96. — La manière comme l'en doit proceder en une veue : Premierement les parties doivent bailler leur memorial au sergent et aller au lieu ou l'en doit assembler et illec faire lire le memorial. Et après le sergent doit mettre appart des gens jusques au nombre de xii et plus, se plus en y a ; et, iceulx mis appart, le sergent et les parties et les gens doivent aller premier sur les lieux et, eulx venus la, le demandeur doit dire vers le deffenceur en la presence du sergent : « Je vous monstre ces lieux et dy que sur iceulx lieux mes predecesseurs et moy avons acoustumé prendre la rente que vous demande. Et ce vous monstre-je en la presence de ce sergent, sauves toutes mes raisons a avoir nobles ou autres gens, se le cas le doit, et en toutes autres choses. » Et est assavoir que la veue ne se peut soustenir s'il n'y a xii homme au moins.