De brief de nouele dessesine. iiij xx. et xi

L en doit sauoir que brief de nouele dessesine est establi par ces paroles.

⸿ Commande a Richart que a droit et sans delai resesisse Guillaume d une terre qui est au pont leuesque. dont il la dessesi a tort et sans iugement puis le desraain aost deuant cestui. et se il ne le fet semon le reconnoissant du uisne que il soit as primieres assises de labaillie. et fai dedens ce uoier la terre et prindre en la main le roi a la ueue.

⸿ Cest brief doit estre enuoie au seriant de l espee qui est en la baillie. et quant il l aura receu il doit asseer a celui qui se plaint ior detenir la ueue. et il doit semondre l autre partie por la ueue sostenir jusques a xx hommes des plus prouchains de la terre et des miex creables qui ne soient pas soupechonous n a l une partie n a l autre ne parent. et si doiuent estre telx que l en croie que il sachent la uerite des quereles. et pardeuant els doit la terre estre arrestee en la main au prince. uiegne ou ne uiegne l autre partie ele ne doit estre mise hors de la main au prince deuant que la querele soit finee.

⸿ Et se aucun de celx qui pledent imet main dedens ce. le cors de lui doit estre pris et retenu iusque tant que il l ait amende auenamment. et rendu ce qui a este empoirie par son fet.

⸿ Saucun uient dedens ce a la iustise de cele terre el tens que ele est arrestee en la main au prince. ior li doit estre mis as assises a quoi les autres qui pledent de la sesine sunt aiornes. et quant le reconnoissant sera coru et la sesine sera rendue a celui qui la gaaignera. lors sera ueue assise a celui qui derraainement requist lassesine. et cele enqueste sera fete a sauoir mon se celui qui ore la requiert en estoit sesi el tens que ele fu prise en la main au prince por les contens de la dessesine de celui qui estoit sesi.

⸿ Et se lenqueste dit que il enfust sesi. lasesine li sera rendue maintenant. et l autre l amendera. ⸿ Et se d enqueste dit autrement. celui qui la requiert a garantira.

⸿ L en doit sauoir que en telx quereles ne doit auoir que une essoigne et une defaute. et si doiuent estre aportees a l assise.

⸿ Se aucune des parties ne uient pas a la ueue qui est assise. sa defaute doit estre aportee a l assise plus proceine. et commandera l en que il soit iustisie por sa defaute. et se il ne uient a l autre assise ou il ne si fet essoignier l en commanddera que la ueue soit tenue et sera ior assis a tenir la por ce que il sest ia defailli ii fois que il ne poet fere. si doit la ueue estre tenue uiegne ou ne uiegne. et le reconnoissant doit estre termine a l autre assise. se il uient a l assise il ara ior de ueue. se il se defaute. a defaute sera raportee a l assise. et donc ira l en auant en la querele. si comme nos auon dit auant de ii defautes. se il se fet essoignier de uoie de cort. l essoigneor aura ior d auoir le a l autre assise. et a icele uiegne ou ne uiegne l en ira auant en la querele. quer tel querele ne poet plus estre porloignie.

⸿ Les defautes doiuent estre amendees et les essoignes sauuees et amendees se il est present en la cort ains que le reconnoissant coure por la defaute qui est fete en tel querele. puis la ueue n est pas tenu le defaillant a perdre la sesine. ne l autre la suite se il se defaut. ains a garantiront par le chatel.

⸿ Et si doit l en sauoir que se le demandeor se defaut et l autre uient a cort il s en ira sans ior et la terre qui fu prise en la main au prince por la suite a celui qui ore sedefaut doit estre deliuree au defendeor.

⸿ Et est a sauoir que unes dessesines sunt de terre. les autres d erbage. les autres de rentes. les autres de faisances. les autres de seruises. donc les bries sunt diuersez selon les diuers termes que il sunt pris.

⸿ Des terres de quoi le fruit est cuilli en aost est fet le reconnoissant du derraain aost deuant cestui por ce que il en est dessesi en icestui qui en fu sesi en l autre. ou puis que la sesine des fruiz est receue en aost. einsi est il des pastures et des herbages.

⸿ Des rentes doit estre fet reconnoissant del derraain terme a quo i les rentes sunt deues deuant cest qui desraainement passa en quoi la dessesine est fete quant la rente est contretenue. si comme se le terme est de paier la rente a noel. l enqueste doit estre fete par brief del derraain noel deuant cestui et autresi doit l en fere des autres termes.

⸿ L en doit sauoir que unes sesines sunt renouelees tous les ans et sunt apelees sesines anuex si comme de terres qui sunt coutiuees dan en an. et des rentes qui chescun an sunt deues. les autres sunt plus tardiues. si comme les aides qui chescun an sunt paiees de tiers an en tiers an. de quoi enqueste doit estre fete saueir mon se celui qui se plaint de nouele dessesine en fu sesi au derraain terme deuant ce que ele fust cuillie.

⸿ Autresi est il des faisances et des seruises qui ne uienent pas dan en an. mes d auenture ou de grace. de grace. si comme le pasnage et les autres fruitages qui uienent par la grace de deu. non pas chascun an mes aucune fois a sostenir le poeple.

⸿ Dauenture eschient seruises si comme quant escluses depiechent ou quant il conuient renoueler fosses ou raparellier mesons et tex choses qui n auienent pas chascun an mes d auenture. por quoi l en demande les seruises acostumes a raparellier les. et se il sunt noiez le reconnoissant doit estre fet du derraain pasnage deuant cestui et de la desraaine fois que les escluses furent fetes ou les fosses raparellies sauoir mon se la sesine que l en demande ore en fu lor seue.

⸿ Et autresi doit l en sauoir de toutes les choses qui ne sunt pas fetes chescun an. mes quant la nature des choses le requiert ou auenture ia uient. D essesine de pasnage est fete quant il est contretenu et autresi des choses deuantdites. de quo i l en doit sauoir que se eles auienent et eles sunt contretenues. se celui qui les doit auoir se test que il ne les mostre a la iustise dedens l an et le ior que eles li suntcontretenues nul reconnoissant de nouele dessesine ne doit puis estre sostenu se les parties ne si assentent de lor gre.