De multre lxv.

S uite de muldre doit estre fete en ceste forme ⸿ Richart se plaint de Thomas qui muldri son pere felenessement en la pes deu et le duc que il est prest de prouer et de fere li connoistre en une hore de ior.

⸿ Se Thomas le nie mot a mot et il offre son gage a defendre s en l en doit premierement prendre le gage au defendeor et puis celui a l apeleor. et chascun doit donner pleges demener la loi. ⸿ Ne por quant il doiuent andui estre retenus en la prison le duc et ce que droit sera a fere la bataille lor doit estre troue par la iustise et si poet bail lier l un et l autre en uiue prison se il uelt por tant que l en baut bons pleges et bones gardes qui les gardent si feelment que il les rendront au ior de la bataille ou mors ou uis a pareillies de la bataille fere. ⸿ Se aucune force est fete dedens ce d aucun d els. le baillif en poet enquerre par son office et espeneir celui qui en sera ateint selon la desserte et cels qui les gardoient se il en sunt coupables. et por ce que celui qui les garde par la costume ancienne en doit porter la peine que cels deussent porter. se il ne les peust rendre a la iustise au ior qui lor est mis.

⸿ L en selt user en Normendie que en bataille de felonnie puis que lesgages sunt donnes nul ne doit estre garde hors de la prison au duc.

⸿ Au ior qui est assis a fere labataille se doiuent les champions offrir a la iustise ains que hore de miedi soit passee tous apparellies en lor cuiries et en lor cotes o tot lor escus et lor bastons cornus armez si com il doiuent et si comme mestier sera de drap et de cuir et de laine et destoupes.

⸿ Es escus ne es bastons ne es armeures des iambes ne poet auoir fors fust et cuir ou l un des ii se il ne poet auoir l un et l autre. il ne poet auoir nul autre instrument agreuer son auersaire que lescu et le baston et chascun doit estre rooignie pardesus les oreilles.

⸿ Ceste forme doit estre gardee en tote bataille. et si poent estre oint se il uoelent.

⸿ Quant il seront andui offert a la iustise les paroles de labataille doiuent estre recordees par la iustise. et se il semble a aucun que s les paroles de la bataille ne soient pas bien recordees ou que la bataille fu gagie par autres mous. il porront demander le recort de la bataille et il laront par cels qui furent au gagier la bataille. et quant ele sera bien recordee si soient menes el champ por combatre quatre chevaliers soient el lieu qui gardent le champ et tous les autres si soient entor.

⸿ Le ban le duc soit crie que nul de cels qui ilueques soit sor uie et sor membres ne soit nul si hardi que il face a nul des champions mal ni aide ne nuisance ne par fet ne par dit. et ce aucun fet ce il sera mis en la prison au duc et a garantira a sa uolente. apres ce soi ent les champions amenes au champ et iurent les paroles de labataille et sagenoillent andui. et s entretiegnent par les mains. l apeleor a destre et le defendeor a senestre.

⸿ L en doit demander a chescun comment il a non et se il croit el pere et el filx et el saint esperit. et se il tienent la foi que sainte yglise garde. et quant chascun aura respondu oil. le defendeor iurera en ceste forme. ⸿ Oies homme que ie tieng par la main senestre que en bauptesme Thomas te fes apeler que ie ton pere ne muldri en felonnie si m ait dex et ces sains.

⸿ Lautre iurera einsi. Oies homme que ie tieng par la main destre qui Nicolas te fes apeler en bauptesme que des paroles que tu as iurees tu es pariure si m ait dex et ces sains. ⸿ Apres il iureront les sorceries. le defendeor iurera premier que par lui ne par autre n a fet sorceries a porter en champ qui li puissent ne ne doient aidier ne a son auersaire nuire. et l apeleor iurera apres autresi.

⸿ Lors baudra l en a chascun son baston et son escu. et les iiii cheualiers qui seront el lieu por garder le champ seront entre ii tant que il aient ore auenamment. et le ban le duc sera crie derechief. quant il aront ore les cheualiers se tendront as ours del champ en iiij parties. ⸿ Se le defendeor se poet defendre iusques atant que les esteiles perent el ciel il aura uencu. et ceste forme doit estre gardee en totes batailles. mes que le serement doit estre fet des paroles de quoi la bataille fu gagie.

⸿ L en doit sauoir que nul ne poet suirre de muldre deuant que certaines enseignes soient trouees. se aucun n est qui face suite ou clamor de muldre.

⸿ Se aucun en est blasme communement il doit estre arreste par la iustise et mis en prison iusque a i an et i jor a poi de boiure et de mengier se il noffre dedens ce a sostenir d enqueste du pais se il la uelt sostenir. la iustise se doit poruoier que celui que il cuidera quen sache aucune chose de cel muldre de quel lieu que il soit uiegne pardeuant lui soudement desporueuement et sans sauoir por quoi ce est si que les amis a celui qui est en prison ne les corrumpent ou par proiere ou par loier. si doit l en apeler chescun par soi pardeuant iiii cheualiers qui ne soient pas soupechonous et qui enquierent diligeaument se celui qui en prison est fist cel muldre. et quant aura oi lor dis et mis en escrit celui qui est en prison doit estre amene pardeuant els et si li doit l en demander se il en uelt nul oster et se il imet soufisant essoigne sus aucun chose que celui die ne doit estre a riens contee. mes se lessoigne que il met sus lui n est sofisant. ce que il dira sera conte o les autres.

⸿ Celeiuree doit estre fete par xxiiij hommes au meins loiaux et ne mie sopechonnous. que amor ne haine ne doit oster de laiuree. etla semonse doit estre fete par loial seriant qui ne soit corrumpu ne par proiere ne par loier ne par amor que il ne semoigne les plus ueritables et les plus prodesommes que il porra trouer es lex et entor les liex ou le meffet fu fet et cels que l en croit qui ensachent la uerite.

⸿ Se iuree doit estre sostenue de larrecin ou de roberie loi aux iureors doiuent estre semons de la ou celui est accuse et de la ou il a conuerse et de la ou il fist le larrecin et que il sachent la uerite de ses fes et de sa uie. et doiuent estre si soudement amenez pardeuant la iustise que les amis a celui qui est accuse ne les puissent corrumpre. le baillif les doit prendre segreement pardeuant iiii chevaliers et demander a chescun par soi ce que il fet de la uie et des fes a celui qui est accuse et ce que il en croient. quant il aura oi chascun par soi celui qui est accuse doit estre amene auant et li doit l en demander auant se il uelt seonner aucun des iures qui li doiuent estre tous mostres. et se il en seonne aucun loiaument. chose que il die ne li doit nuire. lors seront les iureors apeles en commun et quant que il aront dit sera recorde par la iustise a celui qui est accuse et il doiuent reconnoistre que einsi ont il iure et sus ce doit maintenant le iugement estre fet. et ce qui sera iugie doit estre acompli sans delai. et ce que les xx diront soit garde. et se aucun des xx iurez se font de ce non sachans autretant de iureors idoiuent estre mis se l en les poet trouer. issi que par le serement de xx la uerite de cels en soit enqui se et conneu.