D assaut. lxxi

D assaut et de pais froissie en diuerses manieres selon la diuersite des lieus. quer l en sieut d assaut de charue et d assaut de chemin.

⸿ Dassaut en meson ou d assaut en champ les suites en sunt fetes tout en une maniere. mes que l en nomme les lieus ou lassaut fu fet. et si conuient mostrer le meffet du cors et le sanc et la plaie ou il ait peril de mort ou de mehaing. la plainte selt issi estre fete.

⸿ Je me plaing de Richart qui en la pes deu et le duc massailli felenessement a ma charue o a gait porpense et me fist cest sanc et la plaie que ie mostre a la iustise. se il le noie ie ou homme por moi qui fere le puisse et doie sommes prist de fere li connoistre en une hore de ior a l esgart de la cort.

⸿ Celui qui est acuse doit noier la felonnie qui est mise en la clamor et doit demander congie de consellier soi quant il sera consellie se il noie le fet mot a mot. les gages doiuent estre receus et labataille menee si comme nos auon dit.

⸿ L en doit sauoir que en tex suites se le sanc ni est ou le meffet ou il ait peril de cors si comme de mort ou de mehaing. n est mostre a la iustise et ueu soffisamment. bataille ne doit pas estre gagie.

⸿ L en doit sauoir que se la force nara este mostree expressement en la clamor bataille ne doit pas estre gagie des suites deuantdites.

⸿ En toute suite de quoi l en tent a mort de homme doit l en dire en la plainte que de ce de quoi l en se plaint fu fet en felonnie en la pes deu et le duc

⸿ L en doit sauoir que se aucun qui soit en non aage est apele de ses membres il doit estre garde tant que il soit en aage ou estre baillie en garde si com il plera a la iustise. et si com il uerra que la chose le requiert.

⸿ Il doit entendre et aprendre diligealment la uerite en tex choses que il ait as ignorans et soit rede contre les malfetors mes que il gart lordre de droit. en ses quereles mener ne poet nul metre autre por soi se il n a apert mehaing de son cors ou se il n a passe aage que il ait uescu lx ans. es suites qui sunt fetes por crime lapeleor poet aioindre a la plainte que il firent en cort et acroistre le. mes il ne poet riens oster ne sostrere. et se il relaschent aucune chose de la clamor que il ont fete ou il delessent aucun de qui il se plainstrent lor clamor ne doit riensualeir.