De cort laie. Li

P or ce que les contens nessent de tort et doiuent estre fines par iugement pardeuant la iustise en cort. N os diron ci de la cort.

⸿ Cort laie est assemblee de sages hommes en certain lieu et a certaine hore por quoi droit doit estre fet des contens a cels qui pledent.

⸿ Cels sunt apeles pledeors qui meinent quereles es ples pardeuant la iustise. ⸿ Nos deuon sauoir que a finer les ples couuient que la iustise soit en present par quoi iugemens seront fes des choses proposees et respondues et que les pledeors rameinent la querele pardeuant els.

⸿ Certain ior et certain lieu doit estre assigne as parties par semonse qui soit auant fete de quoi la plainte sera receue et pleges donnes de suirre la. ⸿ L en doit sauoir que le duc de Normendie doit tenir la cort de touz les tors fes qui apartienent a sa dignete. si comme la monnoie du foage et de telx choses. du plet de l espee et de toutes autres choses qui apartienent a la cort laie de quoi plainte est fete a lui. et des pesans quereles et des legieres et des criminax et des simples. M es se aucuns requiert la cort qui auoir la doie ele li sera rendue.

⸿ Le duc de Normendie a principalment la cort de touz les tors fez qui li sunt fez en choses mouables et en noient mouables encontre sa persone ou de tous cels qui tienent nuement de lui et de touz les tors personelx qui sunt fez a ses baillis ou a lor serians ou a lor atornes. ⸿ Il a la cort du plet de l espee si comme de roberie de muldre d omicides de trieues fraintes. d assaut en felonnie d enquestes de toutes choses qui apartienent au plet de l espee. esceptes cels a qui le prince de Normendie a otroie a auoir la cort de tous ples si comme il est appareissant par lor chartres et par lor longue tenue ou par eschange ou par autre reson appareissant.

⸿ Les cheualiers et cels qui tienent franchement les contees et les baronnies et les autres dignites fieufaus ou les fiex de hauberc. ou les franches serianteries et les autres frans fiex ont les cors de lor reseans es pesans quereles et es legieres de moeble ou d eritage. et de larrechin. ia soit ce que eles doiuent estre finees par batailles.

⸿ Li ainsne ont la cort de lor puisne en iii cas tant soulement. ou par le meffet ou par la ledenge que il ont fet ou dit a lui ou a sa femme ou a son ainsne fix. ⸿ En ces iii cas sunt les puisnes tenus a respondre en la cort a lor ainsne et aderesnier s en et amender le.

⸿ Tous cels qui tienent de pure aumosne ont lor cort de lor tenans de l aumosne.

⸿ Se aucun demande par i tesmoing et par une ba taille fiex qui soient de diuers segnors le duc aura la cort quer nul des segnors n a pooir de iugier de tous les contens en la cause. Et des ce que il nia que une querele ele doit estre terminee par une loi. ⸿ L en dit que ce n est que une querele que uns hons meine par i tesmoing et par une bataille. et si dit l en que ce n est que une querele qui est fete de fiex tant soulement ou de moeble ou de tex choses.

⸿ L en doit sauoir que nul qui tiegne son fieu par uil sersoulement ou de moeble ou de tex choses.

⸿ L en doit sauoir que nul qui tiegne son fieu par uil seruise ne doit auoir sa cort de ses tenans de cel meismes fieu si comme sunt les bordiers et cels qui seruent as sas et as sommes et les autres qui doi uent les uix seruises si comme demener le mar le les feins et femer les terres et iteles choses.