De la defaute au plaintif. iiii xx. et. xiiii

L en doit sauoir que se le plaintif se defaut. l autre s en departira sans ior. et se le plaintif uelt plus pledier contre lui il le fera semondre de nouel et einsi renouelera le plet. et celui qui est querele se defaudra autresi comme se le plet fust lors a primes commencie.

⸿ Et por ce doit l en sauoir que le plaintif perdroit sa querele par sa defaute. se le tens en quoi l en se poet plaindre de nouele dessesine. ce est dedens i an et i ior passoit dedens ce quer dedens l an et le ior que li hons est dessesi s en doit il plaindre. quer la defaute au demandeor amende le plet que il moet et le fet remaindre.

⸿ L en doit sauoir que en plet de nouele dessesine ne poet nul uouchier garant quer l en ne doit pas soufrir que nul retiegne autre possession ne par soi ne par autre ne que il la trouble par autri fol hardement. et qui que le face ille doit amender.