Denqueste de doaire. Cxvi.

D e terres qui sunt baillies en doaire solent enquestes estre fetes si comme l en a mostre devant. mes que le plet en soit commencie dedens l an et le ior que la femme est morte qui l avoit eue en doaire et celui la devoit avoir de qui possession ele fu prise se il n en out eschange devant.

⸿ Et l en doit enquerre se la femme de qui mort l en la demande l out en doaire par la reson de son mari. et savoir mon se celui qui la requiert est le plus prochein eir a celui de qui possession le doaire fu fet. et se il en a eu eschange par aucun qui garantir deust la terre. le doaire remaindra a celui qui l eschania. ⸿ Tout doaire qui est encombre par le fet ou la negligence a la femme poet estre rapele si comme nos avon dit qui que le tiegne ne ne porsiere.