ou des leux ou il sunt. les autres par franchise que lor a donnee le prince. et que il ont eue d anciennete. les autres par le don au duc de Normendie qui est conferme par chartres.

⸿ Et se il est certai ne chose que il aient eu par lonc tens chartre de ceste quitance et il laient perdue par aucune mescheance ou ele est bruisie il ne doiuent pas por ce perdre lor franchise.

⸿ Touz cels qui ont en lor membre de hauberc preuost ou monnier ou for nier por ce que il aient four ou moulin a ban. il sunt quites de mon neages. Et chascun baron a en sa baronnie vii serians qui en sunt quites.

⸿ Toutes femmes mariees ensunt quites quer eles ne poent riens avoir par eles que tout ne soit a lor maris.

⸿ Quer por ce que l omme et la femme sunt ii en une char. et lor possession doit estre une de quoi le mari a la segnorie. il sunt quites par i monneage. ⸿ Et par ce doit l en savoir que les femmes ne poent fere nul marchie de lor possession sans le consentement a lor maris que les maris ne puissent rapeler.

⸿ L en doit saveir que il a uns leus en Normendie qui onques ne paierent ceste aie. si comme la chastelerie saint jaque el val de mortaigne et aucuns autres leux qui onques ne paierent monneage.

⸿ Touz les autres fors cels que nos auon nomme qui tiennent en la terre le duc fieu et leu doiuent paier le monneage por tant que il aient moeble qui puisse soufire auenamment.

⸿ Mes les robes et les ostuix et le liet ne doi uent pas estre el conte ne conte por moeble.

⸿ Et por ce selt il estre apele fouage que cels paient principalment qui tien nent feu et leu.

⸿ Les autres qui ne tiennent feu et leu si comme les serians et les chamberieres qui ont de moeble xx s. ou la ualue sunt tenus apaier le. et les femmes qui onques ne furent mariees qui tiennent fieu et leu paieront le monneage autresi.

⸿ L en doit sauoir que toute lapoeste de la monnoie apartient en normendie au duc.

De mesures. xv.

T oute la poeste et la segnorie des mesures et du pois apartient au duc. que il les poet muer et changier et amender. et par tout la ou les serians les troueront desloiaux il les doiuent arrester. et se els poent estre prouees a fausses illes doiuent fere froissier et prendre de cels qui ont ce fet selon le meffet l amende.

⸿ Et ce doit estre entendu sainement des mesures de ble et de boiure et de dras et de poises.

⸿ Ne porquant l en doit sauoir que les barons poent prendre en lor uiles les mesures de boiure et des blez et amender les s il les treouent fauses ains que la iustise imete main.

⸿ De laune et des pois apartient au duc l adrecement et l amende s en les treoue fauses. et cels qui en usent doiuent estre tenus afausonniers et en doiuent porter la peine autresi comme par maniere de larrecin.

⸿ Es mesures de boiure poet le prince de Normendie ou ses barons assigner et tauxer certain pris. ou la chierte. si que les tauerniers ni aient damage. et que les achateors n en soient greuez. et quant lestablissement sera fet sus ce. qui comques nes lessera dedenz l an. il le doit amender au prince.

⸿ Et fus ce selt l en fere enqueste en Normendie de tierz an en tierz an. et en aucune partie de Normendie le selt l en enquerre chescun an

⸿ Plusors barons et autres segnors de Normendie en calengent l amende en lor fieux et les souloient auoir.

⸿ Tel maniere de demande est apelee tauernage que les princes establirent por refraindre la conuoitise as tauerniers et que le poeple ne fust greue par lor outraiouse uente.

De quereles et de droiture. xvi.

L i duc doit auoir la cort des quereles et des choses en quoi sa droiture est especiaument si comme de uerech qui sunt trouez et arriuez.

⸿ Quant lesegnor del fieu les aura trouez il les doit fere garder sauuement au port ou pres d iluec si comme il porra plus prophetaument. ne il ne les doit apeticier ne reuerser ne moueir deuant que il aient este ueues del baillif ou de son commandement. et quant il auront este ueuz et esgardez diligeaument il doiuent estre bailliez au segnor deu fieu ou a prodesommes de qui l en prenge bone seur tance si comme il pleira a la iustise que il les garderont iusqu a i an et i jor. se cest chose qui puisse estre si longuement gardee sanz empoirier. si comme peaux dras cire or et argent. et tex choses.

⸿ Et se cest chose qui ne puise estre gardee longuement sanz empoirier certaines ensegnes en doiuent estre retenues et la chose uendue a laueue de la aiustise et de prodesommes. et le pris doit estre garde autresi comme la chose meimes.

⸿ Se dedenz l an et le ior uient auant aucun qui fust en la nef quant ele depecha et il preoue par le tesmoing de hommes creables et par certaines enseignes que le uerech soit suen en tout ou en partie il le doit auoir se l an et le ior ne sunt passez. M es se l an et le ior sunt passez si remaindra tout en pais au segnor deu fieu. ne ia nul qui puis le demant n en sera respondu. mes li duc en doit auoir unes choses qui especiaument apartienent a lui par l ancienne dignete de la duchee.

⸿ En quel terre que uerech soit arriuez si comme lor et l argent en quoi que il soit ou en uaisseaux ou en monceaux por quoi il uaille plus de xx liures et les destriers et les frans chiens et les frans oiseaux. li roi et les pierres preciouses. et pardesus ce l escarlate. le uair. le gris. et les peaux sapelines qui ne sunt encore appropriees a lusage de nul homme. et touz les trousseaux de dras entiers liez. et toz les dras de soie entiers. Toutes les autres choses remaindront as segnors en qui fieu le uerech arriua.

⸿ Et toutes les quereles qui naistront par la reson deu uerech doiuent estre terminees en la cort au duc.

De tresor trouez et de choses gayvees. xvii

I l apartient a la dignete au duc que il ait le tresor troue en foy. Et se il est cele ne noie il empoet enquerre la uerite par hommes creables. et celui qui en est querele n en poet oster nul homme deu serement se il ne moustre clerement que il ait aperte haygne entre els. ou se l en n a sopechonous cels qui sunt au serement par quoi il ne doiuent pas estre recheus. Et autre si poet il fere de toute sa droiture et de tout ce que il saura que il deura aueir et enquerre par cheualiers et par autres hommes loiax et creables.

⸿ Le duc poet fere enqueste qui tienent sa droiture. se il nont chartre ou longue teneure por quoi autre doie auoir cele dignete.

⸿ De chosegayuee et des chatex a cels qui ocient soi meimes doit lensauoir que le duc les doit auoir.

⸿ Chosesgayue es sunt qui ne sunt pas appropriees a nul homme. et qui sunt trouees que nul ne reclaimme. si doiuent estre gardees i an. et i jor Et doiuent estre rendues a cels qui proueront que il sunt soues. autresi comme nos auon dit de uerech.

⸿ Se le segnor deu fieu ou eles sunt trouees les prent ancies par lui ou par son atorne por ce que il ait pleniere poeste en sa terre eles doiuent estre rendues si comme nos auon dit de uerech. se longue tenue que uaille droit ne fet la dignete de tex choses au duc ou as autres.

⸿ Il i a uns especiaux usages qui souent se changent selon la diuersite deu pays et descitez qui abatent les quemuns usages de Normendie si comme nos diron apres plenierement.

Des chatex as usuriers. xviii.

L es chatex as usuriers remaignent au duc de Normendie par l ancienne costume. por refraindre en cels qui vendront apres la couuoitise des usures.

⸿ Usure est fete en iii manieres. Une maniere est quant cil qui achate soblige apaier aucune chose plus que le pris por ce que l en li donne terme de paier. Reson comment. Pierres a afeore son cheval a Thomas au feur de x. lb. et en ce se sunt acordez. Et por ce que Thomas n a pas les deniers il demande terme de xl iors par conuenant que il paiera. xii. lb. por le cheual Juiee est fete usure de xl. souz. Autresi doit l en entendre de deniers prestez. Quer quant l en apaie par conuenant plus que ce qui fu preste tout est tenu por usure.

⸿ En la uente du cheual dont nos auon parle et en tex marchies sunt les deniers deu pris autresi comme prestez quant terme de xl. iors est donne par conuenant de paier les por paier xl souz ou plus.

⸿ La seconde maniere si est quant une chose d une maniere est baillie por une autre maniere miex uaillant apaier a terme. si comme n en preste orge por forment auoir. ou cerueise por uin.

⸿ La tierce maniere en mort gage. quant cil qui tient la chose engage en a les fruiz et lesiessues et n en conte riens en la dete. Si comme aucun bailloit sa terre a un aucun por xl lb. quant que cil qui la tient rechoit des iessues de la terre pardesus son chatel tout est tenu a usure.

⸿ Le chatel a nul usurier n est forfet fors a cels qui ont use d aucunes de ces manieres d usures en l an que il sunt mors. quer nul ne doit estre tenu a usurier qui i an et i ior a cesse d usure mener apres ses derraaines usures.

⸿ Se contens n est entre le prince et l iglyse de chatex qui sunt forfez en tel maniere enqueste en doit estre fete a sauoir mon se le mort a fet chose par quoi son chatel doie estre forfet. et tele enqueste doit estre fete a lapremiere assise. ne lebaillif n est tenu a fere le sauoir fors au prestre en qui parroisse cest auenu.

⸿ Et se il est mis en non saueir se lechatel est forfet ou non. li euesque lordenera si comme il deura. quer il apartient a lui a ordener les chatex as mors generaument.

⸿ Et se lusure au mort n est prouee apercement. leues que ne doit pas estre despoillie de sa droiture quer li droit especiaux ne poet pas abatre li quo muns se il ne sunt aperz atorz.

Des chatiex a cels qui ochient soi meismes.  xix

L es chatex a cels qui ocient soi meismes et qui muerent escumengie ou desespere doiuent estre au prince de Nor mendie. si que l iglise ni poet riens reclamer. quer nule proiere que l iglise face ne uaut a lor ames.

⸿ Et ce doit estre entendu sagement quer se aucun autre a acostume a auoir tex chatex par anciennes costumes ou par longue teneure ou par munimens que il en ait il n en doit pas estre despoillie a tort.

⸿ Cil muerent desespere qui par ix iors ou plus ont este griement malade et de perillouse maladie et ont refuse a estre confes et acumengie ia soit ce que il lor ait este offert. et muerent en tel maniere. mes les heirs ne perdent pas por ce lor terre.