De suite de trieues fraintes lxxii.

D e trieues fraintes doit l en sauoir que suite ne poet estre fete se trieues ne furent donnees en tel maniere que le recort en puist estre eu se l en le noie et se l en ne mostre sanc et plaie. la suite de trieue frainte est fete en ceste forme

⸿ Je me plaing de Richart qui en la pes deu et le duc et es trieues que il mauoit donnees masailli en felonnie. et me fist ceste plaie et cest sanc. que ie mostre. et se il le noie. ie ou autre par moi qui fere le puisse et doie sui prest de fere lui reconnoistre en une hore de ior a l esgart de la cort. se l autre le noie et il offre a defendre. les gages en doiuent estre receus. et labataille menee si comme nos auon dit.

⸿ Se l en dit que les trieues ne furent pas donnees et que por plaie ou il n a pas peril de mort ne de mehaing ne doit pas bataille estre gagie. l apeleor demant le recort de la cort ou il die que les trieues furent donnees se il ne poet estre recorde la suite ne uaudra riens. et se il est recorde la bataille doit estre gagie et l amende prise de celui qui noia les trieues.

⸿ L en doit sauoir que puis que la clamor est fete ou que la bataille est gagie en toutes suites de felonnie. l en poet parler de pes et fere la par lecongie a la iustise. et en tous contens iusqu atant que labataille soit menee a fin fors sans plus en suite de traison et de larrecin en quoi la costume de Normendie ne soefre que l en parout en nule maniere de pes puis que batailles sunt gagies. quer qui de traison ou de larrecin prent loier ou le donne il mostre bien que il n est pas quite de tex crimes.

⸿ Et qui sans congie de la iustise tretera de la pes ou la fera en cause criminal il lamendera griement a la iustise et quant que il en aura fet ou tretie ne uaudra riens.

⸿ Et si doit l en sauoir que en toutes causes criminax de quoi bataille est gagie. et l apeleor et le defendeor doiuent estre gardez en la prison leduc. et se l apeleor donne bons pleges qui le pregnent en garde et le rendent au ior qui est assigne ou mort ou uif il lor poet bien estre baillie agarder. et ce apele l en uiue prison au duc de Normendie.

⸿ Cels qui le prenent en garde sunt tenus a rendre le au ior qui lor est assigne ou mort ou vif sans essoignes et sans delai autresi comme legaolier le rendist se il fust en sa garde. et se il ne le rendent ille doiuent griement amender par lechatel. et se il est ale en tel lieu que il ne lepuissent en nule maniere rendre a la iustise ne auoir il doiuent estre en tel peine comme le conseil de l assise dira. et celui qui est fuitif doit estre apele a l assise si com il doit. se il ne uient auant le iugement il est aussi comme ueincu et doit estre forbani. et se il se rent a la iustise ancies que il soit forbani. l en en doit fere autresi comme se il fust briseor de la prison le duc et s en fust fui.

⸿ De toute la force et de touz les meffez que l en fet a celui que la iustise a mis en prison apartient il a lui diligealment a enquerre. et autresi des meffez que il a fet a autres. que cels a qui il fu baillie a garder sunt tenus a espeneir griement o lui. et se il en est ataint il ne doit ia puis estre mis en uiue prison se il plest a la iustise.

⸿ Le defendeor poet estre mis en uiue prison et ce qui a este dit de la uiue prison a l apeleor doit l en entendre de cele au defendeor. quer ceste maniere de uiue prison fu trouee par lardant malice de conuoitise par l ancienne maniere de Normendie qui fu establie por garder la pes et por eschiuer les perilx.

⸿ Nul qui suist ne qui fust sui de cause criminal ne peust en nule maniere eissir de la prison le duc iusques atant que la cause fust finee sollempnement.

⸿ Se il sunt en prison la iustise lor doit trouer mestre qui les aprengne. et armes et les autres choses qui mestier lor ont. et il sunt tenus a tout paier.

⸿ L en doit sauoir que l en ne poet suirre de meffet qui dedens l an et le ior nait este mostre a la iustise de quoi clamor nait este fete si comme ele doit. M es de muldre poet l en suirre quant certains signes en sunt mostres par loial tesmoing du pais par quo i l en sache certainement que le muldre ait este fait.