De pleges. Lvij.

P leges sunt unes persones qui sobligent a quoi celui qui les met estoit tenu. Les uns sunt simples pleges. les autres plege et dete.

⸿ Simple pleuine est fete en ceste forme. ⸿ Je ples Richart que il rendra a Thomas xx souz a noel. en ceste pleuine doit l en sauoir que se le plege muert la pleuine muert. quer simple pleuine noblige pas les oirs.

⸿ L en doit sauoir que por simple pleuine n est nul mene a loi appareissant mes a deresne simple se la pleuine ne poet estre mostree par aucuns munimens ou par le recort de l assise ou ele fu fete. ⸿ Quant uns hons a pleui i autre destre a droit par simple pleuine se celui que il pleui muert le plege est quite.

⸿ Pleuine est autretant comme pramesse de loiaute. quer celui qui plege aucun pramet que il fera loiaument ce de quoi il le plege.

⸿ L en doit sauoir que le plege qui est troue en cort doit connoistre ou noier la pleuine. se il connoit que il fu plege il gagera la dete. et aura terme depaier la ou da uoir en cort le detor qui fera droit. ⸿ Et se le detor uient au terme et il dit que il doit la dete. il la pait. ou nans qui uaillent soient bailliez por le plege. se il n a de quoi il puisse paier tote la dete le plege la pait. ou le remanant que il ne porra paier. ou ses nans soient bailliez por la dete.

⸿ Et si doit l en sauoir que nul n est te nu agarder plus de xv iors les gages ou les nans qui li sunt baillies por la dete qui li est gagiee.

⸿ M es se il ne sunt desgagies dedens ce il les doit uendre par le commandement a la iustise pardeuant loiaus hommes et creables autresi loiaument comme se il fussent suens. et retenir ce que l en doit. et rendre le remanant a celui por qui les gages furent baillies. et ce doit estre entendu de toutes autres choses qui sunt uendues por autri dete.

⸿ L en doit sauoir que se le detor nie que il n a mis nul plege et celui qui le pleui a ia paie la pleuine. le detor sen porra deresnier par une simple loi por tant que reconnoissant ou plus forte loi ne soit encontre. ⸿ Et si deuon sauoir que tous cels qui ont fet hommage sunt tenus a plegier lor segnor de ses detes. M es nul n est tenu a plegier le de plus que la ualue de sa rente et des redeuances que il doit en un an. son cors sunt il tenus a plegier se il est en prison et suirre sa clamor et defendre soi en cort et destre a droit. et de ses amendes. et de ses nans se il sunt pris. et ce doit l en entendre se il sunt presens la ou il abesoing de plege donner.

⸿ Les resseans sunt tenus a pleuir lor segnor en la uisconte et es assises de la uisconte mes que ce soit a ses despens. et il est tenu a garder les que il ni aient damage. et se il les l ait encorre de la pleuine il ne seront ia puis tenus a pleuir le deuant que il lor aura fet gre de l autre pleuine et des damages que il auront eu.

⸿ L en dit que la pleuine retient la dete quant aucun met plege de sa dete en tel maniere que il s en oblige a estre en rendeor et que il en est plege et detor. sa mort ne deliure pas de ceste pleuine.

⸿ Et por ce doit l en sauoir que se le plege est mort. ses oirs ne sunt pas deliures de la dete. ains sunt tenus a rendre la par ce que il s en establi principal detor.

⸿ Aucun deuient plege d auenture quant l eritage ou le mueble a aucun li eschiet par quoi il est tenu a paier ses detes. si comme le fix qui a l eritage son pere ou les executors. ou les autres qui ont les chatex as mors. ou celui qui print sus soi a procu rer la besoigne a autri. ⸿ Ices ne doiuent pas respondre de la dete se il ne sunt semons a certain lieu et a certain ior si comme nos deismes auant ains aront terme soufisant de connoistre la dete ou de noier la. ne il ne s en porront pas deresnier. por ce que l en ne dit pas que la dete fust acreue par els. quer nul ne poet deresnier autrui dete. mes celui qui demande la dete la doit prouer soi tiers de iureors. ⸿ Ne por quant il porra deresnier soi que il ne fu pas plege se la pleuine est prouee par munimens ou par recort. se aucuns se mistrent en plege de toute une dete sans determiner de combien chascun pleui. se aucun d els muert ou il n a de quoi paier l autre por lui paiera.

⸿ Se uns hons plege i autre que il ne meffera a nul. se il meffet le plege doit amender ou amener celi que il ara plegie auant et fere li amender.