De loi appareissant vi xx. et. ii

N os diron apres de la loi qui est appareissant apelee et de quoi la querele doit estre menee en ceste maniere en contens final.

⸿ Je me plaing de Nicholas qui me deforce une terre a Orbec que mon pere ou mon onscle a qui ie sui le plus prechain heir tint en pes puis le coronnement au roi Richart. et en ont la sesine des fruis. si comme de vin ou forment et des autres fruis que la terre selt rendre en quoi il n a nul droit contre moi. et le tesmoing doit dire . cest voir. ie le vi et oi et prest sui de prover a l esgart de la cort. ⸿ Et si doit l en savoir que quant la semonse est fete et le ior et le terme est assis as parties de pledier. se celui qui est querele se defaut il doit estre iustisie par le chatel tant que il ait mis bons pleges de venir a cort et d amender ses defautes si comme il devra et se il ne vient au secont terme qui a espace de xl iors la terre donc le contens est doit estre arrestee en la main au prince por les ii defautes si que il ne puisse manouvrer la ne cuillir les fruis.

⸿ Et se il ne vient a la tierce assise. les trois defautes doivent estre escrites et la terre prise en la main au prince par le iugement de l assise. et si doit estre dit par le seriant a loie de la parroisse que ele i est prise. et la doit l en bail lier en garde a trois des veisins.

⸿ Quant la terre aura einsi este tenue par xl iors iusqu a la quarte assise. lors doit estre commande par iugement de l assise que ele soit veue en la main au prince por les iiii defautes. et a la veue ele doit estre prise en la main au prince pardevant cels qui sunt a la veue. ne ne doit estre mise hors devant que le plet soit fine.

⸿ Quant la veue sera fete et la terre sera prise en la main au duc le defaillant doit estre apele a iiii assises apres que il viegne a respondre de ce qui a este veu et a fere en droit. et sa defaute doit estre recordee en l assise et le proces de la querele.

⸿ Quant vendra a la quarte assise apres la veue. et il aura este atendu iusqu a nonne. quant les champions seroient tenus por defaillans se il ne s offroient a cort. se il ne vient sa defaute soit amendee a la requeste de l autre partie. et tout le proces de la querele soit recorde si com il ara este fet. si soit baillie au plaintif par le iugement de l assise ce que le defaillant avoit en la terre.

⸿ En cest plet poet avoir iii essoignes ains que la terre ait este veue par iugement.

⸿ Se il a fet iii essoignes l en doit commander que le cors de les soigneor soit veu si comme nos deismes devant que l en doit voier le. apres il poet fere la quarte essoigne de voie de cort. et se il la fist ains que il eust fet les iii autres. il ne porra pas fere la quarte.

⸿ Tous iors quant l en recorde la tierce essoigne l en doit commander par iugement que le cors de l essoignie soit veu. et l essoigne de mal reseant ne porra estre fete ne de voie de cort. ne cele de voie de cort ne poet estre fete que une fois en une querele.

⸿ Quant la terre aura este prise en la main au prince. se il la requiert ains que ele ait este veue il l aura par pleges.

⸿ Et por ce doit l en savoir que se il la requiert a la iustise ains l assise et ele li est rendue en l assise il aura terme de respondre as autres assises se il ne la requiert pardevant l assise. mes en l assise il l aura par pleges et le convendra respondre en cele meisme assise. et einsi la requeste qui est fete avant li donne terme. et la negligence li toult.

⸿ Et por ce que trois essoignes de mal resseant poent estre fetes en ceste querele. se celui qui est essoignie vient apres ce. que la premiere ou la seconde sera fete. ou il se defaut. il ne porra pas fere la tierce essoigne de cele meismes maladie. quer des ce que la premiere essoigne est fete de mal resseant. les autres ii doivent estre fetes de cel meisme mal sans entrerumpre. Nequeden essoigne de voie de cort poet estre fete devant ou apres selon la volente a les soigneor.

⸿ Quant aucun aura fet toutes ses essoignes il doit avoir tous ses essoigneors et lor tesmoins. et se l aversaire requiert que les essoignes soient sauvees. la iustise doit commander que il les sauve.

⸿ Se il respont que il n envoia nule essoigne a cort. lors doivent tous les iors en quoi il fu essoignie por defaute estre tenus. et il les doit amender maintenant. et tous les essoigneors et lor tesmoins et lor pleges le doivent amender griement por lor aparte malice et por ce que il ont gabe la cort. Et si porra l essoignie apres ce fere ses essoignes autresi comme il n en eust onques nule fete. Q uant il les aura fetes et eles seront receues. il ne les porra pas autre fois noier en cort.

⸿ Et si doit l en savoir que quant l en fet une essoigne. tous cels qui firent celes de vant doivent estre presens.