De brief de mariage encombré iiii xx et xviii.

I l conuient apres uoier de brief de mariage encombre de quoi la deguerpie doit fere la clamor dedens l an et le ior apres la mort son mari qui l encombra. quer se ele lessoit passer l an et le ior l en ne l en respondoit iames par enqueste de brief.

⸿ L en dit que l omme encombre le mariage sa femme quant il fet en aucune maniere que ele en est hors de la sesine. neis se ele uendoit ou foriuroit se il n est gaaignie enuers lui par la loi debataille la sesine. neis se ele uendoit ou foriuroit se il n est gaaignie enuers lui par la loi debataille ou par lereconnoissant. quer se concorde en estoit fete la femme ne seroit pas tenue a garder la. quer se femme est en la poeste a l omme il poet poet fere sa uolente de lie et de ses choses et de son heritage. ne ele ne poet riens uendre tant comme il uiue ne encombrer en derriere de lui que il ne puisse rapeler. mes ele ne poet rapeler ce que il fet ne estre oie en lausence de son mari tant com il uiue. M es il doiuent estre oi ensemble de toutes les choses qui apartienent a icele.

⸿ I l i a un cas en quoi femme doit estre oie en derriere son mari. si comme se son mari la mehaigne ou li crieue les eux ou li bruise les bras ou il a acostume a tretier la uilainement. quer einsi ne doit l en pas femme chastier. et se femme est dessesie ou aucune chose li eschiet. tant comme son mari n est pas present que la demoree ne litoille l enqueste dedens l an et le ior si comme quant il est en pelerinage ou en lointaigne marcheandise ele doit estre oie ia soit ce que le mari n est pas present. mes se le mari est en la contree ele ne doit de riens estre oie sans lui.

⸿ L en doit sauoir que de mariage encombre doit le brief estre fet et corre en ceste forme. Se Mahieu. donne pleges de suirre sa clamor semon le reconnoissant que il soit as premieres assises de la baillie a reconnoistre sauoir mon se la terre que Richart li deforce est de son mariage ou heritage qui li soit escheu. et sauoir mon se Guillaume son mari qui morut en cest an li encombra et comment que la terre en cest an li encombra et comment que la tre soit ueue dedens ce et soit en pes.

⸿ Cestes ueues ont la maniere de nouele dessesine. Mes que garant ipoet estre uouchie. et celui qui est uouchie a garant poet uouchier l autre. et l autre le tiers. Mes le tiers qui est uouchie ne poet uouchier le quart. quer issi aloignereit trop le plait

⸿ Nul ne poet auoir la quarte essoigne neuochier le quart garant. ne nul qui soit fuitif ne se poet defuir iusqu a la quarte assise puis la ueue. et se il se defaut plus la sesine de la terre doit estre rendue a l autre partie.

⸿ Se aucun uent l eritage sa femme qui li soit eschaiet de ses anceisors ia soit ce que il n en out onques la sesine ele l aura dedens l an et le ior de la mort son mari. la sesine que il li encombra.

⸿ Se aucun rapele par la reson de sa femme terre qui soit uendue por ce que ele est plus prochaine du lignage a celui qui la uent se le mari la uent puis sa femme la porra rapeler empres sa mort comme mariage encombre. quer le mari ne poet pas rapeler la uente a son oes mes a sa femme. et por ce ne rapelera il pas a lui mes a sa femme.

⸿ Se aucun achate terre qui par heritage deust uenir a sa femme ou de quoi ele peust rapeler la uente por ce que ele est la plus prochaine du lignage. l achat ne remaindra pas a la femme. mes a l omme. et a ses oirs. quer il achata a soi. et ne lapela pas a sa femme. ⸿ L en doit sauoir que tant comme son mari uit la femme ne poet point auoir d eritage par achat ne par fieufement que il ne conuiegne as oirs son mari remaindre quant il sera mort.

⸿ Es achas d eritage que son mari fet n a la femme point de partie fors en borgage ou ele a lamoitie.

⸿ Se aucun heritage est donne a femme puis que ele est mariee ele le poet bien porseer.

⸿ Nule femme ne poet riens reclamer contre ses freres ne contre les oirs par reson d eritage fors sans plus ce qui li fu donne ou otroie en mariage si comme il porra estre proue par le recort du mariage. et se riens ne li fu donne ele n en porra riens reclamer par reson d eritage contre ses freres ne contre les oirs. Mes enuers suers seront eles pers.

⸿ Femmes ne poet clamer uers ses freres ne uers lor oirs plus que le tiers de l eritage. se il ia i frere ou ii ou une suer ou plus toutes les soers aront le tiers de l eritage tant solement. et se il ia iiii freres et une suer ele n aura pas gregnor partie que la partie a un des freres uaut. se cenest par lor consentement. et combien que il iait de suers. eles ne poent auoir par reson d eritage fors le tiers de l eritage.

⸿ Se il en ia une contre x freres ou contre plusors ou contre meins ele ne porra pas auoir gregnor partie que i des freres. se le pere a donne a ses filles plus que le tiers de son heritage les filx porront rapeler par l enqueste dedens l an et le ior que le pere sera mort.

⸿ Quant que les freres ou les oncles ou les neuous ou autre que pere ne mere dorront a femme en mariage doit estre garde fermement. et cels qui li donnent li doiuent garantir.

⸿ Le pere et la mere poent lor filles marier de lor chatel combien que il soient et donner a l une la partie de l eritage que toutes les autres peussent auoir ne les filx ni porront riens clamer.

⸿ Nul ne se poet plaindre que ses suers aient desauenant mariage. se il ne moet le plet dedens l an et le ior de la mort son pere qui li donna. ou dedens l an et le ior que il est uenu en aage.

⸿ Se les suers demandent a lor freres mariage et les freres les ueolent garder et marier auenamment il les auront en garde i an et i ior por marier les auenamment et lor troueront ce que mestier lor sera selon laiesement de lor heritage. et se eles poent prouer par le tesmoing de lor ueisins que ce soit en la defaute as freres que les ne sunt mariees eles auront lor partie de l eritage a marier soi si comme nos auon dit el chapitre des parties.