De brief de fieu et de ferme Cx

D e fieu et de ferme est le brief fet en ceste forme.

⸿ Se N. donne pleges de suirre sa clamor semon le reconnoissant du visne as premieres assises de la baillie a reconnoistre savoir mon se la terre que Pierres li deforce est du fieu a celui qui la tient en ferme movable baillie par la main Guillaume. puis le coronnement au roi Richart et a quel terme et saveir mon se Nicholas. est le plus prochein eir a celui qui la bailla a ferme. et la veue soit dedens ce.

⸿ En cest brief suirre doit l en autre si fere comme en celui de fieu et de gage. ⸿ Et si doit l en saveir que se celui qui tient dit que cest fieu et il noie la ferme. se il est prove par le serement as iureors que ce soit ferme ia soit ce que il ait encore quatre ans avenir ou plus de la ferme la terre ne li remaindra pas plus por ce que il disoit par barat que ce estoit son fieu. et le roi aura le pris des anees qui sunt avenir. mes que ce lui qui ele est ara la ferme. et se les iureors dient que le terme de la ferme soit passe i an a ou plus celui qui la tient sera tenu a rendre le pris des anees.

⸿ Plusors sages hommes dient et s acordent que autreteles enquestes doivent estre fete de terres que aucuns baillent a garder si que l en doit enquerre se la terre de quoi le contens est est le fieu au tenant ou terre baillie en garde par la main de celui qui la demande ou de son anceisor. et autresi dit l en que teles enquestes poent estre miex fetes de fieu ou de ferme que de terre baillie en garde ou prestee. et toutes les autres resons qui sunt a fere de droit qui font que l en doit enquerre de fieu ou de ferme font autresi que l en enquere de garde ou de prest.

⸿ Et iasoit ce que teles enquestes ne souloient pas corre par brief. neporquant il retienent la forme de celes qui sunt fetes par brief.