De iureors. lxv.

L en doit sauoir que cels sunt apeles iureors que par le serement que il font en cort sont tenus a dire uerite des quereles selon ce que il lor sera enchargie par le baillif ou par celui qui sera en son lieu.

⸿ Quant contens doit estre fine par serement de iureors. il conuient que il sachent les circonstances des contens si comme des persones entre qui le contens est et lachose de quoi il est et le lieu et la cause et la maniere. ne les anemis ne les especiaux amis ne les cousins de l une partie ne de l autre. ne nul de qui l en puisse par certaine reson auoir soupechon d amor ou de lignage ou de haine ne doiuent pas estre receus a serement ne cels qui sunt parchonniers de la querele. ne cels par qui ele est menee ne defendue. ne cels qui sunt prochains uoisins de la chose qui est demandee ne cels qui riens ne seuent de la chose de quoi le contens est. ne cels qui ne sunt du tens ne du leu que il en puissent riens sauoir. doiuent estre oste du serement. et cels qui sunt repris de pariure ou de porter faux tesmoing.

⸿ Et por ce doit l en semondre as iurees les plus prodeshommes et les plus prouchains et cels que l en croie qui miex en sachent la uerite et qui ne soient pas soupechonous n a l une partie n a l autre.

⸿ Autresi doit l en fere a cels qui sunt communement blasme de larrecin d omicide d arson ou d aucune chose criminal. de quoi il n est qui les en sieue. du meffet qui a este fet a cels qui vivent ne poet enqueste estre fete fors pas lassens a l une et l autre partie.

⸿ Plusors se seolent acorder que se un ehomme apele i autre amor et celui qui est apele velt sostenir d enqueste du pais en la forme que nos avon dite il la doit avoir. et se il est ataint par l enqueste il doit estre dampne. et se d enqueste le salue si soit delivre. et se il est mis en non savoir li apeleor poet revenir a la bataille. a ce se seolent plusors acorder por abatre les fauses plaintes ia soit ce que plusors ne le veolent pas.