De gages et d achaz. xx

C il qui uendent les gages et les achaz doiuent perdre les choses qu il en ont recheues si que il doiuent estre au prince se il en sunt conuencu a tort.

⸿ Si comme Pierres baille a Thomas sa terre et offre les deniers a Thomas. et Thomas nie les gages et dit que la terre est soue. se il en est ateint les deniers remaindront au prince. et Pierres raura sa terre.

⸿ Des achaz doit l en saueir que se Thomas achate de pierres un heritage et aucun du lignage au uendeor requiert le marchie par la reson du ligna ge. se Thomas nie l achat et il en est ataint les deniers seront au prince et la terre sera rendue a celui qui lademandera par lignage. quer droiz est que le barat uiegne a celui qui le fet.

⸿ Nul gage ne poet estre requis en normandie se il ne fu engagie puis le coronnement au roi richart. ou puis xl anz en encha. Vente de terre ne poet estre rapelee puis que la chateor la tenue i an et i ior en pes et sans nul reclaim. et de ce diron nos apres plus plenierement eltretie des quereles.

De moeble xxi

T out le moeble forfet apartient au duc ⸿ moeble forfet sunt les chatiex a cels qui sunt dampnez par iugement.

⸿ En ii manieres sunt les hommes par iugement en Normendie. si comme loi de terre le requiert. ou por ce que les cors sunt destruiz si comme de cels qui sunt penduz ou ars ou enfoyz ou que il ont les euz creuez ou les poinz coupez ou les piez ou por ce que il sunt forbaniz si comme il apert des fuitiz qui sunt accusez d aucun crime. et se destornent quant sunt apelez ala pes le duc tant que il sunt forbaniz par iugement apres ce ou que il forbanirent le pais. si comme il auient de cels qui sunt fuitis par aucun crime. ou qui sunt en chartre ou en leux donc il eschapent si s en fuient a l iglyse ou embrachent une croiz.

⸿ Se il foruirent le pays il forfont quant que il porsient.

⸿ De destruiment de cors doit l en sauoir que nul ne doit estre dampne sanz iugement se il n est pris en present forfet de larrecin. ou d omicide ou d autre crime pardeuant tel gent qui doiuent estre creuz en tel cas. ses oeures sunt apartement iugement contre lui.

⸿ L en apelera se criminal por quoi celui qui en est ataint est dampne des membres ou del cors.

⸿ Se aucun requenoist en quemun lecrime dont il est suy il meismes se iuge et dampne.

⸿ Homme qui se defuit por son meffet doit estre apele as iii premieres assises.

De assise. xxii.

A ssise est assemblee de cheualiers et de sages hommes a terme certain et en certain lieu.

⸿ Le terme d assise doit estre de xl iors par quoi iugement et iustise doit estre fet des choses qui sunt oies en cort.

⸿ a la quarte assise doit estre le mestre a celui qui est apele a la fuite et en doit iugement estre fet. et il est forbani en ceste forme.

⸿ Nos forbanisson de par le duc Pierres por la mort Thomas que il ocist. si que qui le trouera apres ceste assise rende le mort ou uif a la iustise. et se il ne le poet prendre si crit harou a haute uoiz apres lui.2

⸿ Tant comme cele assise dure celui qui sest defuiz se poet rendre ala iustise deuant leforbanissement. mes puisque ele est passee si segart le fuitif. et apres se aucun le uoit ou consent ou recete. se il nel rent a la aiustise ou ne lieue le cri apres lui . se il lerequenoist ou il en est ateint par l enqueste. il ledoit espeneir par le chatel a la uolente au duc.

⸿ Et se d enqueste en est fete et il est mis en non saueir il s en de resnera ou il lespeneira si comme nos auon dit.

⸿ Celui qui s en fuit a l iglyse ou a seint lieu. il ipoet demorer viii iors et au noeme ior l en li doit demander se il se uelt rendre a la iustise laie ou se il se uelt tenir a l iglise.3

⸿ Il forsiugera le pays pardeuant les cheualiers et pardeuant autres gens creables qui empuissent porter tesmoing se mestier en est en ceste forme. Ce oient touz cels qui ci sunt que tu di ci en auant n en treras en Normendie si tait dex et les sainz. celes paroles doit celui dire de soi. Et puis li doit l en demander par quel partie il s en uoudra iessir de Normendie. et selon la longor de lauoie li soit donne terme auenant diessir. einsi que il ne puist demorer en une uile que une nuit ne retorner es lieux que il ara passez. ains doit iessir hors des marches de Normendie par la uoie que il aura choisie. apres ce se il reuient l en le doit prendre et fere de lui comme de forbani.

⸿ Leduc de Normendie aura i an et i ior les terres as dampnez et les iessues. et apres eles doiuent estre rendues a celui a qui il auoit fet hommage et de qui iltenoit nu a nu.4

⸿ Les esfanz a cels qui sunt dampnez ne poent en nule maniere auoir lor heritage. mes se il en auoient aucune chose auant que celui feist le fet de quoi il est dampne celui ne perdroient il pas.5

⸿ Les dampnez ne forfont fors le fieu qui est lor propre. et que il tienent el tens que il font le forfet et ce que il ont puis conquis.

⸿ Les autres fieux et les eschaietes qui a celui deussent auenir qui forfet par droit heritage doiuent uenir as autres plus prouchains du lignage si que les effans a cels qui sunt dampnez ni perdront rien.

⸿ Nul du lignage a celui qui est dampne n aura rien en son fieu.6 Et se le prince treoue aucun de ses parens qui ait aucune chose del suen il prendra la chose a soi se le segnor del fieu nes reclaime auant a qui eles doiuent apartenir

⸿ Et se celui qui tient la chose dit par auenture que celui qui fu dampne ne tenoit pas cele chose el tens que il se meffist. enqueste en doit estre fete sanz delay. et ce que il fera troue par enqueste doit estre garde. Et se aucune chose de l eritage uient d autre part par aucune maniere de celui del lignage il la porra bien tenir.

⸿ Les mesons as forbaniz et as foriurez et as damp nez doiuent estre arses en tesmoing de lor dampnement si que la remembrance de lor felonnie soit a cels qui seront apres essample et peour.7 Se eles sunt en tel leu que il ne puissent estre arses sans damage d autres la couuerture et le maisriem en doit estre esrachie et ars en tel maniere que damage n en uiegne a autres. Et se els nont meson lor dampnement doit estre poeplee par les ueisines feires et par les marchies et par les yglises aloie des parroisses si que semestier en est la uerite en soit seue par enqueste.

De escheance d eritage

I l conuient apres uoier descheance d eritage et de uentes et des manieres et des possessions fieufaux.

⸿ Nos deuon sauoir que une escheance uient par heritage et une autre par grace et une autre par fortune.

⸿ Cele qui uient par heritage est quant homme rechoit heritage par reson de lignage. si comme quant le filz rechoit l eritage son pere ou par droite escheance. si comme le segnor a l eritage son homme par faute de oir qui soit de son lignage.

⸿ Escheance par grace est quant un euesque ou un abe tient le fieu que son anceisor tint qui apartient a son benefice a quoi il est esleu par grace.9

⸿ Escheance de fortune ou d auenture est quant le fieu remaint par aucun cas ou par aucune condition a aucun estrange qui n est pas del lignage a celui qui le tient.

⸿ De escheances qui uienent par heritage l une est droite. lautre n est pas droite. La droite est quant escheance eschiet par droite ligne de pere et de mere au fuiz. ou a lenfant a aucun qui est de cel lignage.

⸿ Et por ce doit l en sauoir que l ainzne fuiz est heir son pere. et touz doiuent estre ses hommes qui sunt puisnez en cele ligne meisme. Ja soit ce que plusors sunt encontre ceste costume qui anciennement selt estre gardee en Normendie que l eritage qui uient a lenfant au fuiz que il ne doit pas auoir l eritage son aiel. ia soit ce que il soit fuiz a l ainzne qui morut au uiuant son pere.10 ainz le doit auoir l autre fuiz si que le neuou ne poet auenir a l eritage a l aiel tant comme il iait nul des fuiz. Et en cest cas mue la costume de Normendie. et le droit. quer le fuiz a l ainzne doit touz iors auoir l ainsneesce. et sanz lui ne doit estre nul or achalengier l eritage ne a defendre.11 et doit fere hommage as segnors. quer il doit auoir autretel droiture en l escheance comme son pere eust se il uesquist. par quoi il apert que l eritage doit uenir a lui en lieu de son pere.

⸿ Escheance d eritage qui n est pas droite est quant leneuou ou aucun autre qui n est pas de la droite ligne a l eritage son frere ou le neuou a celui a son oncle.

⸿ Descheances qui uienent d auenture l une est par fieu et l autre par establissement. la tierce par condition. ⸿ Cele par fieu est quant le fieu repaire par faute doir ou quant celui qui tenoitest dampne. le fieu remaindra que il tient a celui de qui il est tenu.12

⸿ Cele par establissement est quant le fieu reuient a autres quas heirs a celui qui le tint par establissement qui a este fet. Et ce fet l en en doaire et en weouete selon les costumes des uiles si comme a baieeux. la possession de la meson depeciee qui est sanz quarrel et sanz mortier doit reuenir a celui de qui ele est tenue.

⸿ Cele par condition est quant fieu est baillie ou uendu par tel maniere que quant celui qui le prent sera mort il remaindra a celui qui lebailla ou a autre si comme la condition est entre celui qui la baille et celui qui la prent. Ce sunt les costumes des escheances qui ont este ancienement gardees en Normendie.

⸿ Lainsne fiz a l eritage son pere et sa mere. et se il moert ainz que lepere ne la mere ses fiz ou ses plus prouchains heirs du lignage auront l eritage. Et se il ne remaint nul qui soit descendu de l ainsne. l ainsne apres ou le plus prouchain qui soit descendu de lui aura l eritage. et autresi doit l en entendre des autres puisnez. Et se touz les enfanz sunt mors ainz que le pere son autre frere aura l eritage ou le plus prochein qui est de lui iessu. Et se il ni a nul des freres ne de lor enfanz l eritage reuient au pere de qui les freres partirent. Et se il moert il uendra a celui qui est son frere. et oncle a celui de qui il eschiet. Et se il nia nul des oncles ne de lor enfanz il uendra a l aiel. Et autresi doit l en entendre de cels qui sunt en cele ligne. mes ce ne doit estre entendu fors de cels de qui l eritage descendi.13

⸿ Et si doit l en sauoir que lignage sestent iusqu au septiesme degre. et einsi apert il que le frere a l eritage son frere pardefaute de lignie qui soit de lui nee.

⸿ L en doit sauoir que se l eritage a aucun descent de par son pere. et il a eu i frere ou i cousin qui soit de sa mere tant soulement. cel frere ou cel cousin n aura pas l eritage. quer il ne uint pas de ses anceisors. ainz remaindra au segnor du fieu. mes il est autrement des conquez si comme nos diron apres.14

⸿ Leritage doit descendre a celui qui est plus prechain a celui qui le tient apres la mort. por quoi il soit du lignage de quoi l eritage descent.15

⸿ Se il ne remaint nul des freres l eritage uendra as cousins. et si ne poet uenir a l aiel tant comme il iait nul de cels qui sunt descendus de lui. M es se il ne nia nul l eritage reuen dra a lui et a celui qui descendi de lui. Et les conquez que les enfans ont fet uiennent touz iors as plus prouchains du lignage.1617

⸿ En l escheance de l eritage qui ne uient pas droitement doit l en touz iors corre a lachose si que le plus prouchain del lignage l ait.

⸿ Les effans qui iessent de lui ont la dignete d auoir l eritage. et ce sera mostre apres.19

De parties d eritage. xxiii.

N os diron apres des parties de touz heritages la ou il sunt partables et ou il ne sunt pas partables l en dit que l eritage n est pas partable en quoi nule partie ne poet estre souferte entre les freres par la costume du pais. si comme fieu de hauberc. les contees. les baronnies. les serianteries en quoi la garde apartient au seignor tant que les oirs soient en aage.

⸿ Heritage est apele partable en quoi le segnor ne poet reclamer nule garde. si comme sunt les uauassories. et touz les autres tenemens uilains. les bordages et les borgages.

⸿ Quant a aucun est eschau l eritage son pere ou son aiel. se il ia freres qui soient du lignage a celui de qui l eritage descent. le fieu doit estre baillie au puisne si enfera autretant parties comme il sunt principax parchonniers. selon la costume del pais.2122 Les uns sunt principax. et les autres secondax.

⸿ Les principax sunt cels qui l eritage doit estre departi principalment. cest quant l un en doit auoir autretant comme l autre si comme freres.

⸿ Les secondax sunt cels qui natendent pas tel partie ainz iclaiment aucune chose. si comme sunt les enfanz a ii freres qui doivent partir ensemble la partie qui apartenoit a lor pere.

⸿ le puisne doit fere les parties que il ne departe pas les fieux de hauberc ne les autres fieux la ou il a garde ne ne meslent pas les choses qui sunt en une vile o celes qui sunt en autres viles. et que il ne retaillent pas ne ne recoupent les pieces de terre por tant que oue les parties en puissent estre fetes.

⸿ Lechief de l eritage remaindra a lainsne si comme le herbergement. et le clos et le gardin et le cortil.24 por tant que il face a ses freres leal partie deschange a la value de sa partie toutes les autres choses seront parties oelment.

⸿ Quant les parties seront fetes et devisees le puisne les doit aporter a cort. et doit dire a ses ainsnez freres que il choisissent. et se il uoelent il choisiront maintenant ou il aront terme de qui nzaine au meins25

. o sfessier ser de consellier sei et de choisir por quoi les plez soient en laquinzaine. ou se il pledent en l assise il aront ior et terme iusqu a l autre assise.26

⸿ Mes por ce que es parties porroit auoir malice par l ainsne qui doit auant choisir les autres poent contredire les parties se il uoient aucun signe de malice. quer se le puisne metoit la moitie de tout l eritage en i lot por ce que l ainsne le preist. il emporteroit les loz as autres freres. et por ce se l en aperchoit tricherie les parties doiuent estre fetes oelment par le serement de xii. hommes leaux et creables.

⸿ Se le puisne fet les parties et il ua contre les costumes du pays eles doiuent estre depechiees et refaites. et il doit espeneir sa defaute. se il nes uelt refaire il sera sans partie tant comme il se tendra en ce. ou l autre les face auenans si que la partie au menor ne soit empoirie. et se l en uoit que il face malice les parties soient amendees par les iurez si comme nos auon dit. Le plet de tel chose ne poet auoir que une essoine et une defaute.

⸿ Se tout l eritage de pere et de mere as freres est ensemble les parties doiuent estre fetes de tout ensemble.27 et se il lor uient autrement eles doiuent estre fetes de tout ce qui est uenu a els de quoi il n auoient pas oncore este fetes.

⸿ Se les ainsnez ont recheu lor partie en cort et le menor ne uelt receuoir la soue. il ne lor porra pas demander autre. et l ainsne la doit tenir tant que il la requiere. por ce que il estoit tenu a fere partie as gregnors.28

⸿ Nos deuon saueir que se il ne sunt que ii freres quant le menor aura fet les parties selon droit. l ainsne doit touz iors choisir. quer en ce ne poet l en trouer nul malice.

⸿ L en doit sauoir que se l ainsne choisist le fieu qui n est pas partable et il baille as autres les eschaietes. se l un des autres muert l eschaiete ne reuient pas a l ainsne. mes a celui qui en auoit partie.29

⸿ Les suers ne poent ne ne doiuent reclamer nule partie en l eritage lor pere entre les freres ne entre les heirs. M es eles lor poent demander mariage. et se les freres les poent marier sanz desparagier soi ce lor doit soufire.

⸿ Et se il ne les ueolent marier eles aront le tierz de l eritage en lieu de mariage.30 mes tant ia que se els sunt x freres ou plus. une suer ou ii se tant sunt eles naront pas letierz mes parties oueles a celes as freres. et nule suer ne poet auoir greignor partie que ses freres.

⸿ Toutes les soers combien queles soient ne poent riens demander plus que le tierz de l eritage. ne auoir gregnor partie que un de ses freres. neis se il ni auoit que une suer qui atendist partie ouec x freres.

⸿ L en dit que les suers nont mariage fors de la terre qui uient as freres de lor pere et de lor mere ou de lor aiel ou de lor autres anceisors. Des fieux qui descendent d autre part naront eles point de mariage si comme des eschaietes des oncles ou des cousins.

⸿ Se aucune est mariee a aucun homme ele ne porra nule riens demander a ses freres par reson de mariage fors ce que pere et mere li donnerent en mariage.31 ele n en poet riens porter fors ce qui li fu pramis au mariage que cels que li pramistrent sunt tenus a paier.

⸿ Se la pramesse est noiee ele doit estre recordee par cels qui furent au mariage.32 quer puis que la femme est mariee ele ne poet riens reclamer en l eritage a ses anceisors fors ce que les hommes masles li donnerent ou otroierent au mariage.

⸿ Et se li oir sunt en non aage le mariage as suers ne doit pas por ce estre porloignie ains les doiuent marier qui ont le lor en garde autresi comme il feissent se il fussent en aage.

⸿ Se aucune femme demande a son frere mariage se le frere uelt il l en merra ouec lui et l aura en garde i an et i ior et puis la poruerra d auenant mariage.

⸿ Auenant mariage est se ele est mariee a conuenable persone selon son lignage et selon sa persone. se ele ne uelt tel mariage si soit lessie sanz conseil et sanz aide de terre et de moeble. el mariage ne poent les suers riens clamer se eles ne sunt plus qui demandent mariage que les freres.

⸿ En borgage aront les suers partie autresi comme les freres. et ia soit ce que lefrere ait la garde de la suer i an. et i ior Neporquant se il est en nonaage il ne l aura pas le neuou ni autre del lignage.

⸿ Quant heritage uient a femmes par faute de heirs masles eles partiront autresi comme les freres feissent sique fieu de hauberc et serianterie est partable quant uient as suers.

⸿ Nul heir quel que il soit ou homme ou femme ne poet donner point de son fieu anul de cels a qui il doit eschaier ni alor heirs qui descendent d els. M es apres son deces tout le fieu et celui que il auoit issi donne doit uenir a partie entre ses heirs. et si en poet donner a ses parens qui natendent point de partie o les heirs. Raison comment. Pierres a i frere et une suer. et il nia nul heir qui soit iessu de lui. se il donne aucune chose de son fieu a sa soer ou a ses heirs qui sunt iessus delie il lor porra remaindre par heritage. por cele qui ne poet point auoir de l eritage son frere. M es se il donne a son frere ou a son heir qui est iessu de lui il ne le porra pas retenir apres le deces au donneor ainz doit estre tot raporte a partie.

D empeechement d eritage xxiiii

Q ion d empeechement d eritage. Les empeechemens d eritages sunt itex. Bastardie. Relegion et meselerie de quoi l en ne poet garir. si diron premierement de bastardie.

⸿ Touz cels qui sunt bastars qui sunt engendre fors de mariage ia soit ce que mariage ait este departi. les enfanz qui ifurent engendrez tant comme saint yglise le soufroit et tenoit por loiaux sunt il tenus por moillerez.

⸿ Et se cels qui furent engendre deuant le mariage se le pere espouse puis la mere sunt il tenus por moillerez.

⸿ Et por ce que plusors mariages sunt celez qui ne sunt pas poeplees apartement de quoi l enqueste doit estre fete par saint yglise. il napartient pas a iugier en la cort laie. quer se sainte yglise les tient por leaux la cort laie les i tendra. et por ce que le plus prochein heir doit auoir l eritage et la sesine a ses anceisors.

⸿ Se au cun dit que il fu filz au mort ou neuou ou plus prochein heir que celui qui est en sesine il conuient que celui qui tient niet ou connoisse. et se il conuient auoir l enqueste sauoir mon se il si pres del lignage comme il dit. et se cest uoir il aura la sesine.

⸿ Et se l autre partie reconnoist ce que il dit il ara la sesine sanz enqueste. S e l autre li uelt metre sus que il soit ba start por ce ne perdra il pas la sesine. M es se latreuelt metre pleges que il le prouuera a bastart dedenz i an et i. ior il ara letres del baillif qui iront a lordinaire del lieu en ceste forme.

⸿ Comme il eust plet pardeuant nos entre Thomas et. Guillaume. por l eritage Roger de Longuoie que il ne fu pas pere Richart.

⸿ Neporquant Guillaume le uolt tenir a bastart. et. por ce que le plet de ceste chose apartient a uos nos uos enuoion la cause de la bastardie a determiner en dedenz i an et i ior. et ce que uos en arez fet nos remandez au terme.

⸿ Lors ira lordinaire auant en la cause selon ce que bon li semblera. et quant l an sera passe il doiuent reuenir a la cort ou ancies se la cause est auques finee. Et se il est proue a bastart l eritage remaindra a l autre partie. et se il ne poet estre proue l autre n en ara riens.

⸿ Bastart ne doit estre oi de nul heritage. mes par achat ou par autre condi tion le poet il auoir.

⸿ Nul ne poet estre heir a bastart fors leffant que il a de sa femme espouse. et ia soit ce que bastart ne doit estre heir d eritage a nul homme. Neporquant il poet conquerre. et ce que il araconquis il poet donner ou uendre ou engagier a qui que il uoudra autresi comme celui de mariage fors a cels que il ara engendre en bastardie.

⸿ Nul qui en relegion a fet profession ne poet estre heir a autre por quoi il port apartement abit de relegion. quer il est autresi comme mort au monde.

⸿ Et se contens n est sus ce se il ne porte abit el tens que le plet est commencie. l en doit fere en tex contens autresi comme nos deimes en labastardie.

⸿ De forfeture auient il que heritage est perdu. quer nul des enfans a celui qui a forfet terre ne poet auoir heritage a autre. et ce diron nos apres es forfetures plus plenement.

⸿ le mesel ne poet estre heir a nului portant que la maladie soit aparte communement. mes il tendront tote lor uie l eritage que il auoient auant que il fussent mesel.

De teneures. xxv.

N os diron apres de teneures.

⸿ Teneure est la maniere par quoi les tenemens sunt tenus des segnors. Une teneure est par hommage. autre par parage. autre par aumosne. autre par borgage. ⸿ Par hommage sunt tenus les fieux de quoi foi est pramise expressement a estre gardee entre les segnors et lor hommes. salue la feelte au duc de Normendie. et quant le segnor rechoit hommage celui qui le fet doit ioindre ses mains et metre entre les soues si comme nos diron plenement apres en lensuiant chapitre.

⸿ Les fiex sunt tenus par parage quant le frere ou le cousin print sa part de l eritage a ses anceisors et il latient de son ainsne et li respont de totes les choses qui apartienent a sa partie du fieu et des droitures as chies segnors si comme nos mosterron apres.

⸿ Par borgage sunt tenus les aleos et les masures qui apartienent as bors et gardent les costumes des bors.

⸿ Par aumosne sunt tenues les terres qui sunt aumosnees as yglises.

⸿ En aucune partie de Normendie. sunt terres tenues par borgage.

⸿ Quant aucune borde est bailliee a aucun por fere les uilx seruises son segnor que il ne poet ne uendre ne donner ne engagier. de ceste teneure n est pas hommage fet.

⸿ Uns frans tenemens sunt tenus sans hommage et sans parage en fieu lai et cest fet par aucune composition qui est fete entre aucunes persones si comme aucun a xx s. de rente en i fieu et il donne a i autre les x s. et retient les autres x et lommage. celui qui tient le fieu ne fera pas lommage a l autre. quer il tient le fieu par i soul hommage. et tele teneure est apelee uoluntaire por ce que ele est fete par la uolente a celui qui baille le fieu et que lerechoit sans nul besoig de l eritage.

⸿ L en doit sauoir que il ia unes teneures de rentes. si comme quant aucun tient rente qui li est assignee sus une terre et la terre remaint a celui qui la tient.

⸿ Une autre teneure est quant i homme tient d un autre le fons d une terre.

⸿ Il i a une autre teneure de dignete si comme quant un homme tient d un autre aucune dignete si comme d auoir garenne ou quitance en forez ou en feires ou en autres leux ou d auoir serianterie ou moute ou aucune tel chose qui est tenue des segnors sanz fons de terre.

De hommage. xxvi.

O r uoion ci dommage.

⸿ Hommage est pramesse de garder foi es choses droiturieres et necessaires et de donner conseil et aide.

⸿ Celui qui fet hommage doit estraindre ses mains et ioindre et metre entre celes a celui qui le rechoit et doit dire ces paroles. Je deuieng uostre homme. aporter uos foi contre touz salue la feelte au duc de Normendie.

⸿ L en doit sauoir que un hommage autre de foi et de seruise. et autre de garder pes. hommage de foi est si comme nos auon dit auant.

⸿ Hommage de foi et de seruise est quant aucun rechoit autre a son homme agarder li foi et a fere li seruise de son propre cors leaument. et acombatre soi por lui se mestier en est ou fere lui autre seruise semblable. et se il li assigne rente por ce ele ne uendra pas a ses heirs se il ne fu dit quant la condition fu fete entrels.

⸿ Et se le seriant fet bataille por i autre et il en est ueincu les rentes reuendront au segnor.

⸿ M es l en doit sauoir que il tendra tote sa uie le fieu que celui por qui il fu ueincu el champ li donna. et tel hommage est fet autresi comme celui deuant. mes que il dira salue la feelte a mes segnors.

⸿ Hommage est fet aucune fois de garder pes et est apele hommage de paie por ce que il est fet en paiement de la concorde qui est reformee entre aucuns. si comme quant aucun suit aucun d aucun crime et pes est reformee entre els si que celui qui est suy fet hommage a l autre de garder li pes.

⸿ Cel hommage est receu en paie de la concorde qui est reformee.

⸿ Cest hommage est fet si comme deuant. M es que celui qui le fet doit dire. salue la feelte a mes autres segnors. et meesmement de garder ceste pes.

⸿ a hommage est aiointe pleuine. quer l omme doit plegier son segnor en toutes cors. se il n est sui de meffet qui apartiegne a sa persone. et que il sera a droit as termes qui li seront mis. et de ses nans deliurer de detes et demprunz et tant comme sa rente d un an que il li doit se poet estendre.

⸿ Le segnor a poert de fere iustise sus touz les fiex qui sunt tenus de lui ou nu a nu ou par maien.

⸿ Il i a uns fiex qui sunt tenus nu a nu des segnors. si comme cels que homme tient de son segnor quant il nia nule persone maaine. Les fiex qui sunt tenus par maien quant aucune persone est entre les segnors et les tenans. et issi tienent les puisnez des ainsnez. quar les ainsnez sunt pardeuant els. et touz cels qui sunt pardesouz celui qui a fet hommage au segnor. Nul ne poet fere iustise sus fieu se il n est tenu de li.

⸿ L en doit sauoir que nul ne poet uendre ne engager sans le consentement son segnor sa terre que il tient de lui par hommage.

⸿ Neporquant aucuns ont acostume a uendre ou aengagier le tierz ou lemains portant que il remaigne tant du fieu que les droitures et les fesances et les dignetes puissent estre paiees et fetes a segnors.

De teneure par parage. xxvii

T eneure par parage est quant celui qui tient et celui de qui il tient doiuent par reson de lignage estre per es parties de l eritage qui descent de lor anceisors. en ceste maniere tienent les puisnez de lor ainsnez iusque tant que ce uient iusqu au sieste degre en la droite ligne du lignage. et en celui degre sunt il tenus a fere feelte a l ainsne. et el setiesme degre hommage. et d iluec en auant sera tenu par hommage ce qui estoit par parage.

⸿ Lainsne poet fere iustise sus les puisnes por les rentes et por les seruises qui apartienent as segnors du fieu et ne mie por autres choses fors en trois cas sanz plus en tort fet qui a este fet a sa persone ou a son ainsne fix ou a sa femme.

De teneure par borgage. xxviii.

D e teneures par borgage doit l en sauoir que eles poent estre uendues et achatees comme moeble sans lassentement as segnors et les costumes en doi uent estre paiees selon lusage des bors.

⸿ Et si doit l en sauoir que les uentes nedoiuent estre apelees par les heirs et par le lignage au uendeor.

⸿ Et si doit l en sauoir que les femmes doiuent auoir apres la mort lor maris la moitie des achas qui sunt faiz en lor tens. et les suers idoiuent auoir tele partie comme les feres.

⸿ Et si deuon sauoir que tex tenemens ne doiuent paier en Normendie relies ne aides costumieres.

⸿ Il a en borgage maintes choses qui sunt tenues par hommage. mes ce n est pas establissement de bors ains est par le conuenant qui est fet entre cels qui les tienent. et ia soit ce que il doiuent garder le conenant que il ont fet entrels ne porquant il doit estre tenu por borgage quant as autres. et aura toutes les conditions de par borgage se expresse conuenance ne fu fete entrels quant le borgage fu receu.

De teneure par aumosne. xxix.

L en dit que celui qui tient terres qui furent donees et par ausmone a deu et a cels qui le seruent. en quoi les don neors ne retindrent nule droiture fors solement le patronage. si que les yglises tienent par aumosne de lui comme de patrons. Nul ne poet aumosner de nule terre fors ce que il ia.

⸿ Et por ce doit l en sauoir que le duc ne les baillis ne les autres qui hommages ont n en doiuent auoir nul damage.

⸿ Se aucun de lor hommes aumosne aucune chose de terres que il tienent d els por ce ne remaindra pas que les segnors ne facent lor iustise. et que il ne lieuent lor droitures des terres que lor hommes ont aumosnees. Et por ce doit l en sauoir que por ce que le duc a sa droiture et sa iustise par toute sa du chee es terres a touz ses soumis. itel puet fere les aumosnes franches et pures.

⸿ Il i a plusors terres qui sunt aumosnees que les gaaigneors tienent comme lai fieu. et ne mie comme par maniere d aumosne. quer ce que les lais iont comme lor reti enent la condition du fieu lai. et ce que cels iont a qui l aumosne fu donnee est aumosnee et doit estre tenu par maniere d aumosne. ce qui a este tenu par maniere d aumosne en pais et sans contredit et sans entrerumpre la possession par l espace de xxx ans. apartient apertement a la cort de sainte yglise.

⸿ Et se contens n est de ce il doit estre termine en la cort au duc par d enqueste. quer por ce que la iuridition des fiex apartient au duc de Normendie. les contens qui iessent de la maniere comment il ont este tenu doiuent estre termine en sa cort por tant que longue tenue ne li toille.

De garde d orfelins. xxx.

L i prince de Normendie doit auoir la garde de tous les orfelins qui sunt dedens aage qui tienent de lui par hommage ou par membre de fieu de hauberc.

⸿ L en apele membre de fieu de hauberc luitiesme partie de fieu de hauberc et de toutes les autres parties qui sunt contenues souz menor conte si comme la setisme la sieste et les autres.

⸿ L en dit que cels sunt dedens aage qui nont pas acompli xx ans et por ce que il doiuent estre tenu en garde tant que les xx ans soient acompli. l en lor donne i an par lusage de Normendie en quoi il poent fere en cort lor clamor de rapeler la sesine a lor anceisors quer a celui qui a ia acompli xxi an n est pas otroiee d enqueste de la sesine a son anceisor se icel anceisor ne morut dedens l an et le ior que la clamor en est fete.

⸿ Il doit auoir la garde de touz cels qui tienent de lui par hommage. baronies. contees. marchies franches serianteries fieufaus qui ne poent estre parties entre freres ou mesons ou tors batellies.

⸿ Il doit auoir la garde de tous les oirs qui sunt dedens aage de qui la garde apartient as segnors des fiex par les resons qui ont este dites deuant portant que il tienent du duc par hommage aucune chose du fieu qui apartient a la duchee. et se il ne tienent riens de cele duchee par hommage la garde en remaindra as segnors de qui il tienent par hommage.

⸿ Nos deuon sauoir quant li duc de Normendie a la garde d un oir par la reson de la duchee. touz les autres fieux qui apartienent a cel oir soient partables ou nient partables et neis les eschaietes qui li escharront par heritage tant comme il sera en garde seront o lui en la garde au duc.

⸿ Les autres segnors n auront pas la garde fors solement des fiex qui ne sunt pas partables en quoi il doit auoir garde. Ne le duc meismes n a pas les autres choses en garde quant la garde des oirs uient a lui par au tre reson que par la duchee. mes cels qui sunt en sa garde de par autre reson aront les escheances et les autres fieux qui napartienent pas a la garde et les recheuront par lor procureors ou par lor meneors que il ont esleu a procurer lor besoignes.

⸿ Et si doit l en sauoir que se les orfelins ne ueolent metre en la garde a lour segnors les autres fieux qui napartienent pas a la garde a lor segnors. les segnors ne seront pas tenus a fere lor uiure ne a trouer riens que mestier lor soit.

⸿ Et se il les metent en la garde au segnor o le fieu dont il a la garde. le seignor est tenu a trouer lor auenant uiure. et ce que mestier lor est selon l aage et selon le fieu.

⸿ L en doit sauoir que le duc de Normendie a par la reson de la duchee la garde de cels qui sunt en non aage iusqu atant que il aient xxi an acompli par ceste reson que quant il seront issus de sa garde. et il poet enquerre par bones gens les dessesines qui apartienent a cels. il est tenu a rendre lor se eles ont este malement estrangies. ⸿ Les oirs doi uent estre en garde tant que il aient acompli xx ans entiers et lor doiuent cels qui les auoient en garde rendre tous lor fieus qui estoient uenus en lor main par la reson de la garde se il nes ont dedens ce perdus par iugement ou par enqueste qui en ait este fete.

⸿ El premier an apres xx ans poent les oirs rapeler par enqueste toutes les sesines a lor anceisors a cels de qui les eschaietes doiuent uenir a els comme a plus prochains oirs.

⸿ Et se il se tesent tant que les xxi an soient tous passes il ne doiuent puis estre ois ne ne doiuent rapeler les sesines par le reconnoissant. se il n en ont esmeu plet dedens les xxi an. et se il ne lont sui ordeneement.

⸿ Cels qui sunt en aage poent rapeler les saisines de toutes les escheances se il en ont meu pletdedens l an et le ior que celui morut de qui ce lor eschai donc il demandent les sesines par le reconnoissant.

⸿ Quant les oirs seront issus de la garde a lor segnor il n auront nul relief d els quer les issues de la garde doiuent estre contees en lieu de relief.

⸿ Neporquant il prendront relief de lor hommes. quer por ce que il et lor terres furent en garde il ne doiuent pas perdre les relies de lor hommes quant il lor aront fet hommage.

⸿ Se femme est en garde quant ele sera en aage de marier ele doit estre mariee par le conseil et par lassentement de ses amis et de ses parens plus prechains selon ce que la noblece de son lignage et la ualor de son fieu le requerra. et en cel mariage li doit estre rendu le fieu qui a este en garde.

⸿ Femme niest pas de garde fors par mariage. ne l en ne dit pas que ele ait aage deuant que ele ait acompli xx ans. mes se ele est mariee el tens et en l aage qui est establi a femmes ma rier le tens du mariage lor donne aage et deli ure son fieu de garde.

⸿ Se aucun est en non a age ia soit ce que il n a pas fieu qui doie estre en garde. se il prent aucune femme qui ait fieu qui doie garde. le fieu a la femme sera en garde tant que le uaslet soit en aage. quer la femme suit la condition et la lai son mari.

⸿ Les fiex a cels qui sunt en garde doiuent estre garde certainement par les segnors qui en rechoiuent les fruiz et les issues.

⸿ Et por ce doit l en sauoir que le segnor doit tenir en droit estat ancien les edefiemens les manoirs les bois les pres etles iardins les estans les molins les pesqueries et les autres choses de quoi il doit auoir les issues.

⸿ Ne il ne puet uendre ne esrachier ne remuer les bois ne les maisons ne les arbres. les segnors doiuent trouer as enfans qui sunt en lor garde soufisant uiure selon l aage et selon la ualue du fieu.

⸿ Se aucun des segnors uent les mesons ou les bois qui sunt en sa garde ou il les fet es rachier ou metre maliciousement hors du fie que il a en garde il le doit griement amender et rendre plenement ou perdre la garde du tout por ce que il n a pas garde la foi que il de uoit a celui que il auoit en garde.

De relies xxxi

L en doit sauoir que les segnors du fieu doiuent auoir les relies des terres qui sunt tenues d els par hommage quant cels muerent de qui il auoient lommage. en ii manieres lessent les hommes lor herita ge en Normendie.

⸿ Vne maniere est quant il entrent en relegion et lessent toute terrienne possession. et issi descent l eritage a lor oirs et relief en doit estre paie et nouel hommage estre pris.

⸿ Autre maniere est quant il baillent a autre le fieu et il ni retienent riens si comme par uente. et d iluec uient relief et les hommages sunt autresi comme ioint ensemble quer par tout la ou il a relief il conuient que il ait hommage. mes il n est pas a laconuerse.

⸿ Il a diuer ses parties en Normendie de fieus qui ne sunt pas tenus a paier relies si comme quitances de franchises et autres dignites qui ne paient pas relief ia soit ce que il doient hommage.

⸿ Et si doit l en sauoir que par toute Normendie le relief est generalment determine en i fieu si comme le fieu de hauberc par xv lb. es terres gaaignables est fet relief par xii d. lacre. Et baronies par c lb. Et si doit l en sauoir que le masuage est releue par iii s. et aquite par ces iii s. la premiere acre ou tout le tenement se il nia plus d une acre.

⸿ En diuerses parties de Normendie adiuerses costumes de releuer les terres qui ne sunt pas coutiuees si les doit les releuer selon les costumes qui ont este garde es anciennement. si comme es fors es molins se il sunt tenus par soi sans autre tenement. Les molins qui ont ban et moutiers sans autres fiex suelent estre releues par xl s.

⸿ Se les molins sunt tenus o fieu de hauberc a quoi il apartienent ouec serianteries ou o uauassories ou ouec autres frans fiex le relief du molin est aquite el relief du fieu.

⸿ Les autres choses si comme les bois les landes qui onques ne furent gaaignies doiuent estre releuees selon la costume qui a este gardee.

⸿ En aucunes parties de Normendie a l en acostume que les uns tenemens sunt releues par relief des autres.

⸿ Des terres sauuages que l en apele mortes terres selt l en en plusors lieus paier relief vi d. de lacre.

⸿ Et si doit l en sauoir que quant celui est mort qui tenoit de son seignor par hommage. s en oir doit relief de sa mort et celui qui fet hommage a celui qui du tout a le fieu en doit paier relief.

⸿ Aide de relief est deue quant le segnor muert et s en oir la relieue uers celui de qui il tenoit son fieu. et tele aide doit estre fete par demie relief du fieu.

⸿ Et por ce doit l en sauoir generalment que quant les fiex qui doiuent relies. doiuent aide de relief de la mort au segnor. et ceste aide est deue as oirs as segnors. einsi lor aident les hommes et doiuent aidier a releuer lor fiex enuers lor chief segnor. Et por ce doit l en sauoir que il ia fiex en chief et fiex qui sunt pardesous.

⸿ Les fiex en chief sunt qui sunt tenus des segnors si comme les contees les baronies fieu de haubert les franches serianteries et les autres fiex qui sunt tenus en chief et ne sunt soumis a nul fieu de hauberc. et as segnors de ces fieus sunt deues les trois chevex aides de Normendie.

⸿ Les fiex pardesous sunt cels qui descendent des fiex chevex et sunt soumis a els si comme les uauassories qui sunt tenues par hommage et par seruise de cheual. et les autres fiex sunt tenus par acres des chies segnors.

⸿ L en doit sauoir que quant aucun fet profession en relegion por quoi il ne poet reuenir a nule terrienne possession cels qui tienent de lui ne doiuent pas aide de relief. si comme se aucun uent sa terre ou baille a son fix ou a son oir qui en fet hommage au chief segnor et en paie relief lommage du fieu n est pas por ce tenu a paier aide de relief des que lor segnor n est du tot mort. issi que il soit cuidie del tout en totmort au monde.

De aides chevex. xxxii.

A pres ce conuient uoier des chevex aides de Normendie qui sunt apelees chevex por ce que eles sunt rendues as chies segnors.

⸿ Il a en Normendie iii aides chevex. l une a aidier a fere l ainsne fix son segnor cheualier. La seconde a marier saisnee fille. La tierce araaimbre le cors son segnor de prison quant il est pris por la guer re au duc de Normendie. par ce apert il que laide de chevalier est deue quant li ainsne fix est fet chevalier

De ainsne. xxxiii.

L ainsne fix est qui a la dignite de l ainsneece. et ce meismes doit l en entendre de laide de mariage.

⸿ Laide de la raanchon est donnee por deliurer le cors son segnor de la prison des anemis au duc de Normendie.

⸿ Tex aides sunt en aucuns fiex pers a demi relief et en aucuns a la tierce partie du relief de la uauassorie.

⸿ Il i a aucuns fiex en quoi les uauassors suelent paier x s. d aie. et por ce que la diuersite des segnors se change selon la diuersite des fiex. l en se doit tous iors tenir as costumes qui out este gardees anciennement. ⸿ L en doit sauoir que se aucun fieu cheuel est deuise par parties de cousins chascun des parchonniers doit estre tenu en sa partie por chief segnor. et auoir de ses hommes les chies aides.

⸿ Et si doit l en sauoir que les sostenant qui ont segnor maien entrels et le chief segnor ne doiuent pas paier as chies segnors aie. mes il doiuent aidier a celui de qui il tienent nu a nu apaier laide au chief segnor. et tele aide est apelee souz aide. et doit estre fete par demie aide cheuel.

⸿ Lainsneece enporte moult grant dignite. a lainsne si doit descendre la saisine a son anceisor. et quant il la il doit fere partie a ses puisnes tele com il doiuent auoir. et le fieu doit estre mis en la main au puisne a fere les parties et lainsne doit choisir.

⸿ Les parties as puisnes qui ne sunt pas presens remaindront en la garde a l ainsne iusqu atant que il les requierent ou iusqu atant que lor mort soit seue ou prouee.

⸿ Lainsne a tel dignite sus ses puisnes que illi doiuent porter reuerence et honor ne ne li doiuent fere uilanie ne a son ainsne fiz. et se il les acuse de ce il sunt tenus a respondre en sa cort.

⸿ Les ainsnes font les hommages as chies segnors et les puisnes tienent d els par parage sans hommage.

⸿ Par la main delainsne paieront les autres les aides et les relies et toutes les autres redeuances as segnors et par els doiuent estre fetes totes les semonses des puisnes. quant le lignage sera ale jusquau sieste degre. les oirs as puisnes seront tenus a fere feelte a l ainsne ou a son oir. et quant il sera iusqu au setiesme degre il li feront hommage quer le setiesme degre est tot hors du lignage.

De dons que les peres font a lor enfans. xxxiiii.

L en doit sauoir que quant le pere a plusors fiz il ne poet fere l un mellor de son heritage. mes apres samort quant que il a donne de son heritage a chascun sera tout raporte apartie.

⸿ De cels qui atendent apres sa mort partie de son heritage ne poet fere l un mellor que l autre ne par donner ne par baillier ne en autre maniere ne nul qui soit descendu de lui. et ce qui a este dit du fix doit estre entendu des filles. L en doit sauoir que nul ne poet donner point de son fieu a son fix bastart en heritage neuendre li ne baillier ne engagier ne metre en nule maniere en sa main que ses oirs ne puissent rapeler dedens l an et le ior que il sera mort.

⸿ Et se celui qui einsi tient la chose le nie se plet en est meu dedens l an et le ior il doit estre descle rie par d enqueste du pais. ia soit ce que le pere ou l anceisor ne poet riens donner de son fieu a nul qui atende partie en son escheete. Neporquant il en poet donner iusqu a la tierche partie as estranges ou a ses cousins qui ni atendent nule partie tant que les ii parties remaignent soffisant apaier toutes les droitures du fieu ne loir ni poet metre contredit.

⸿ Et si doit l en sauoir que bastart ne poet auoir nul oir se il ne la de sa femme ou se il ne descent des enfans que il a de sa femme. M es la sesine du fieu que il tenoit quant il morut reuendra a son segnor de qui il tenoit nu a nu. mes ce que il aquiert en fieu poet il donner la ou il uoudra autresi comme celui qui n est pas bastart.