De brief de fieu et de gage. Cix.

A pres ce que nos avon dit convient tretier de la querele qui est terminee par brief de fieu et de gage qui cort par ces paroles.

⸿ Se Thomas donne pleges de suirre sa clamor semon le reconnoissant du visne que il soit as premieres assises de la baillie. a reconnoistre savoir mon se la terre ou le fieu que l en li deforce est fieu a celui qui le tient ou gage engagie par la main Guillaume apres le coronnement au roi Richart. et por combien. et savoir mon se il est le plus droit oir a desgagier le gage. la terre soit veue dedens ce. selon la costume qui ore cort en Normendie. ⸿ En ceste enqueste poet avoir iii essoignes. et la quarte de voie de cort. se ele n a este fete des premieres iii quer se essoigne de voie de cort a este une des iii premieres la quarte ne sera pas receue.

⸿ En ceste querele n est pas receue veue de cors ne langor ni poet estre iuree. M es quant la derraaine essoigne sera fete la iustise doit commander as essoigneors que il aient a la premiere assise celuique il essoignent. et se il ne li ont. toz les essoigneors et lor tesmoins seront en amende. et la terre de quoi le contens est sera en prise en la main le roi. et la veue en sera assise as premieres assises.

⸿ Apres sera d enqueste du brief tenue viegne ou ne viegne celui qui est defailli. ⸿ Ceste enqueste sera tenue en cort au tresi comme nos avon dit densqueste.

⸿ L en doit savoir que ce que xi des iures diront par acort de la querele qui est contenue el brief doit estre garde fermement ne ne remaindra pas por le contredit del doziesme ne por non savoir. mes se trois l e contredient ou metent en non savoir. le dit as ix ne vaudra riens ains est mis en nonsavoir. I l apert par la forme de cest brief que vi choses i sunt enquises. ⸿ Se la chose de quoi le contens est est lessie a celui qui la tient et se cest gage. et se il fu engagie par la main Guillaume et por combien. et se celui qui le demande est le plus prouchain oir a desgagier le. et le tens passe.

⸿ L en doit enquerre par les iureors se cest fieu. et il n est pas venu a la main a cels de qui illa. il li remaindra en pes et ce lui qui la demandout amendera sa fausse clamor.

⸿ De ce apert il se aucun prent terre en fieu de celui qui l avoit en gage. l en ne doit pas por ce iugier que ce soit son fieu. quer nul ne poet en la terre que il fieufe ou que il baille metre mel lor condition a celui qui la prent que la soue nestoit. se il ne velt obligier par eschange a garder les conditions. ⸿ Se aucun apris terre en gage et il la baille a i autre en fieu. le tenant enporra vouchier garant celui qui li bailla qui li est tenu a garantir li ou a eschangier.

⸿ Et se il le velt garantir a la veue il prendra sus soi la defense. et se il enchiet de la querele il l eschangera a la value. et se il dit apres la veue que il ne li doit pas garantir. la defense remaindra au tenant. et se il enchiet il porra recorre a son garant por l eschange.

⸿ En ces quereles poet l en vouchier autretant de garans comme es autres de quoi nos avon dit devant. et chescun poet a voir ses essoignes.

⸿ L en doit demander as iureors se la terre qui est demandee par cest brief est en gage quer se ele ne fu engagie ele ne poet estre demandee par cest brief. ⸿ L en doit savoir que terre est engagie en ii manieres. quant une terre est baillie por autre ou por deniers ou por autres choses et en la fin de tel plet doit estre a aucun la chose rendue.

⸿ Et se aucune des parties noie le gage et il est apres prove par l enqueste celui qui demande le gage l aura et celui qui le detenoit perdra ce que il avoit baillie por le gage et l amenddera pardesus. et ce apartient a la dignete au prince. et les choses qui li apartienent li remaindront par la reson du gage qui fu noie. ⸿ En autre maniere est gage baillie quant terre est baillie en gage por deniers ou por i cheval ou par tel chose iusque au terme. si que dedens ce soit aquitee la dete des iessues de la terre cest gage doit estre delivre quitement au terme. et se celui qui la tient le noie et il en est ataint il le doit amender griement et est tenu a rendre quant que il en aura leue apres le terme. et totes ces choses doivent estre escleries par l enqueste de cest brief.

⸿ L en doit savoir et enquerre par qui main la chose fu engagie et se ce fu par la main Guillaume qui est nomme el brief si que quant l en saura la persone de lengageor l en sarra plus legierement qui est plus pres de desgager le. ⸿ Se la chose fu engagie par autre que par celi qui est nomme el brief tout le brief est fausse quer faussete i est trovee.

⸿ L en doit enquerre por combien la chose fu engagie. por ce que se gage est noie le pris de la raanchon remaindra au prince quant le gage sera esclerie par l enqueste se celui qui est querele reconnoist le gage. mes il dit que le gage fu baillie por plus que il n a el brief. l enqueste doit estre fete du nombre des deniers et de tous les poins qui sunt noies. et le principal reconneu celui qui en sera ataint par lenqueste l amenddera.

⸿ Il i a une maniere de gage que l en apele mortgage. mortgage est qui de riens ne saquite. si comme une terre est baillie en gage por c s. par tel convenant que quant celui qui lengage la voudra avoir il rendra les c s. ⸿ L en apele vifgage qui saquite de ses issues si comme quant l en baille une terre en gage por c s. iusques a treis ans qui doit estre rendue au chief du terme. ou quant terre est baillie iusques a tant que les deniers qui sont prestes soient quites et treiz des issues de terres.

⸿ L en doit enquerre se celui qui demande le gage est le plus prochein oir a celui qui lengaia. et se son plus prochein oir apartient a desgagier le.

⸿ L en dit que celui engage por qui et en qui non la chose est engagie.

⸿ Se aucun a baillie en gage la terre sa femme. quant ele sera morte son plus prochein oir la porra desgagier. quer le mari la tenoit comme garde par la reson de sa femme.

⸿ L en doit enquerre par cest brief se le gage fu engagie puis le coronnement au roi Richart quer se il fu devant il ne poet estre rapele.

⸿ Et l en doit savoir que ceste longue tenue souloit corre de xxx ans en xxx ans. et la terre qui estoit lessie en gage ne poeit puis estre rapelee par brief. et por ce que le terme de xxx ans n estoit pas legier a recorder le prince de Normendie volt par conseil de sages hommes que le terme de longue tenue fust merchie par lautorite d aucune chose sollempnel. ⸿ Et por ce soloit l en user que l en demandout se le gage fu engagie puis le coronnement au roi Henri.

⸿ Et por ce que le tens estoit plus lonc que il ne convient a gaaignier par longue tenue. il fu establi el tens au roi Felipe en plein eschiquier que le terme fu pris du coronnement au roi Richart.

⸿ Et por ce que il a ore plus que il ne convient a gaaignier par longue tenue il convient muer le terme par la volente au roi qui a la dignete au prince.

⸿ L en doit savoir que ceste longue te nue a leu en plusors autres quereles si comme nos diron apres. et se celui qui est querele se defaut puis que le brief est baillie et la veue est assise sa defaute doit estre raportee as assises et il doit estre apele et tenu por defaillant. et sa de faute escrite el rolle de l assise. et il doit estre iu stisie et ses choses prises. si ne li doivent estre rendues devant que il ait mis pleges destre a la premiere assise por fere droit.

⸿ Se il se defaut a l autre assise. et il ne velt venir avant. il se ra autre fois apele a l assise. et tenu por defail lant. et en ceste seconde defaute sera escrite l amende. lors commandera le baillif au seriant de la baillie que il pregne en la main le duc la terre de quoi le contens est. et por ce ne lera il pas a iustisier le par le chatel. ne il ne lera pas la terre fors par le baillif et devant que il ait mis pleges destre a droit a la premiere assise. et se les pleges ne lont as termes qui lor sunt mis il seront touz en amende.

⸿ Se il ne vient a la tierche assise la terre doit estre prise en la main au prince et si doit estre tenu iusqu a l autre assise. et la desraaine mise en escrit. ⸿ Et se il ne vient a la quarte l en doit fere de la defaute comme des au tres et doit estre la veue assise en derriere de li et estre tenue viegne ou ne viegne. et a tenir la l en doit avoir iiii chevaliers au meins qui ne soient pas sopechonnous. qui soient du visne dedens une lieue se l en les poet trover. et se l en nes poet trover l en doit apeler autres qui ne iureront pas de la querele que ele ne soit mise en non savoir mes il feront le recort de la veue se mestier en est.

⸿ En toute veue de fieu en quo i ipoet avoir el plet iii essoignes. il convient a voir au meins iiii chevaliers qui ne soient pas sopechonnous. ⸿ Quant la veue aura este tenue l enqueste sera fete a l assise apres qui sera la qui nte et chescune partie porra seonner des iureors cels que ele cuidera bien fere. et se celui qui est querele ne vient avant por ce ne remaindra pas d enqueste ne soit tenue et iuree si comme nos avon dit es autres enquestes.

⸿ Neporquant le baillif commandera as iureors ains que il iurent que nul ne viegne au serement que aucu ne des parties doie seonner par amor ne par haine ne par lignage ne par autre reson.

⸿ Se aucun va iurer contre ce. si soit espenei comme pariure. et cele partie aura la terre qui la devra avoir par le dit as iureors.

⸿ Et l en doit savoir que quant les essoignes sunt fetes ou les defautes el lieu. l en doit autresi fere deprende la terre et de tenir la veue.