De delaiement de quereles. xxxvi.

O r diron de delai. delai sunt aloignement de quereles qui retargent les iugemens.

⸿ Les uns delais sunt denoies et les autres otroies.

⸿ Cels sunt denoies ou il n a nule droite cause descu sement. si comme les defautes et les fausses essoines.

⸿ Cels sunt otroies qui ont aperte et necessaire cause si comme ueouete et gesine et tex choses ou l escusation est toute clere.

De defaute. xxxvi.

D efaute est delaiement de plet par ce que aucune des parties ne uient au ior ou au lieu la ou il est semons.

⸿ Et por ce doit l en sauoir que il conuient ii choses a metre homme en defaute. Cest quant il est semons deuenir au ior et il ni uient pas ne nenuoie. et por ce quant homme est acuse de defaute il puet respondre en ii manieres. quer il poet noier la semonse et gagier une loi contre le semonneor. Mes se il ne la fet il sera en double amende l une por la fausse loi et l autre por la defaute qui lors est appareissant. quer toute defaute doit estre amendee por le despit de la cort. et por ce doit il estre iustisie tant que il l ait amendee.

De essoigne. xxxvii.

E ssoigne est un delai de plet qui mostre cause por quoi celui qui est semons ne uient a cort por la maladie que il a. Vne essoigne de uoie de cort l autre de mal respit resseant. ⸿ Essoigne de uoie de cort est einsi apelee por ce que celui qui plede est empeechie en la uoie de la cort par soude maladie si que il ne puet uenir a la cort.

⸿ Tele essoigne est fete en ceste forme. Richart uenoit pledier a ceste cort contre Thomas. maladie li est prise en lauoie de la cort si que il ne poet uenir a ceste cort ne a autre o sante de son cors de quoi ie sui prest de fere l esgart de la cort et si est tenu a dire le lieu la ou il le lessa malade se l en li demande.

⸿ Ceste essoigne doit estre receue oiant l autre partie et ior doit estre assigne a lessoingneor as premiers ples ou as premieres assises de cele cort por tant que l autre partie ne uoille de riens casser l essoigne.

⸿ Ceste essoigne poet estre cassee sele a este fete autre fois de cele querele quer une soule fois en poet aucun estre essoignie en une querele ne le plet n en puet plus estre porloignie.

⸿ Ceste essoigne ne requiert point de tesmoig ne ele ne garnist pas auant la cort quer celui qui a este essoignie uendra a cort se l autre partie deman de droit de l essoigne et dit qu ele ne croit pas quele fust uraie. ains fu fete por lui greuer et por delaier le plet. se il en demande le serement celui qui se fist essoignier face tant que il ensoit creu ou ilament sa defaute quer il est tenu a amender la ou a sauuer son essoigne par son serement en toutes les paroles qui furent dites en l essoigne. ou par le serement a l essoigneor se l autre partie le requert. et se il ne la uelt sauuer il lamendera aussi comme defaute. ne ne porra puis enuoier en la cort autres essoignes de cele querele des ce que il en est conueincu. quer il enuoia en la cort fause essoigne. ia soit ce que aucuns ne sa cordent pas en ce. por ce que il ne ueolent pas tous iors porloignier les ples.

⸿ Essoine de mal resseant uelt auoir tesmoing et uelt garnir auant la cort le ior deuant et dire a la iustise que il est iluec uenu por Richart que il essoignera lendemain. ou a celui que il trouera el lieu de la iustise. et si le doit atendre se mestier en est tant comme lon atent a cort cest de miedi iusques a uespres. et se dedens ce nia aucun en lieu de la iustise. il doit apeler aucun deuant le lieu ou il doit pledier et doit dire ce que il quiert il en porra einsi partir sans peine et fere lendemain l essoigne en ceste forme. Richart auoit ior a hui en ceste cortcontre Thomas. il est malade de mal resseant si que il ne poet uenir en ceste cort ne en autre par sante de son cors. et de ce ai ge tesmoing et garant ⸿ M aintenant doit le garant dire. Je loi et leui et prest sui de fere en l esgart de la cort.

⸿ La seconde essoigne et la tierce de mal resseant doiuent autresi estre fetes. M es ce il doit estre aioint de quoi il sest fet autrefois essoignier.

⸿ L en doit sauoir que en nule querele ne poet auoir que trois essoignes de mal resseant si comme nos diron apres apertement es quereles.

De langor. xxxviii

L angor porloigne la fin des ples. quant les trois essoignes sunt fetes l en doit commander que la persone qui a este essoignie soit ueu el lieu ou les essoigneors distrent que il gesoit malade. et ior doit estre mis a celui qui a este essoignie et a son auersaire. Si doit le baillif auoir iiij cheualiers ou plus ou viii loiax hommes creables ou plus qui ne soient pas sopechonnous qui uiegnent a cele ueue par semonse. et se il treouent celui qui a este essoinie. la iustise lidoit demander lequel il aimme miex auenir as premieres assises ou a iurer langor. et se il dit que il uendra a la cort. il en doit donner pleges. et si li doit l en commander que il ait ses essoigneors auior por sauuer ses essoignes si com il deuront.

⸿ Se il uelt iurer langor. il iurera en ceste forme que il croit auoir tel maladie de quoi il n a pas esperance de garir dedens i an et i ior.

⸿ Les cheualiers et les autres qui seront presens a jurer la langor doiuent uenir as premieres assises et recorder que celui a iure langor deuant le baillif et deuant les cheualiers de l assise si que il puisse estre seu par le recort se mestier en est. ⸿ Et se l essoignie n est troue el lieu ou les essoigneors distrent en la cort que il estoit les essoigneors a garantiront a la cort et il a mendera ses defautes. se il nie que il ni enuoia pas les essoigneors et il en est acuse se il offre a deresnier le la deresne en sera prise et il porra derechief fere ses essoignes. Mes se il nie autre fois que il nes ienuoia pas il n en sera pas oy.

De essoigne par enfantement. xxxix.

M aladie d enfantement que l en apele gesine poloigne la fin des quereles et par qui que l essoine soit aportee loiaument en cort ele escuse la femme et li donne terme de xl iors. mes se l autre partie dit quele est fete par barat. enqueste doit estre fete de son enfantement par cels du uisne. lenfantement doit estre mostre a la ueue des femmes. et se lest ateinte de barat el le doit amender griement.

⸿ Et se l essoine a este a droit fete celui qui la contredisoit si lamendera.

De weouete de femmes. xl.

L a ueouete des femmes qui nont pere ne filx ne neuous qui soit en aage ne qui latiegne en sa main ne qui ait o lie possession de fieu ne de moeble. porloigne la fin des ples. et il ont terme de querre conseil iusques a i an et i jor quant cel terme sera passe ele se doit offrir pardeuant la iustise amener le plet qui a este commencie. et cel terme que les ueoues femmes ont por ra chescun auoir contre els si com aucuns dient.

⸿ Ceste essoine n a leu en quereles qui sunt menees de propriete d eritage. mes enquestes ne remaindront pas por ce.

De non aage. xli.

N on aage porloigne la fin des quereles.

⸿ Nos dison que celui est en nonaage qui n a pas acompli xxi an. Toz cels qui sunt en nonaage aront terme de totes quereles tant que il uiegnent en l aage de xxi an fors des quereles qui sunt fetes par enqueste ou par brief.

⸿ Choses que celui qui est en non aage face ne die en cort laie ne sera estable forz en ce qui sera iugie par loi outree selon ledroit et les costumes de la terre. de quoi nos diron apres quant nos treteron de brief d anceisors et des costumes.

De ost. xlii.

L ost au prince de Normendie. des le ior que ost est bani porloigne les querele que non aage porloigne. et totes les autres a cels qui sunt ales el seruise le duc iusqu a tant que il en ait renuoie son ost en normendie.

⸿ Nul ne se poet escuser par essoigne ni en autre maniere de laide de lost a qui il est tenu de fieu. quer il ni poet auoir nul delai. M es se aucun est malade que il ne puisse acomplir le seruise de lost il doit enuoier en lost homme soufisant en son leu qui bien face le seruise.

⸿ L en doit sauoir que il a aucun fieu de hauberc qui doit a son seg nor le seruise de lost qui doit estre fet au prince. l autre doit laide de lost.

⸿ Cels qui doiuent le seruise sunt tenus a fere le en lost ou enuoier i por els tel qui face auenamment le seruise.

⸿ Cels qui doiuent laide ne doiuent point rendre la ne leuer deuant que le prince lor ait octroiee la quantite de laide de fieu. M es quant laide sera determinee et otroiee par le prince chescun sera tenu a rendre la se le duc uelt a la semonse de xv iors ou de plus sans nul delai si comme il tient du fieu.

⸿ Se il fet gre de laide de son fieu autresi comme il fist a la derraaine fois que laide de lost fu paiee selon laquantite que le prince determina et otroia il doit par ce remaindre en pes.

⸿ Se le segnor du fieu uelt prendre gregnor amende dost que il ne doit les hommes emporront plecher en la cort au duc autresi comme de fieux et d autres heritages quer nul ne poet par droit leuer gregnor aide dost que il ne doit et que il ne li conuient paier a son segnor ou au prince.

De priuilege as croisies. xliii.

L e priuilege des croisies porloigne la fin des quereles por quoi lon plede. de lapropriete daucuns fieux ont aucuns terme qui sunt croisies a respondre d eritage i an et i ior. et se il se metent dedens ce a aler a lor pelerinage. il aront terme iusqu a vii. ans. se il ne reuienent ancies ou se lour mort n est prouee par le tesmoing de ii hommes creables ou de plus qui uenus soient de cel pelerinage et qui iurent qu il le uirent mort et uif ou par les letres a leuesque ou a l official du diocese.

D escusement par iustise. xliiii.

S e aucun a receu semonse de diuers iuges destre en diuers lieus a un meisme ior il doit aler a la cort au plus haut qui par ses letres pendans le porra deliurer de la defaute de cel ior et fere le plet delaier iusqu a i autre terme. ceste escusation poet estre fete une soule fois par un iuge

D escusement par noif. xlv.

S e ueue d aucune terre est assise et la terre est couuerte de noif ou d abundance de pluie la ueue et le plet doiuent estre por loignies iusqu a i autre terme que la terre soit descouuerte de noif ou de pluie.

D escusement par prison. xlvi.

S e aucun est tenu en prison il n est pas contraint de respondre de quereles fieufaus deuant que il soit deliure de la prison ou il est. ains doit estre le plet porloignie iusqu a i autre terme auenant. Mes la cause por quoi il est en prison en est exceptee.

⸿ Touz cels qui sunt suis de felonnie puis que il sunt mis en prison ou baillie en garde aront ceste dilation et cels qui suient laront iusqu a la mort. puis que la bataille est gagie.

⸿ De la prison establi le roi Loeys2 que nul ne fust mis en prison fors si comme il est contenu en son establissement que nos auon deuant.

De terme non soufisant. xlvii.

S e aucun a terme de respondre de son heritage a meins que xv iors. il couendra que le plet et le terme soit porloignie iusqu a xv iors au meins.

De garant uouchie. xlviii.

V ouchement de garant porloigne la fin des ples. Garant poet estre uouchie en ii. manieres. ou comme defendeor qui est tenu a garantir le fieu ou com ainsne de fieu a qui l en doit pledier principalment.

⸿ Et l en doit sauoir que celui qui est querele de fieu poet aloignier le plet par garant del defendeor tant que il uiegne a cort por respondre. quant garant est uouchie ior soufisant doit estre mis d auoir le a cort. et celui qui la uouchie le doit derechief requerre que il uiegne dedens ce ouec lui a cort por garantir le au ior qui est mis.

⸿ Et se il ne le poet auoir il doit aler a la iustise et fere le semondre destre au ior por tant que il ait xv iors iusqu au terme qui li est mis. et le garant porra auoir autex dilations comme celui qui la uouchie a eu.

⸿ Et si deuon sauoir que le garant qui est uouchie premierement poet uouchier le suen garant et celui le suen iusqu au tiers.

⸿ Le tiers garant ne poet pas uouchier le quart. ains conuient que il defen de la querele ou que il lest as autres la defense. et se il ne la uelt defendre l autre partie aura le fieu. et celui qui est en pledie aura l eschange. et ce meisme doit l en entendre de l eschange as ainsnes.

⸿ Et si doit l en sauoir autresi comme celui qui est querele n est pas tenu a respondre par desriere son ainsne du fieu qui li est ue nu de ses anceisors. ne poet celui se plaint auoir ce que il demande par derriere son ainsne se il a ainsne du fieu.

⸿ Celes meismes dilations que celui qui est querele a porra auoir celui qui se plaint se il uelt aloignier le plet.

⸿ L en doit sauoir que se aucun est uouchie a garant et l autre partie dit que il n est pas garant. il doit estre enquis sauoir mon se il est garantisseor ou non du fieu donc il est uouchie a garant.

⸿ Et se d enqueste dit que il soit garant il aura la poeste de garantir le fieu et l autre partie a garantira.

⸿ Et se d enqueste dit que il n est pas garant. il ne porra pas estre recheu agarant. ains a garantira celui qui le uocha a garant. mes se il enchiet il sera tenu a leschange.