De loi. Cxix.

N os diron de loi qui est fete par recort. Recort en laie cort est une loi qui est establie par les princes et gardee generalment de lor soumis. par quoi ce qui a este fet ou dit en cort est recite par le tesmoing des recordeors et ce qui a este iugie.

⸿ Unes choses sunt en cort en pledant. et unes en pronunchant.

⸿ En pledant sunt fetes toutes les choses qui sunt fetes par la reson de la querele meue. en denonchant sunt fetes les ventes les atornemens et tex choses qui sunt fetes en cort por avoir recort. ⸿ Les recordeors sunt apeles tous cels qui sunt en la cort par quoi le recort poet estre fet. si comme le prince de Normendie. l arcevesque. levesque. et toutes les persones qui ont dignite ou personage en yglise cathedral. et les abes et les priors conventuax. et les contes et les barons et les chevaliers et touz les princes qui tienent iustise et les viscontes et les serians de l espee et les hommes de grant renommee qui sunt creables par lor bone vie et par lor sens et par lor honeste.

⸿ Toutes tex persones doivent estre receues en recort se la quemune renommee n est encontre els apartement. ⸿ Les recordeors sunt tenus a iurer meesmement cels qui non fet serement au princeque il recorderont verite de la chose de quoi le recort est demande. et que il ni aioindront riens ne riens ne leront de quoi il lor soviegne. le recort des choses qui sunt fetes quant une partie les demande et l autre les sostient et cels doivent recorder ce a quoi il furent present de la chose de quoi le recort est demande.

⸿ Et por ce doit l en savoir que nul ne poet estre apele a recort se il n est present a ce de quoi le recort doit estre. et se l une partie le demande et l autre ne le velt sostenir il ne doit pas estre fet. ⸿ Il convient que la partie contre qui le recort est demande le sostiegne ou que ele mostre reson por quoi ele nel doit pas sostenir ou l autre partie aura gaaignie la querele.

⸿ Il i a diverses manieres de recors. quer les uns sunt de la cort au prince. les autres d eschequi er. les autres d assise. les autres de bataille. les autres de fieu veue. les autres de veue et del recort. les autre de foriurement. les autres de panage. les autres de mariage. ⸿ L en doit saver que de tout ce qui est fet pardevant le prince et pardevant i autre recordeor doit le recort estre garde. quer ce ne seroit pas avenant que le recort au prince soul fust demande. quer des choses qui apartienent a droit et sunt fetes en sa presence est sovent la verite seue de moult sages hommes. et einsi voudrent les princes de Normendie que il fust garde que aucun malves ne contredeist le recort por ce que il fust fet par i soul homme. et por ce que il convient que tout tesmoing doit estre en la bouche de ii au meins.

⸿ Il i a i recort deschequi er qui doit estre fet par vii recordeors au meins que il ne puissent estre oste du recort par nule resnable acheson. ⸿ Tous cels poent istre du recort qui poent estre seonne en enqueste par aperte soupechon.

⸿ L en doit savoir que celui qui demande recort doit nommer les persones que il velt avoir. et l autre partie le velt sostenir ele porra seonner cels que ele verra sopechonnos mes celui qui demande le recort ne porra seonner nul de cels que il nommera. au recort demander poent estre tous cels nommes qui presens a l eschequier a ce de quoi l en demande recort. et ce que les vii recorderont doit estre garde. se ii des vii se descordent ou il sunt nonsachant tout le recort est en doute. et celui qui le demanda perdra ce que il voloit gaaignier par le recort.

⸿ Et si doit l en savoir que quant recort est demande la chose de quoi le contens est doit estre arrestee en la main au prince et tenue tant que le recort soit fine. ⸿ Se l un des recordeors est contraire a l autre. le recort sera en doute. et autre si se il est mis en nonsaveir. le recort ne vaudra riens. quer il convient vii persones au meins concorder soi a ce que le recort vaille.

⸿ Toutes les choses qui sunt en eschiquier fetes ou en pledant ou en denonchant ou en aucune autre maniere soient tenables et aient perdurable fermete. ⸿ Recort d assise a toute la maniere a recort deschequi er. et si devon savoir que en ceste loi qui est fete par recort ne poet avoir que une essoigne et une defaute.

⸿ Recort de bataille a autele condition comme celui devant. et si doit l en savoir que par recort de bataille ne sunt recordees fors les choses qui apartienent a la bataille. si comme gagement de batailles les assignemens de termes. les maintemens de plet. la concorde ou la fin qui a este fete en toutes les autres choses qui i apartienent.

⸿ Recort de veue de fieu selt estre fet par iiii chevaliers. ou par tex persones qui ne doient pas estre ostez de iugement ne de recort si comme sunt celes que nos avon nommees devant. et qui par nule reson ne puissent estre ostees. et par viii prodeshommes qui ne puissent estre ostez par nule reson de la iuree. et ce doit estre entendu des quereles ou l en plede de la propriete de fieu si com el brief destablie et de fieu ou de gage.

⸿ Es noveles dessesines et es quereles donc l en plede de la possession et non pas de la propriete poet le recort estre fet par cels qui sunt receus a fere l enqueste. ia soit ce que ce ne soient pas chevaliers ne persones qui aient auctorite de porter recort en assise.

⸿ Et cest recort ne doit pas estre fet fors des choses qui ont este veues et mostrees quer des autres choses ne doit l en pas recevoir lor recort.

⸿ Recort de veue de cors doit estre fet en ii manieres. ou quant le baillif commande que celui qui a eu toutes ses essoignes et ses delais que il poet avoir par le cors de la terre soit veu selon la costume de Normendie si que l en sache par lui que il amera miex ou venir a cort ou a iurer langor. ou il sera despisant de droit ou quant le meffet qui a este fet a aucun ou veu. ou quant homme est navre et l en doute que il ne puisse garir sans mehaing. et l en fet aler por voier le soufisant nombre de chevaliers ou d autres persones aporter recort de la veue. De ces veues poet le recort estre fet par iiii recordeors qui ne soient sopechonnos de riens par quoi il doient estre ostes. et il doivent recorder sans plus por quoi la veue fu commandee a estre sostenue si comme de iurer langor das signer terme de veue a cort ou despit a celui qui a este veu quant au premier cas ou de mehaing ou de maniere de meffet quant au secont. D es autres fes ou d autres dis ne doit pas recort estre sostenu en telx veues.

⸿ Recort de foriurement doit estre fet quant aucun est acuse que il foriura la duchee de Normendie par sa male desserte et il le noie. en cest recort convient autretant de recordeors comme il convient a recorder que aucun ait este forbani en assise. ou il en convient au meins vii ⸿ il ne convient pas que cest recort soit fet en assise por ce que le foriurement ne fu pas en assise.

⸿ Recort de iugement qui a este fet en cause criminax doit estre fet autresi comme celui de foriurement. si comme de iureors de malves et comme il ont este pris. et de cels qui ont reconneu lor meffes pardevant la iustise et pardevant nombre soufisant de recordeors. ⸿ Recort d atornement qui a este fet hors de court doit estre fet quant aucun est malade et il requi ert la iustise que ele voist a lui et son aversaire i est apele et soufisant nombre de recordeors ce sunt vii au meins et face son atorne pardevant els si que latornement puisse estre recorde par els se mestier en est.

⸿ Recort ne poet estre fet fors de l atornement et des choses qui i apartienent. si comme des panages et des ples et des iugemens et des bans qui apartienent a panage. qui sunt fes portant que le panage ait este bani avant a certain lieu et a certain ior si comme il doit. ⸿ Cest recort poet estre fet par vii recordeors.

⸿ Et si doit l en savoir que il doit estre fet par les serians fieufez de la forest qui ne soient pas soupechous ou aucuns chevaliers. Cest recort est tenu en diverses manieres selon les diverses manieres des fores.

⸿ Recort de mariage doit estre fet par cels qui furent presens qui que il soient. ne nul de cels qui furent presens n en poet estre oste se il n est communelment renomme a trichierre.

⸿ Chascune des parties porra seonner ses parens et ses amis. cest recort ne doit estre fet entre cels qui pramistrent fors du mariage et des conditions qui i furent mises.

⸿ Si doit l en savoir que cest recort doit estre fet entre cels qui pramistrent que il acompliroient et garderoient les conditions du mariage.

⸿ Nul homme ne nule femme ne poet par recort de mariage rapeler le fieu qui a son anceisor fu baillie en mariage contre celui qui le bailla ou contre ses eirs. quer les eirs a cels qui se marient ne sunt pas tenus a respondre par le recort du mariage du fet a lor anceisor. cels qui tienent le fieu qui fu baillie en mariage a cels ou a lor anceisors poent avoir recort de mariage a defendre les envers cels qui lor demandent ou envers lor heirs.

⸿ Por ce doit l en savoir que entre persones qui firent les convenans du mariage doit corre recort du mariage por tenir les se aucune des parties les demandent ou entre lor eirs a il lieu a defendre celui qui tient. M es l autre ne le poet point avoir qui demande ce que cels tienent. ia soit ce que toz cels qui furent au mariage poent estre nommes au recort.

⸿ Et neporquant il n en doit pas plus avoir de xii mes les miex creables et les meins sopechonous i doivent estre mis iusqu a xii.

⸿ Et ia soit ce que le recort poet estre fet par vii neporquant la iustise doit fere semondre cels qui sunt nommes d une part et d autre. et retenir au recort iusqu a xii des meins sopechonous et fere garder ce que les vii recorderont.

⸿ Cest recort a nature denqueste. et se tient l en a ce que la gregnor partie des recordeors dit. ⸿ En cest recort amor ne lignage ne poent estre seonnes quer les amis et les parens sunt plus tost apeles atel tel marchie que les autres.

⸿ Aperte haine doit estre mise arriere de toute loi ou il a serement ia soit ce que femmes ne poent estre oies en nule de ces lois ne lor tesmoing receu. neporquant eles sunt oies en recort de mariage et tous les autres et parent et estrange fors cels que nos avon dit qui ne doivent pas estre ois. ⸿ Et si doit l en savoir que cest recort poet estre fet plenement par persones qui ne soient pas sopechonnoses. il doit estre fet sans cels qui ont aliance vers aucune des parties.