37. — Mes il est autrement a entendre des injures criminelles, dont l'en ne connoist fors en haulte justice, car, ce l'acteur vient a entente par la depposicion des tesmoigns par lui produis, il peult requerre desdit et despens, c'est assavoir que le deffenseur soit par justice contraint a soy desdire en plain jugement a oye de parroisse par prinse de nez et en plein marchié, en disant en iceulx lieux que oudit acteur ne savoit point les injures que dictes avoit de luy et que, en ce disant, il avoit menty, comme de ce est en coustume faicte plus plaine mencion ou chappitre ou l'en traicte d'icellui cas.