De possession immoeble. iiii xx. et. ix

N os auon dit de possession mouable et des quereles que en nessent. or diron de possession qui n est pas mouable.

⸿ Possession qui n est pas mouable est apelee fieu ou heritage que aucun porsiet qui ne poet estre meu de son lieu.

⸿ Les quereles de possessions qui ne sunt pas mouables nessent quant contens est meu pardeuant la iustise de tort fet qui est fet par la reson du fieu et por ce que eles nessent de diuerses lois de cort laie.

⸿ Il i a une deresne d anceisor et autre de dessesine et autre de mariage encombre et autre de doaire et autre descheance et autre de presentement diglise. et autre de fieu et d aumosne. et autre de fieu et de gage. et autre de fie et de ferme. et autre de lignage noie. et autre de sordemande. et autre destablie. et autre d eritage. et por ce que il ont diuers commencemens et sunt menees en diuerses manieres diuerses lois sunt establies a terminer les.

⸿ Les princes de Normendie les establirent por les orfelins et por les ueoues femmes et por les autres qui sunt sans conseil que il ne perdissent lor droiture par la malice des plus puissans. que les unes de ces quereles sunt finees par brief. ce funt toutes celes qui sunt nommees deuant fors d eritage deforcie qui doit estre finee par bataille.