Del plaintif. Lvi.

L e plaintif est celui qui mostre a la iustise en plaignant soi le tort qui li a este fet. cest est tenu a porsuirre la plainte que il a fete sans nule defaute. ⸿ Et si doit l en sauoir que se il se defaut desuirre sa plainte au ior qui mis li est. son auersaire qui uient a cort doit auoir congie daler s en sans ior.

⸿ Se celui qui demande droit de tort qui li a este fet ne uient a cort por suirre son droit. il semble que il se plaint folement. ⸿ Se plainte est fete de fieu lai et ueue en est sostenue. se le plaintif se defaut puis desuirre sa clamor il n en doit puis estre oi d iluec en auant.

⸿ Et se celui qui est querele se defaut. en cest cas il doit perdre la sesine du fieu qui a este mostre. ce porra l enuoier plus plenierement quant l en tretera des quereles. Le querele est celui de qui la plainte est fete a la iustise que il en face droit si com il doit. de qui pleges doiuent estre pris. et ior lor doit estre mis as premiers ples se il ia espace de xv iors ou as assises se la cause est si grant qui ele idoie estre mise.