De quereles iiii xx. et viii

L es unes de ces quereles nessent de conuenant et les autres de choses retenues.

⸿ De conuenant si comme ie di tu me dois x s. por une meson que ie te fis que tu me prameis por ce. querele de chose retenue est si comme ie di tu me dois x s. que tu as receu por moi ou de moi que tu me dois por ce que tu les receus et les enconuenanchas a rendre.

⸿ Toute tele querele est donc de dete ou de rechete. D e chose de dete si comme nos auon dit auant. conuenant qui est fet auant de rechete de chose obligiee s establissent et obligent les receueors comme detors. ⸿ Nul n est establi detor por pramesse. se il n a droite cause de prametre.

⸿ Nul n est tenu apaier riens que il ait pramis a fere uilaine chose. ne celui qui le demande ne doit pas estre sostenu ains le doit espeneir.

⸿ Nul n est detor por pramesse se l en ne mostre por quoi la pramesse fu fete.

⸿ Il conuient donques uoier qui est querele de tex choses et comment. Toutes persones laies en poent estre quereles. esceptes les chatex as mors et les mariages. et les chatex as pelerins qui sunt en sollempnel pelerinage.

⸿ Sollempnes pelerinages sunt quant les pelerins se partent de lor yglises o la crois et o l eue beneete. et sunt conueez hors de lor parroisse por aler outremer ou a romme ou a saint iaque. ou en autre pelerinage par general croiserie. et autresi les croisies ont le priuilege de la crois i an et i ior. et cels qui sunt en nonaage sunt quites de ces quereles por ce que il nont pas encore discretion. quer l en ne doit pas a tex gens fere marchie sans pleges. ne il ne sunt en laie cort destreint apaier les detes a lor anceisors deuant qu il uiegnent en aage.