De prechainnete d anceisor. xx iiij. et. xvij

I l conuient uoier que precheinete doit estre regardee a auoir les sesines as anceisors l ainsne fix est le plus prochein oir son pere. et cels qui descendent de lui. et quant cele lignie faut la seconde lignie est la plus prechaine. et einsi doit l en entendre des autres lignies et des femeles et des masles.

⸿ Et si doit l en sauoir que tant comme il n ia aucun de la premiere lignie soit masle on femmele nul qui soit de l autre ne doit auoir la sesine son anceisor. et neporquant une costume est amenee de nouel qui est contraire a l ancienne costume. quer se un homme a ii fix et l ainsne se marie et a enfans de sa femme et puis muert ancies que son pere quant le pere sera mort. le neuou qui est fix de l ainsne n aura pas la sesine de l eritage son aiel. mes les autres fix. ia soit ce que ceste costume n est gardee en nul autre cas puis que ele fu amenee auant par la force de puissans hommes. et le fix doit estre receu par procheinete de lignage a auoir toutes les autres sesines que son pere eust se il uesquist. fors en cest malues cas que nos auon dit en quoi le fix est plus pres d auoir la sesine son pere que le neuou qui est fix de l ainsne fix. et se ce sunt suers les enfans a l ainsnee qui muert ains que son pere auront la sesine lor aiel et lor aiele pardeuant lautre fille.

⸿ Se aucun demande la sesine a son anceisor et l en dit encontre que encore uit celui de qui il demande la sesine. sa mort doit estre prouee auant que enqueste en soit tenue et poet estre prouee par le tesmoing de ii hommes ou de iii prodesommes et creables qui dient par lor serement que il le uirent uif et mort ou par letres appareissantes de lordinerai et puis sera d enqueste tenue

⸿ a la ueue ne doit nul plet estre tenu mes la chose que l en demande doit estre mostree. se aucun dit encontre celui qui est en non aage. nos dison que celui est en non aage qui n a pas oncor acompli xxi an de son aage. que ia soit ce que son pere eust la sesine quant il mourut que il demande. ne por quant il ne la doit pas auoir por ce que le pere ne tenoit cele terre fors a sa uie ou a terme ou en tele maniere quele ne doit pas uenir apres lui a son oir.

⸿ Nos dison que l en doit enquerre en cest cas la maniere de la sesi ne de l anceisor et la uerite du deforcement quer les oirs ne doiuent auoir sesine de chose qui ne doie uenir a els par heritage. et ce doit estre garde en cels meismes qui ont aage. quer la maniere de tenir la chose la fet souuent uenir a autres que as oirs.

⸿ Se aucun tient autre fieu tant solement a sa uie. tele sesine ne descent pas a ses oirs.