De Phelipe roy de Franche. Cxj.

⸿ Phelippe roi de france par la grace de deu a ses amis et a ses feels Robert archevesque de Roem et a tous les evesques de Normendie salus et amor. Sachies que des contens des patronages des yglises nos volon que enqueste en soit fete par iiii prestres et par iiii chevaliers si que l archevesque ou l evesque du lieu soient present ou aucune persone por els o lor letres pendans et o nostre baillif en certain lieu qui soit esleu en l assise par commun assens si com il lor convendra a faire.

⸿ Se le contens est entre persone de sainte yglise et persone laie ou entre ii persones de sainte yglise. comment que il soit de l iglise ou soit vacant ou non. se l arcevesque ou l evesque la donne a aucun puis que le plet est meu nos volon que les parties soient semonses a certain ior iiii prestres de par l arcevesque ou par l evesque ou par son atorne si comme nos avon dit. et iiii chevaliers par nostre baillif soient apeles au reconnoissant. et soient apeles diligealment. et puis apelent o els cels que il voudront. et la ou le plus s acorddera la remaigne le presentement de l iglise. ⸿ Nule excusation nara lieu que l arcevesque ou l evesque ne viegne a l assise ou que il ni envoit certaine persone por lui o ses letres pendans. et se treis de ces viii s acordent de chose que il aient veu la possession remaindra a celui por qui il diront et se la gregnor partie des viii qui parolent dient par lor serement que il croient fermement que celui a qui il donnent le patronage l ait eu et porsis iusques a cel tens la possession li remaindra. et pardesus ce nos volon que se celui qui dit que le patronage de l iglise apartient a lui et n en muet plet dedens vi mois apres ce que ele est escheue. l arcevesque ou l evesque aient franche poeste de donner la a qui que il voudra. Mes il n en a point de poeir se celui qui dit que il en est patron en muet plet dedens les vi mois contre l arcevesque ou contre l evesque et se il ia contens que plet ait este meu de la droiture du patronage dedens les vi mois la verite en sera enquise par iiii prestres et par iiii chevaliers examines si comme nos avon dit et recorde.

⸿ Et si vo lon que se il avient par aventure que l arcevesque ou l evesque reclaint en une ygli se la droiture du patronage por ce que il est demandeor. il ne doit pas esliere les iiii prestres qui iureront ne enquerre la verite mes i de ses veisins evesque ou arcevesque i soit par desus se li arcevesque n est de la querele.1

⸿ L en doit savoir que enquestes de patronages doivent estre fetes par chevaliers et par gentix hommes qui soient loiax et veritables et que l en croie qu il en sachent la verite par cels qui ont longuement converse el visne. En tel cas doit estre sus les defaillans plus for te iustise que es autres bries que la donnoison de l iglise neschiesce a l evesque par latente des vi mois. ⸿ Se l evesque ne vient a l assise. le baillif ne lera pas por ce a tenir la iustise de la iuree. et se il ne velt enveer les prestres a la veue quant il en sera requis le baillif rendra le reconnoissant par les lois a l ancienne costume quer desce que le roi Phelippe lor otroia tel privilege a la requeste des prelas se il lessent par lor defaute a avoir ce que il lor otroia il convendra recorre a l ancienne costume que la droiture ne soit perdue par lor demoree. et que le don de l iglise ne lor demort par latente des vi mois.

⸿ En cest brief nul vouchement de garant ne poet delaier le plet. M es se aucun a chartre ou autre droite reson par quoi il voille defendre le patronage et abatre le brief qui a este pris il doit estre oi. et ces choses vaudront se eles ont este fetes puis que la derraaine persone ifu presentee. ⸿ Se une partie du contens apartient a persone de sainte yglise et l en plede de la propriete. ce que la chartre tesmoigne doit estre garde por tant qu ele soit loial et que celui l ait fete a qui la droiture du patronage a partient.

⸿ Et si doit l en savoir que tot ce qui est contenu es chartres au prince de Normendie es quereles de patronage diglise doit estre garde fermement quer lor tesmoing valt moult a finer contens. ⸿ Se aucune condition ou aucun marchie est encontre par quoi la droiture du patronage soit venue a autre chose n en est pas la chartre au prince abatue. quer l en ne nie pas que ce qui est contenu ne soit voir. Mes puis que ele fu fete celui qui l avoit pout bien baillier a autre la droiture du patronage que il avoit par la chartre.

⸿ L en doit savoir que les chartres as princes ne doivent ne ne sunt pas tenues a rendre la sesine acels qui pledent de nule possession fieufal. Mes il defendent plenement la possession qui estoit eue par devant se aucun marchie n a puis este fet qui doie est regarde. ⸿ Et si doit l en savoir que se aucune yglise est voide par vi mois apres ce que la mort a la persone est seue quemunement l evesque du lieu la porra donner a qui que il voudra si que le patron ne le porra contredire. comment que ce soit ou par contens qui en soit menou3 par negligence du patron mes quant le plet sera fine celui qui gaaignera le patronage prendra la feelte de la persone.