De ueues lxiii

L en doit sauoir que diuerses ueues sunt. Il i a ueue de fieu ueue de homme en langor. ueue de meffet. ueue domme ochis. ueue de femme despucelee. Veue de fieu est quant aucun demande en cort. que le fieu donc l en plede a lui li soit mostre a certain ior qui doit estre assis a mostrer le.

⸿ Tex ueues doiuent estre sostenues en diuerses manieres selon la diuersite des plaintes.

⸿ En quereles d eritage que uos demandes par bataille ou par establie. et generalment en tou tes les quereles en quoi il a droiture deritage doit ueue este sostenue par iiii chevaliers et par xii loiaux hommes qui ne soient pas soupechonnous.

⸿ En noueles dessesines et en to tes quereles qui sunt menees par maniere de nouele dessesine poet la ueue estre sostenue sans cheualiers par xii loiaux hommes du uisne. ne ce nenuist pas que il ait cheualiers se l en les poet auoir legierement.

⸿ Veue domme en langor doit estre sostenue par iiii cheualiers et par la iustise. et que celui qui a lui plede i soit apele a certain ior et a certain lieu la ou les essoigneors distrent que il gesoit malade. et por ce idoit estre apele lauersaire que se le malade noie que il n a pas iure langor que il puisse auoir recort de cels qui leuirent.

⸿ En tel maniere doiuent estre fetes les ueues de muldre d omicide de mehaing et de totes plaies fetes par force. ⸿ L en doit sauoir que se aucun est naure et il ne mostre sa plaie en ceste maniere il ne porra pas suirre la felonnie celui qui le n aura.

⸿ Se aucun qui a este ocis est en foi et il n a este ueu en ceste maniere l en ne por ra pas suirre de sa mort se il ne fu mostre a la iustise ains que il fust enfoi. ⸿ Et tous cels qui furent present a lenfoir doiuent estre en merci.

⸿ Se aucuns hons est acuse de tel achaison et il nie que il ne fu present. la uerite en doit estre enquise par d enqueste. et se il est mis en non sauoir. se la iustise les en acuse plus il s en porront deliurer par une deresne. ⸿ Veue de femmes despucelee doit estre fete par vii femmes ueoues ou mariees bien creables par qui le despucelement soit recorde se mestier en est.