De deresne. vi xx et i.

D eresne est une loi establie en Normendie par quoi celui qui est querele de simples quereles mostre que il n a pas fet ce que son aversaire li met sus. ⸿ Por ce que l en croit que chascun set miex la verite de son fet que autres. la deresne est otroiee a celui qui est querele de ce que l en li met sus par ce fausse homme ce que son aversaire dit sus lui.

⸿ Une deresne est fete par le serement a celui qui se deresne et par le serement de ii autres. et tele deresne est fete contre les pers. ⸿ Cels sunt per de quoi l un n est pas soumis a l autre par hommage ne par segnorie ne par ainsneece.

⸿ Par hommage si com uns hons est soumis a son segnor a qui il a fet hommage.

⸿ Par segnorie si comme il est soumis a la femme son segnor et et son ainsne filz et touz les puisnez sunt soumis a lor ainsne par la reson de l ainsneece et a son ainsne filz et a sa femme. et si respondent en la cort de l ainsne de simple querele. et i feront deresne par le serement de v hommes. Mes se il les traient en plus haute cort. il se deresneront par iii persones comme pers. ⸿ L en doit savoir que nul n a en sa cort mestier de tesmoing contre celui que il acuse quer la soule vois au segnor de la cort soufiet aacuser ses soumis es choses qui a lui apartienent. contre le seneschal contre le chevetaigne baillif au prince convient il fere deresne par le serement de vii hommes es choses qui apartienent au prince ou a ses baillis. contre les bedeaus et contre les bas serians est deresne fete par v hommes es choses qui apartienent a lor office.

⸿ En Normendie souloit avoir i seneschal de par le duc por amender ce que les baillis et les autres meffesoient et por fere plenier droit a chescun qui requerroit les drois le duc. et il les gardoit et rapeloit et adrechoit en l estat du pais et greuoit les malfetors et fesoit lordre de droit estre gardee en to tes choses. ⸿ Nos devon mostrer devant tot apartement comment et en quele maniere teles deresnes doivent estre fetes.

⸿ L en doit savoir que la deresne est ou dobligement ou de tort qui est fet a la persone d aucun ou por trepassement d aucune chose que celui devoit garder qui offre la deresne. ⸿ Dobligement est deresne fete en ceste maniere.

⸿ Je te donne v s. por fere une perque de mur tu m obliges a fere le. l autre noie que il nobliia onques et que il est prest de de resnier. la loi doit estre gagiee. et terme mis de fere la.

⸿ Autresi doit l en fere en detes et en choses prestees. Je te prestai v s. que tu me prameis a rendre a pasques. se celui le noie la loi doit estre gagie. l en doit savoir que toutes les fois que tel querele est menee contre cels qui sunt pers. celui qui se plaint doit avoir tesmoing ou il encharra de la querele. ⸿ De tort fet est deresne fete en ceste maniere. tu me feris de ta paume en la face que ie voil que me soit amende. se l autre le noie la deresne doit estre receue. De tres passement de ce que l en doit fere. est deresne fete en ceste maniere. Je qui estoie prevost atorne te mandai que tu fusses mardi en la cort mon segnor a respondre a ce que il te diroit se il noie que il nait este semons la loi doit estre receue. ⸿ En cest cas poet il avoir prove qui die que il fu semons. et que il fu au ior et au lieu et que il est prest de prover. sa prove doit estre receue et fete au ior.