De quereles et de lois. lxiiii.

O r nos conuient tretier des quereles et des lois par quoi les quereles doiuent estre finees.

⸿ L en doit sauoir que quereles sunt contens entre celui qui se plaint et celui de qui l en se plaint qui est demenee pardeuant la iustise. et aura terme qui est mis. de quo i les unes apartienent as persones et les autres as choses. et nos diron primierement de cels qui apartienent as persones.

⸿ Querele personel est contens demene entre le plaintif et celui de qui l en se plaint por tort qui a este fet a la persone d aucun. et de ces paroles les unes sunt par fet les autres par dit. et nos diron premierement de celes qui sunt par fet.

⸿ L en doit sauoir que querele personel qui descent de fet est de force qui a este fete a la persone d aucun si comme bateure ou plaie ou tele chose.

⸿ Di cestes quereles est l une simple et l autre criminal.

⸿ La simple est cele qui est terminee par simple loi.

⸿ La criminal est qui est terminee par loi apppareissant. et est apelee criminal por ce quele naist de tel crime que l en en doie perdre uie ou membre. ⸿ Il i a diuerses manieres de quereles criminax selon que diuerses suites en sunt mostrees qui nessent de diuers mesfes.

⸿ Il i a querele de muldre. etdomicide. et de mehaing et de truiue frainte et de despucelement de femmes prises par force. et de roberie et d assaut encharue. ou en la possession a celui qui fu assailli. et de traison.

⸿ Nos diron primierement de muldre comment et par quel forme de paroles l en en doit suirre. et toutes ces manieres de suites sunt apelees de felonnie.