De simple querele. iiii xx. et i

O r diron de simple querele personel que l en apele simple por ce que ele doit estre terminee par simple loi qui a non deresne. Deresne est espurge de quoi aucun est querele qui est fete par son serement et par celi a cels qui li aident. et por ce que les unes des quereles sunt de fes et les autres de dis. nos diron premierement de celes de fes.

⸿ Simple querele personel de fet est contens qui est meu entre les pledeors deuant la iustise du fet qui fu fet a celui qui se plaint en ceste maniere.

⸿ Je me plaing de Thomas qui me feri de sa palme en la joe. et le tesmoing doit maintenant dire cest uoir. ie le ui et loi et prest sui de fere l esgart de la cort.

⸿ Tout tesmoing en cort laie doit porter tesmoing de ce que il a ueu et oi. et si n est pas son tesmoing soufisant se il noffre a fere l esgart de la cort.

⸿ Apres ce est tenu l autre a respondre et aura congie de consellier soi se il le demande. et quant il sera consellie. il doit noier le fet donc il est accuse et offrir le a deresnier en ceste forme.

⸿ Tel meffet ne fis ie onques. et se celui qui tesmoing se fet ne le uit ne oi. ie sui prest de deresnier men et si doit baillier son gage de deresnier sen. et la iustise le recheura et prendra pleges de fere la deresne au ior qui est mis.

⸿ En tel deresne poet auoir une essoigne et une defaute sans plus.