De lois prouable et mostrablevixx

I l ia une loi qui a non en laie cort provaille ou mostraille. par quoi aucun s esforce de prover en cort ce que il dit. Et ceste loi est fete aucune fois par le serement de i soul provant a la fiee. par le serement de ii ou a iii ou a v ou a vi ou a vii en cort laie. cele est fete par le serement de i en marchie de quoi l en demande costume a tel qui en est franc.

⸿ Et quant celui qui la demande. et ne croit pas que la chose que celui a vendue soit soue. il la poet prover por soue par son soul serement. autresi celui qui s essoigna de voie de cort en sera creu par son serement ou par le serement a celui qui l essoigna lequel son aversaire voudra. par le serement de ii est fete ceste loi si comme est essoignie de mal resseant qui poet estre sauvee par lesserement a celui qui la porta et par celui a son tesmoing. se l autre partie le velt.

⸿ Et se aucun vouche garant en cort et l en li commande que il l ait au ior que l en li met. et que il le requiere dedens ce. se l en dit que il ne le requist onques. et li et ses tesmoins dient le contraire. il porra prover par son serement et par celui a son tesmoing ⸿ Par le serement de telx est provaille fete aucune fois quant aucun est tenu de prover son fet que l autre partie noie.

⸿ Reson comment. tu me vendis i porc v s. tu les eus. ie te demant le porc. tu me respons cest voir. et ie te baillai le porc. que sui prest de prover. ceste proeve poet estre fete par toi. et par ii autres. por ce doit l en savoir que prove doit tous dis estre fete et deresne a noier le. ⸿ Nul ne doit estre receu comme principal aprover autri fet ne a deresnier le. par ce apert il en quex choses prove et deresne doient estre fetes et en queles non.

⸿ Par le serement de v hommes est prove fete quant le segnor acuse son homme que il ne li a pas paie ce que il li devoit. reson comment. tu me deusier rendre xx d. que tu me devoies. l autre dit que il les rendi il le provera soi quant. et il doit premierement iurer en ceste forme.

⸿ Ce oient touz que ie paiai a Nicholas mon segnor xx. d. que ie li devoie si m ait dex et les sains.

⸿ Le secont iurera en ceste forme. du serement queNicholas a fet sauf serement a fet si m ait dex et les sains. et touz les autres doivent iurer en tel maniere. et doivent venir a fere le serement sans estre apeles ne contrains ains doit chescun offrir soi. et ceste maniere doit estre gardee en toute prove et en toute deresne en simple plet.

⸿ Simple plet est de quoi la value ne passe pas x s. en la demande ou en quoi l en plede de simple tort fet. ⸿ L en doit savoir que prove et deresne qui est fete entre pers est fete par le serement de iii persones. vers le segnor de la cort et vers les baillis et vers les iusticiers et vers lor atornes doit estre fet et prove. et deresne par le serement de v hommes. portant que il pledent en quereles qui apartiegnent au prince. ou de l offr de la duchee. se il pledent de choses qui apartiegnent a els il sunt per quant a ce. et l en doit respondre a els comme a pers.

⸿ En simples causes de possession doivent il estre comme per. Mes es causes personelx doivent il estre comme plus haut. parce que lor persones sunt establies a fere le servise au prince.

⸿ Et se aucun plede en la cort au prince contre son homme il sunt per quant a ce. et se il convient que il face prove ou deresne contre son segnor il la porra fere par le serement de iii hommes. par le serement de vii hommes est prove fete. quant il convient oir vii hommes a prover lentencion a aucun si com il avient a prover aage. de quoi l en doit savoir que nul n est receu a la prove de son aage fors le parrain et la marraine et les parens et cels que l en croitt que il sachent le tens de sa nation por tant que il ne soient mal renommes. ⸿ Et se il nia ne parrain ne marraine ne parent ele porra este fete par les voisins portant que il ni puisse avoir autres.