De recort de panage. cvi.

R ecort de panage doit estre fet en ceste meisme maniere. l en doit saveir que toutes les choses qui sunt fetes pardevant le roi ou pardevant le duc portant que il soit soi et autre portent recort.

⸿ Toutes les choses qui sunt fete en eschequier ou en assise ont recort de ce qui est mostre par bataille. et panage n a pas recort fors de ce qui a lui apartient.

⸿ Et si doit l en savoir que les recors qui sunt fes en eschequier ou en assise poet estre recort de totes les choses qui sunt fetes. et por ce sunt il apele sollempnel. quer tout ce qui a este fet en assise ou en eschequier doit avoir fermete quant il est recorde.

⸿ L en doit savoir que recort doit estre fet par telx persones qui en la cort le duc ne deussent pas estre ostees por fere i jugement. si com il est plus plenierement mostre devant el chapitre de jugement. ⸿ Il conuient que vii recordeors soient au meins a un acort a ce que le recort soit garde. et por ce que tout recort doit estre fet. de ce qui a este veu et oi.

⸿ Il convient a ce que le recort soit avenant que les recordeors dient que il virent et oirent ce que il recorderont. se les vi sunt a i acort. et le setiesme se descorde il ne poet pas casser le recort. et se les vi recordeors ne dient chose qui soit por celui qui demande le recort. sa demande ne vaut riens. et se les vi sunt a un lor recort est tenable portant que il ni ait plus qui soient encontre quer l en se doit tenir a la gregnor partie es recors ou il a plus de xii hommes. et ia soit ce que a fere les iugemens les persones as iureors ne poent estre seonne se ce n est en lor propres causes ou en celes donc il aient este pledeors.

⸿ L en poet bien seonner cels qui sunt soupechonnos ou par amor ou par haine ou par grace.