De lassesine d anceisor. iiii xx. et xvi.

N os diron apres de la sesine d anceisor qui doit estre tenue par brief en ceste forme.

⸿ Se tiebaut a donne pleges de suirre sa clamor semon le reconnoissant du uisne que il soit as premieres assises de la baillie a reconnoistre sauoir mon se Guillaume estoit sesi en cest an que il morut de la terre que nichole li deforce au pont audemer et sauoir mon se thommas est le plus prechain oir d auoir les escheances Guillaume la terre soit ueue dedens ce. et soit en pais.

⸿ Cest brief doit estre enuoie au seriant de l espee. qui doit au plaintif asseoir la ueue dedens la quinzaine. et semondre celui qui tient. et les iureors en certains lieus et a certaines hore. et doit arrester en la main le duc la terre ou la rente ou l autre chose que le plaintif mosterra uiegne celui qui tient ou non. ne ele ne doit iessir de la main au prince deuant que le reconnoissant soit coru.

⸿ Len doit fere en cest reconnoissant autresi comme nos auon dit de cel de nouele dessesine de quoi nos parlasmes deuant. ⸿ L en doit sauoir que nul qui ait sens ne aage n aura mie le reconnoissant par la costume du pais se il ne le prent dedens l an et le ior que la mort a l anceisor de qui il doit auoir la sesine sera seue communement.

⸿ Mes a celx qui en aage ne sunt ne nuist nule atente que il n aient cest reconnoissant. Cest reconnoissant apartient as plus procheins oirs qui ont la dignete d aisneece ou par els ou par lor anceisors. si comme les ainsnez et les filz des ainsnez. ⸿ L en doit sauoir que se aucun muert outremer ou a saint iaque ou en autre pelerinage ou en marcheandise hors de Normendie. dedens l an et le ior que la nouele de sa mort sera seue au lieu donc il parti ia soit ce que il morut lonc tens deuant. aura son oir le reconnoissant de la sesine que il auoit au ior et a lore que il parti du pais. et tant comme leir sera en non aage porra il auoir cest reconnoissant.

⸿ L en doit sauoir que le bastart ne cels qui sont en relegion ou il ont fet profession ne les enfans a cels qui sunt dampnes ne les dampnes ia soit ce que il soient les plus prochains du lignage ne poent riens reclamer de la sesine a lor anceisor. ne les meseax meimes si comme nos deismes auant el chapitre descheance d eritage.

⸿ En cest reconnoissant conuient garder se l anceisor estoit sesi. Aucun est dit sesi quant la sesine est eue ou par li ou par autre en son non ou a son besoing. par ce apert il que les fermiers et les preuos et les seneschalx et itex qui tienent les terres et en rechoiuent les iessues en autri non et a autre besoing se il est en sesine. en qui non et par qui auctorite il la tienent. quer l en doit sauoir que celui porsiet la chose par qui commandement et par qui actorite ele est tretie. de ce deismes nos deuant el brief de nouele dessesine.