Si vous souhaitez signaler des coquilles dans ce passage, vous pouvez écrire à Morgane Pica (ingénieure d'étude du projet), en précisant l'URL et le titre du passage.
De doaire. iiij xx. et xix
N os auon dit de mariage qui est encombre et de la loi et des usages par quoi il doit estre rapele.
⸿ Il conuient uoier de doaire et de la loi et des usages par quoi contens qui n est de doaire doit estre fine.
⸿ L en doit sauoir que femme doit auoir par la costume de Normendie en doaire le tiers de tout le fieu que son mari auoit el tens que il l espousa. se le mari n estoit de riens sesi quant il l espousa quer son pere ou son aiel tenoit oncore tout le fieu. se il furent present au mariage ou li porchacierent et le uoudrent la femme aura apres la mort de son mari le tiers de tout le fieu que le pere ou l aiel son pere tenoient el tens que le mariage fu fet. S e il n auoient autres oirs ele aura son doaire de la partie qui afferoit a son mari.
⸿ Doaire doit estre fet apres la mort au pere ou a l aiel se ele est remese ueoue.
⸿ Se le pere ou l aiel ne s acorderent pas au mariage et le blasmerent ele n en portera apres la mort de son mari point de do aire fors de ce dont il estoit sesi quant il l espousa ou de ce qui puis li est escheu de son pere ou de son aiel. ⸿ L en doit sauoir que femme ne doit pas auoir en doaire que le tiers du fieu quel conuenant que il eust as espousailles. quer nul ne poet donner en doaire plus que le tiers de son heritage. et se il le fet quant que il en donne plus que le tiers doit estre rapele apres son deces.
1⸿ Meins que le tiers poet auoir femme en doaire selon les conuenans des espousailles quer se la femme otroia as espousailles que ele fust doee de chatel ou d une piece de terre qui fu nommee ce li doit soufire apres la mort son mari. des que ele si consenti a receuire le por son doaire as espousailles. M es se il niout fet mention du doaire ou conuenant as espousailles ele ne porra recorre fors au tiers du fieu de quoi son mari estoit sesi quant il l espousa. ⸿ L en doit sauoir que femme ne poet auoir doaire ne partie de conquest que son mari ait fet puis que il l espousa fors de borgage dont ele aura la moitie. M es de doa i re ni aura ele point. et se le mari a parchonniers el tens que il se marie se il est encore sesi de tout le fieu la femme n aura point de doaire des parties a ses parchonniers nis seles reschient a son mari puis que il lor auroit fet partie. et se le mari muert ains que il lor ait fet les parties. et li tiers de tout le fieu est donne a la femme en doere qui l en fu fet. et aura doere tant solement de la partie son mari. et les parchonniers aront puis lor partie la femme perdra le doere quilen fu fet. et ara doere tant solement de la partie son mari et non pas des autres. que ele n en poet point auoir de doere. quer nul ne poet donner ne uendre ne fieufer ne baillier en doere riens de ce que il porsiet en non d autri fors de ce sans plus qui apartient a sa partie.
⸿ L en doit sauoir que femme n a point de doere de mari donc ele est departie ia soit ce que les enfans qui sunt nez d els soient tenus por loiaux. quer cele solement doit auoir doaire qui estoit o son mari quant il morut.
⸿ Se l omme muert apres ce que il a pris femme ains que il aient couchie en un liet. la femme n aura point de doere. quer au couchier ensemble gaaigne la femme le doere par la costume de Normendie.
⸿ Leir n est pas tenu a doer la femme son anceisor fors de ce que il tient. et se le mari a uendu de son fieu ou baillie la femme en poet demander doere a celi qui le tient. ⸿ Et si deuon saueir que garant poet estre uouchie en cest plet autresi comme el plet de mariage encombre.
⸿ En ij manieres poet femme demander son doaire enuers cels qui letienent. ou par brief de doere ou par recort. ⸿ Femme demande son doere par recort. ou femme demande son doere quant la matiere de la plainte est el brief contenue et est terminee par enqueste. brief de doere est fet en ceste forme.
⸿ Se Marie donne pleges de suirre sa clamor. semon lereconnoissant du uisne que il soient as primieres assises de la baillie a re connoistre sauoir mon se Nicholas son mari estoit sesi quant il l espousa d une terre qui est a ualoignes en maniere que il l en peust doer et deust de quoi
⸿ Guillaume li deforce son doere a tort si com ele dit. tenes dedens ce la ueue de la terre. et soit en pes.
⸿ Cele enqueste doit estre fete des paroles qui sunt contenues el brief si comme nos deimes el brief de nouele dessesine.
⸿ Apres ce doit estre fete l en queste de la sesine que le pere ou la mere ou la el ou l aiele au mari ala femme auoient el tens des espousailles et s il furent au mariage et li porchacierent et se cele sesine deuoit descendre au mari par heritage. apres le deces a cele gent poet la femme demander doere enuers cels qui le tienent. ia soit ce que le mari n en fu onques sesi en sa uie.
Nicole ogier donna une partie de son heritage alabbe et au couuent de montebourc par auoir une liureison en ladite abbeie ala vie de lui et de sa femme. Ladite fame apres la mort son mari demourante en la possession paisiblement de ladite liureison demanda au filz du *dit mari son doaire. Le filz respondi que il vouloit bien que la fame eust par son doaire le tiers de l eritage que son pere auoit quant il l espousa. et que la dite liureison i fust contee principaument. La dite fame respondi que elle que ne li demandoit doaire fors de cen que il tenoit. et quant elle voudroit si demanderoit az diz abbe et couuent doaire de ce que euz tenoient. ne ne vouloit pas que la dite liureison fust conte en son doaire. Le filz respont que nuls ne puet donner a sa fame eu Normendie. ne rienz acquerre lui en nule maniere. que elle puist avoir apres sa mort que le tiers de l eritage por son doaire. Ces reisons oies d une partie et d autre. Jugie fu en l eschiquier de pasques a Roen mcc nonnante et vi que la dite livreison seroit contee a ladite femme en son doaire. comme elle n en puist porter que le tiers si comme devant est dit.