De brief de sordemande. ⸿ xii.

N os diron apres de brief de sordemande qui einsi est apele. por ce que il est fet por defendre soi de rentes et de servises que les segnors du fieu demandent a tort a lor hommes. ⸿ De la defense de cest brief poent user tous cels qui tienent de terres de quoi les segnors demandent servises que il ne doivent pas. quer plusors servises sunt fez as segnors ou par amor ou par grace ou par poour qui ne doivent pas estre demande par heritage.

⸿ Et por ce establi le duc de Normendie que en tel cas poet estre brief de sordemande qui est fet en ceste forme. ⸿ Nicolas se plaint que Richart li demande a tort servises de soier ses garbes par la reson de son fieu que il tient de lui por quoi il demande l establie le duc qui a gregnor droiture. le tenant qui deforce ou celui qui demande par la reson de cel fieu. et por ce se il donne pleges de suirre son brief. semon le reconnoissant du visne que il soit as premieres assises a dire verite. et la veue soit tenue dedens ce.

⸿ Cest brief a toutes les conditions et toute la maniere de celui que nos deismes devant.