De conteors. lxi.

C els sunt apeles conteors que aucuns establissent a conter por els en cort. si doiuent ses paroles autretant ualoir comme s il iessoient de la bouche a cels qui les atornerent.

⸿ Et des ce que il est establi a parler celui qui li atorne ne poet contredire chose que il die. ⸿ Ne porquant quant il uoudra il porra eschangier et establir i autre. quer ii conteors ne poet il auoir ensemble.

⸿ Se aucun establit einsi son conteor. cesti doit parler por moi ce que ie li ai enioint ie le garantirai. la iustise le doit oir et puis demander a celui qui li establi se il a dit por lui ce que il a dit. Se il le garantist il ne poet puis riens contredire que il ait dit.

⸿ Se il dit que il a dit aucune chose que il ne li enioint pas ne il ne l en garantist. le conteor lamendera en la cort. et lors iugera l en des choses qui sunt garanties.

⸿ Celui sagement establist conteor qui lestablist en ceste forme. quer nul sage homme ne doit garantir les choses qui sunt a dire. mes celes qui sunt dites s il li est auis que ce soit bien.