De detor por autrui. iiii xx. et vi

L es uns de cels qui sunt detors por autrui sunt par soi. et les autres par auenture.

⸿ Celui est detor par soi por autrui qui de la dete a autrui s establist principal detor. si comme se Richart s oblige por Thomas enuers. N. a paier x s. l en dit que Richart est par soi detor por autrui por ce que il octroia que il paieroit la dete por lui.

⸿ De ces quereles sunt les unes de pleuine qui retient la dete. simple pleuine est fete en ceste forme. Je pleuis Richart que il te rendra x s. a noel. ⸿ En simple pleuine doit l en saueir que quant celui qui est plege est mort la pleuine muert. quer simple pleuine ne sestent pas iusqu au oirs.

⸿ L en doit savoir que de simple pleuine n est nul ne ne poet estre mene aloi appareissant. ains sepoet deliurer par simple loi se recort ou chartre ne porte tesmoig contre lui.

⸿ Le plege qui est troue en cort est tenu a reconnoistre la pleuine ou a noier la. se il connoist que il ait este plege il gagera la dete et aura terme de paier la. ou d auoir le detor a cort por fere ce que droit sera. se le detor uient au terme et il dit que il doie la dete pait la ou ses nans qui uaillent la dete soient baillies por le plege. ⸿ Se il n a de quoi la dete puisse estre paiee. le plege la pait toute. ou le remanant que le detor ne porra paier. ou ses nans soient baillies por la dete. mes se il ne sunt desgagies dedens ce il les doit uendre par lecommandement a la iustise pardeuant prodes hom mes et creables autresi bien et autresi loiau ment comme se il fussent suens et retenir en sa dete et rendre le sorplus a celui por qui les gages estoient tenus. et ce doit estre entendu de toutes autres choses qui sunt uendues por autrui.

⸿ L en doit sauoir que se le detor noie que il ne le mist pas en plege et le plege a ia paie la dete. le detor s en porra deresnier par une simple loi portant que reconnoissant ou plus forte loi ne soit encontre.

⸿ Et si doit l en sauoir que tous cels qui tienent par hommage sunt tenus a pleuir lor segnor de toutes detes.

⸿ Mes il ne sunt pas tenus a plegier lor segnor de plus que la rente et les seruises que il li doiuent ualent par an. son cors sunt il tenus a plegier se il est en prison et a plegier le de suirre ses clamors et ses amendes. et a plegier ses nans se il sunt pris. et ce doit estre entendu se il sunt present la ou il a mestier de metre pleges.

⸿ Reseans sunt tenus a plegier lor segnor par la uisconte a ses despens. et il est tenu a garantir les que il n aient damage. et se il les lesse encorre de la peine. il ne seront pas puis tenus a plegier le deuant que il lor ait fet gre de cele pleuine et de lor de pers.