De querele de possession iiii xx. et iiii

O r conuient uoier de querele de possession.

⸿ L en doit sauoir que les unes quereles de possession sunt de moebles les autres de terres. les unes simples les autres appareissans.

⸿ Querele de moeble est quant il a contens entre aucuns por aucune possession mouable. si comme se thommas demande a pierres xii d. que il li doit.

⸿ Nos apelon moeble toute possession qui poet estre remuee de lieu a autre. et toute tel possession est apelee communement chatel. si comme boef. asne. or et argent. et tex choses

⸿ Nos apelon tex choses non moebles qui ne poent estre remuees de lieu a autre. si comme i champ i pre. et tous fons de terres qui sunt communement apeles fieux.

⸿ L en apele simples quereles de possession qui sunt terminees par simples lois. quereles appareissans sunt terminees par loi appareissant ou par bataille ou par l enqueste du pais que nos apelon reconnoissant. V oion donc premierement de querele de moeble.

⸿ Querele de moeble est contens qui est meu entre aucuns pardeuant la iustise por aucune possession mouable en ceste forme.

⸿ Thommas se plaint de pierres qui a tort li deforce son asne et le tesmoing le doit tesmoigner si comme nos deismes deuant.

⸿ De tex quereles les unes sunt de detes les autres de choses adirees les autres de damage fet. les autres de pramesse. les autres de chose colue. les autres de deresnement. les autres de larrecin. D e totes ces quereles les unes sunt simples les autres appareissans. ⸿ Et por ce doit l en sauoir que toute querele qui est meue en cort de moeble qui ne passe la ualue de x s. est terminee par simple loi. mes se ele passe x s. ele est terminee par loi appareissant.