De celui qui demande partie. Cxv.

E nquestes soloient nestre en plusors cas a fere parties. quant l en requi ert parties l en doit premierement enquerre du lignage et combien celui est prochein qui les demande.

⸿ Se celui qui est querele est requis en cort il doit connoistre le lignage ou noier le et se il le noie. d enqueste doit estre semonse et tenue en la maniere que ele est tenue de novele dessesine. et si enquerra l en sa voir mon se il est si prochein a celui de qui l eritage descent que il en doie avoir partie. et se il est reconneu que il n est pas si prechain du lignage com il disoit ou il est mis en nonsavoir il remaindra sans partie.

⸿ Se aucun dit que il est ainsne et les autres le noient il sera seu par d enqueste. et tele enqueste doivent estre fetes par les veisins du lieu ou les parties furent nees. ⸿ Se l ainsne dit que il ait fet partie a ses parchonniers il la doit mostrer. et le ior de la veue doit estre maintenant assigne. et quant la veue sera fete se il dient que cele partie ne lor fu onques otroiee ou que il ne lorent onques ou que illont. Mes cele chose est de lor conquest. et ne mie par la reson d eritage. tex contens doivent estre termines par d enqueste. autresi doit l en fere se l ainsne dit que le fieu de quoi l en demande partie est membre de hauberc ou serianterie ou d autre maniere par quoi il n est pas partable. et teles enquestes sunt fetes autresi comme cele de novele dessesine.

⸿ Se l ainsne dit que le fieu de quoi l en demande partie ne li vint pas de cel anceisor de quoi l en li demande. enqueste en doit estre fete comme devant. et se l en treove que ce que il dit ne soit pas voir. la partie soit fete sans delai. ⸿ Autresi doit l en fere de toutes les choses qui sunt dites por delaier parties fors quant aucun dit que il a fine a ses parchonniers par terre et par chatex tant que il se tindrent a paies quer cest contens doit estre fine par la loi de bataille.