De simple lois. iiii xx. et ii

A u ior qui est mis doiuent les parties uenir a cort. et la loi doit estre recordee par la iustise des paroles donc ele fu gagie. lors doit celui qui est querele uenir as sains et estendre la main desus et iurer. et la iustise ou autre por lui li doit escharir la loi en ceste forme. Ce oies tu. N. que ie tel meffet ne te fis. ne ton tesmoing ne le uit n en oi. si m ait dex et ces sains.

⸿ Lors se doit leuer du serement et cels qui li aideront la loi a fere doiuent uenir as sains sans apeler. et se doiuent tere iusqu atant que la loi soit parfete. et doiuent iurer en ceste forme.

⸿ Du serement que Thomas a iure sauf serement a iure si m ait dex et ces sains.

⸿ Quant chascun de cels qui li aident auront fet cel serement il sera deliure par cele deresne. et celui qui se plaint sera en amende.

⸿ En telx plais doit l en sauoir que se le tesmoing ne dit que il l ait ueu. son tesmoing ne ualt riens. ou se il ne dit que il est prest de fere l esgart de la cort.

⸿ Et si doit l en sauoir que se celui qui fet la deresne lesse les paroles qui li sunt escharies ou il les change. sa deresne ne ualt rien. et se aucun de cels qui li aident ifaut ou lesse ou change les paroles qui li sunt escharies ou se il les conuient apeler a la deresne ou contraindre ou atraire. la deresne ne ualt riens.

⸿ Et si doit l en sauoir que selon la diuersite des persones conuient il auoir plus ou meins aides aderesnier soi.

⸿ Entre cels qui sunt per ou ueisin poet estre fete deresne soi tierce main. Mes enuers son segnor se conuient il deresnier soi sieste main en la cort son segnor. mes en plus haute cort se deresnera il uers son segnor soi tierce main. et le segnor uers son homme. quer il pledent par per. uers le seriant le roi se doit l en deresnier soi quinte main par ce que nos auon dit apert il que aueigles ne sours ne poent porter tesmoing. femmes ne poent pas ne ne doiuent estre receues a tesmoing porter ne persones loeices ne persones iointes si comme sunt le pere et le fix et le frere qui se tiegnent de si prouchain lignage. ne cels qui sunt en nonaage.

⸿ Tous cels qui sunt atains de par iure ou de foi mentie ou de faus tesmoing. et cels qui ont este ueincus en champ et toz les mescreans et cels qui sunt de male re nommee ne doiuent pas estre receus a porter tesmoing ne a aidier a deresne fere. et se il sunt amenez a tesmoing ou a deresne fere le tesmoing ou la deresne en est faussee portant que la partie por qui il uendront ne les ost.

⸿ Et si doit l en sauoir que ces simples quereles ne demandent pas xv iors de terme a respondre. mes a cel ior que l en iuendra il conuendra respondre. et si doit l en sauoir que puis que response est fete en cort se aucunes des persones se defaut ele est condampnee. ⸿ L en doit sauoir que nul ne doit estre contraint de fere loi por simple bateure que il ait fet a son seriant ne a son fix ne a son neuou ne a nul qui soit de la mesnie ne a sa fille ne a sa femme. quer l en doit entendre que il fet por chastier les.

⸿ Se celui qui est querele enchiet de la loi que il a gagie il doit amender le meffet a celui a qui il la fet. d un coup de paume v s. d un coup de poing xii d. d abatre a terre que l en apele caable xviii s. de plaie et de sanc. xxx vi s.

⸿ Ces amendes sunt deues en simples quereles et entre simple persones.

⸿ Des persones autentiques si comme de cels qui tienent franches serianteries ou qui deseruent lor fieux par seruises darmes doit l en autrement entendre. quer en ces quereles les amendes doiuent estre fetes par les armes et par le hernois donc il seruent.

⸿ Se aucun est ataint de tel querele contre cheualiers il le doit amender par plenie res armes. ce est par cheual et par le hauberc. et par lescu et par l espee et par le heaume. se celui a qui le meffet fu fet n est pas chevalier ne il n a pas fieu de hauberc. mes il desert son fieu par plaines armes. l amende li doit estre fete par i roncin et par i gamboison. et par i chapel et par une lance. et doit l en sauoir que de toutes tex gens qui deseruent lor fiex par seruises darmes telx paies lor doiuent estre fetes par tex armes com il doiuent porter arriereban le duc ou a aquiter lor fiex.

⸿ De l amende au segnor en qui cort l en plede de telx quereles doit l en sauoir que il en poet auoir xviii s. d amende.

⸿ L en selt user anciennement en Normendie que l amende de la cort ne doit pas gregnor estre que cele a celui a qui le meffet fu fet. les concordes et tex manieres de fins apartienent a la iustise a ordoner les amendes selon laesement des persones et selon la deserte.