De quereles personel de dit. iiii xx. et iii

N os auon dit de quereles personelx qui nessent de fet or diron de celes qui nessent de dit telx quereles nessent de ledenges que les uns dient as autres.

⸿ Et por ce doit l en sauoir que unes ledenges sunt criminals et autres simples.

⸿ Ledenges criminalx sunt de quoi homme auroit deserui aperdre uie ou membre se ce estoit uoir que l en dit. si comme se aucun reproche a autre larrecin ou homicide ou aucun crime de quoi il eust deserui mort ou a estre dampne. et por ce doit l en sauoir que se plainte est fete de ledenge et celui qui en est querele le connoist ou il en est ataint la iustise li doit fere griement espeneir par le chatel. et si le doit fere amender a celui que il a ledengie si que il se pregne pas le bout del nes. et die. de ce donc ie tapelai homicide ou de ce que il est ataint ie menti. quer tel crime n est pas en toi et de la bouche donc ie le dis ie menti. ce doit estre fet en assise ou es ples ou en l iglise a ior sollempnel si que il apere que le uice qui li fu mis sus n est pas en lui que il dist par sa folie por ce que celui qui li dist se reconnoisse amenchongier.

⸿ En simples quereles de ledenges se celui qui les dit en est ataint il le doit amender a la iustise. et a celui que il ledenga et il doit dire simplement. la uilanie n est pas en lui que il dist par sa folie.

⸿ Len doit sauoir que se aucun dit a autre laidenge criminal et il le reconnoist et est prest de prouer le il le porra bien prover. se la querele est tele que ele doie apartenir a lui si comme docirre son pere ou son frere. ou de larrecin qui li ait este fet. ou d aucune tel chose de quoi il soit le plus prouchain a suirre si comme nos mostrames deuant quant nos tretasmes de quereles criminaux.