De iuridition Cxi.

P or ce que en Normendie toute iuridition de cors de grans et de petis apartient au duc por ce que il sunt tenus a lui par feelte et par aliance il velt refraindre la malice as fors hommes et as puissans par le conseil de prelas et de barons si establi ii lois. donc l une est apelee establie. et l autre reconnoissant de sordemande. et si corent par brief. que cels qui sunt quereles de lor possessions fieufax poent avoir et demander contre cels qui les querelent. mes a cels sunt il denoiees qui se plaignent. S e cels qui sunt quereles ne si consentent de lor gre. et par cest brief enquert l en de la propriete du fieu et a qui ele apartient.

⸿ Les bries destablie sunt fez en ceste forme Nicholas se plaint que Guillaume li demande a tort une terre au Pont dAutou de quoi il demande l establie au duc de Normendie. lequel ia gregnor droit ou celui qui tient ou celui qui demande. la terre soit veue. M es pleges soient ancies pris de suirre l establie. et les hommes soient semons a la veue. et quant la veue sera sostenue. ior lor doit estre mis as assises. et se essoignes sunt fetes eles doivent estre saluees a la requeste de l autre partie. ⸿ Cest brief rechoit toutes essoignes et toutes defautes. et si doivent estre autresi comme el brief de fieu et de gage.

⸿ L en doit savoir que quant la tierche essoigne est fete en cort la iustise doit commander que celui qui a este essoignie soit veu si doit l en demander a l essoigneor ou il le lessa malade. et puis doit l en metre ior de voier le. et fere si comme nos avon dit el chapitre de langor.

⸿ L en doit savoir que puis que un e homme a essoignie un autre en cort il est tenu a offrir soi a tous les termes de la cort iusqu atant que celui qui a este essoignie ait iure langor. ou que il se soit pre sente a la cort por saluer les essoignes. et se aucun se defaut toutes les essoignes seront contees por defautes. quant le cors ara este veu essoigne poet estre fete de voie de cort se ele ne fu fete ne receue devant la veue. ⸿ La suite de cest brief doit estre fete en ceste forme.

⸿ Le brief destablie doit estre demande. quant un homme demande a un autre ou rente ou fieu que il porsiet. et quant celui qui est querele dit que il est prest de sostenir en l establie au duc de Normendie il doit gagier l establie et donner pleges d aporter la dedens qui nzaine. et demander terme de sostenir la veue. se il demande de l establie en la cort au prince la iustise li metra terme de la veue. et li fera brief de quoi le clerc au baillif aura vii d. et le seriant qui tendra la veue xi d. por livreison.

⸿ Il ne poet riens plus demander de cel brief ia soit ce que la veue soit tenue en divers lieux et en divers termes. et si doit premierement donner au seriant pleges de suirre le brief et puis doit estre la veue assise.

⸿ Se celui qui porte l establie se defaut de suirre son brief il et les pleges que il en donna doivent estre iustisies par le chatel par le commandement de l assise en laquele la defaute doit estre mise en escrit.

⸿ Se il ne vient a la seconde assise offrir soi a fere droit la terre de quoi le contens est sera arrestee en la main au prince aussi comme chatel. et l en ne doit lessier tel iustisement devant que il ait donne seur te de l amende et devenir a la premiere assise por fere droit.

⸿ Se il ne vient a la tierce assise la terre de quoi le contens est doit estre prise sollempnement en la main au prince et tenir a loie de la parroisse et des veisins a qui le seriant le doit noncier. quant ele ara este tenue par xl iors ou iusqu a la quarte assise. se il ne vient avant la veue doit estre assise par iugement sans celui qui se defaut. a icele veue doit avoir au meins iiii chevaliers qui ne soient pas soupechonous et xii hommes creables si que la veue puisse estre recordee par xii hommes donc les iiii au meins soient chevaliers par qui la veue puisse estre tenue se mestier en est. ⸿ Quant la veue sera fete celui qui sest defailli a la quarte assise de quoi chescune contient l espasce de xl iors il doit estre apele et la terre tenue en la main au prince. et en la quarte assise quant lore de fere les lois sera passee cest a hore de miedi. dedens quoi cels qui pledent se doivent offrir a cort. et la sesine de la terre doit estre baillie a celui qui la demande.

⸿ Se celui qui demande se defaut la defaute doit estre aportee a l assise et mise en escrit. et celui qui porte l establie s en doit partir sans ior o sa sesine que il tendra en pes puis que il a pris l establie iusqu atant que il gaaigne ou perde par jugement. ⸿ Et l en doit savoir que quant terre est prise par iugement en la main le roi se celui sor qui ele est prise la requiert. ele li doit une fois estre rendue en assise et ne mie hors. et se ele i est prise autre fois. ele ne doit estre rendue en nule maniere devant que le plet soit fine.

⸿ Se la terre est veue par jugement por les defautes a celui qui la tient ele doit estre tenue en la main au prince tant que le plet soit fine. ⸿ L en doit savoir que a fere le reconnoissant de cest brief doivent iurer les chevaliers et les autres et les autres qui sunt du lignage as chevaliers et autres hommes creables qui furent ne el visne et ont este resseans . et si doivent estre telx que l en croie que il sachent la verite de la chose. et que il dient voir de ce que l en lor demanddera.

⸿ Il iureront devant les parties si com il a este dit devant. et les parties seonneront se il veolent cels en qui il mosterront aucune reson de soupechon. ⸿ Et se l en ne poet el visne trover chevaliers. d enqueste soit tenue par autres hommes du visne qui soient de bone renommee.

⸿ Nos dison que cels sunt du visne qui sunt dedens la loee ou de la parroisse ou la terre siet ou d autres parroisses ioignant. ⸿ Et si devon savoir que se xi des iureors sacordent. les paroles as xii ne vaudront riens. et se ii contredient as x tout sera mis en nonsa veir.