De semonse. Lviii.

S emonse est commandement qui est fet a aucun deuenir acort a certain terme et a certaine hore et a certain tens. ⸿ L en doit savoir que selon la diversite des causes sunt les semonses diverses. quer se aucun est semons de respondre d eritage la semonse doit au meins auoir xv iors de terme. et doit estre fete par leseriant atorne qui dira a celui que il le semont et li dira la plainte a l autre partie.

⸿ Toutes les semonses qui sunt fetes a respondre en cort doiuent estre fetes par le seriant atorne. ne ne doiuent pas estre receues se autre les fet. ⸿ Vnes semonses sunt fetes por rendre les rentes ou les seruises ou les detes as seignors cestes doiuent estre fetes au meins la nuit deuant. se la cheson n est si soudement que il ait peril en la demoree.

⸿ L en doit sauoir que les barons doiuent estre semons par le baillif ou par le uisconte. ou par le principal seriant de l espee pardeuant iiii cheualiers au meins que il en puissent porter tesmoing de la semonse. quer se il se defaillent il ne doiuent pas por ce estre menes aderesne. ains doit la semonse estre recordee par le tesmoing de cels qui ifurent ce ne seroit pas auenant que hons de si grant auctorite fust mene a deresne por ses defautes.

⸿ L en semont aucune fois les seneschax ou les preuos que il aient lor segnors a ior. et se il nes ont il le doiuent amender ou deresnier. ⸿ Et se il dient que il firent sauoir a lor segnors les semonses. les segnors a garantiront ou il se deresneront enuers els.

⸿ Toute semonse doit aportee a la persone a celui que l en semont. et se il ne poet estre troue ele doit estre fete au seneschal ou au preuost. et se il n a preuost ou seneschal l en doit aler a sa meson et fere la semonse a cels que l en trouera. ⸿ Et se celui que l en doit semondre n a point de resseantise ne il n est pas en la baillie por tant que il soit en la contree. le baillif doit enuoier ses letres au baillif en qui baillie il est resseant par celui qui est plaintif que il le face semondre contre lui. et celui doit raporter a cort les letres au baillis qui le fist semondre.

⸿ Se celui qui est querele n est en la contree. il doit au diemenche ou a une autre feste sollempnel estre apele en l iglise oiant tous que il soit as assises a respondre de ce de quoi l en se plaint de lui. si que le terme mis ait au meins xl iors.

⸿ Se aucun est semons de seruise que il ne doit pas tele semonse ne doit pas estre receue. T ote semonse qui est fete de respondre en cort doit estre receue por tant que cort soit tenue el leu ou celui qui est semons doie respondre. ⸿ Se un segnor a diuers fiex il ne poet pas semondre les hommes d un fieu a respondre en autre ne mener ses hommes a plus lointaigne cort que a celes oules quereles du uisne sunt terminees.

⸿ Semonse de seruise fere doit estre fete par chascun de la maisnie au seignor. et autresi celes de rentes paier.