uiuant som pere et sa mere. et li done en doere ou une partie ou tout le mariage sa mere. et li peres et li filz muerent apres. la mere aura son mariage tout quite. et la fame au filz prandra son doere seur l’eritage au pere et au fill qui sont mort. et s’il n i a point d eritage de par le filz qui morz est sa fame atandra son doere. tant que la mere son mari soit morte. en qui mariages ses doeres auoit este asis :

⸿ E se la fame a un vilain bordier est vveue. elle puet auoir la tierce partie del cortil en doere. et la borde remaindra a l oir. et se la borde est toute seule sanz cortil. La fame aura le tierz en la borde. E autresi em boriage. se uns boriois n a que une seule meson il em puet doner a sa fame la tierce part en doere.

⸿ Se aucuns est qui noit point d eritage. et il pramet a sa fame or ou argent. en doere.

⸿ Se aucuns est qui noit point d eritage. et il pramet a sa fame or ou argent en doere quant uandra a la mort a l omme. li doeres soit pris del commun chatel. et ce lui porra la fame despendre. mes se elle uelt auoir sa part des chatex. et elle uelt auoir son doere seur la partie son mari : elle l aura en ceste maniere. que li denier seront garde en la main de leaus homes tant que terres et rentes en soient achatees si qe elle uiue des oissues. et ait en doere la terre et les rentes. et apres sa mort la terre et les rentes uiegnent as oirs son mari.

⸿ il ne loise pas a vveue fame a vandre les bois qui sont en son doere. ne a estreper les uergiez. Apres la mort a la fame li doeres reuaudra au plus prouchiens oirs a celui de qui heritage il oissi. et por ce que en la cort de sainte yglise a trop grant delai. as vveues fames a auoir leur doeres ou lor mariages. par les apiaus qui sont fet de larcediacre a l euesque. de l euesque a l arceuesque. et de l’arceuesqie a l apostoile. Il a este establi par l otroi de sainte iglise. qe cez choses soient terminees en la cort laie. si qe cil qui en la cort laie sont conuaincu en leur malice. sont tenu a fere satifacion en la cort de l yglise. par paine de denier sou par penitence de cors. et si doit l en sauoir que se l em plede de doere. ou de mariage. cil contre qui lemp plede ne puet contremander que une foiz

Des orfelins

L I orfelins aura la sesine de l eritage. telle comme ses peres ot alior que il morut. ne il n est pas tenuz a respondre en deuant que il soit de tel aage qu il puisse desfandre l eritage de sa main. li aages qui est establiz a ce este xxi an. quar lors ont il discrecion et pooir.

De juree.

Q ve li puissanz ne face al non poant et al innocent outrage il est establi que par la iuree de xii leaus homes del uisne sera mostree la sesine au pere. tele comm il auoit le ior que il morut. la iuree soit fete par homes qui ne soient cosin ne home a l lune partie ne a l autre. et si n i ait nul qui ait haine uers aucune des parties Li iureeur soient eslev par la iustice.

⸿ Encore a il este establi que autresi comme force ne doit pas estre fete seur l orfelin. qui est en la garde sainte yglise. et en celle au duc. Autresi se li orfelins uelt entrer par force en autrui heritage et tenir le tant que il uiengne au tens que il en doie respondre il ne le puet pas fere. quar il ne doit pas fere force. autresi comme il ne uelt pas que force li soit fete. cinz sera requeneu par le serement as xii leaus homes del uisne. sauoir mon se ses peres en estoit sesiz. et uestuz alior que il morut. Tant comme li orfelins est en la subiection et en la garde d aucun : nule chose n est ferme qui soit fete de son heritage.

De partie de freres

L a partie entre les freres sera fete selonc la costume del pais. cheualier contre cheualier. boriois enuers boriois. vilains enuers uilains. si que la costume del pais ne soit pas lesiee. li cheualiers ainznez aura le fie de hauberc tout entier. si que il ne sera pas partiz . li autre frere auront les escheoites egalment. et se les escheoites ualent mielz que li fieuz de hauberc. les parties soient fetes lealment. selonc la ualeur des escheoites et del fieu. si que li cheualiers ainznez choisise sa partie. ov es escheoites ou el fie de hauberc. il ne sera pas partiz. ainz l aura li ainznez. tot. et se escheoites i auiennent qui uaillent mielz que li fieuz de hauberc. il sera en sa uolente de prandre les escheoites ou le fiev. de hauberc si que li fiez de hauberc ne soit point partiz. einz soit toz lessie a l un ou a l ainz ne. ou a i des autres. Les escheoites soient parties selonc les mesures del fiev. et selonc la costume del pais. et se il n ont nule escheoite. mes i seul fie de hauberc. ou la moitie d un fiev qui fu partiz. ainz que cist establissemenz fust fez qui ne puet estre partiz il remaindra al ainz ne qui a son pooir trouera a ses freres ce que mestiers lor sera tant que il leur ait assingne leur uiure. ov en mariage ou en autre maniere. Ne fiez ne hauberc ne sergenterie qui apartiegne a la segnorie au duc. ne baronie ne sera pas partie. Les vauassories et li uilain tenement. et li borgage seront parti selonc la costume del du pais.

De la partie as suers

T vit li tenement seront parti egalment se il auient que il descendent as suers. neis cil qui en autre maniere ne pueent estre parti. si que l ainznee suer aura le mestre manoir. et les autres suers tendront de lui. et se il sont trois suers ou quatre ou plus. et l lune ou les ii sont mariees et les autres non. se les mariees vvel lent auoir parz es escheoites o les autres qui ne sont pas mariees leur mariages reuendra a partie : et sera ârtoz egalment o les escheoites si que chacune mariee aura son mariee aura son mariage si comme il estoit au ior que sa suer fu mariee.

Del mariage as suers

S E aucuns oirs a une suer. il la mariera de sa partie. de la terre som pere ov de son chatel. a son pooir regnablement. et em parage. et en tenement. se elle ne le forfet par uiure maluesement. et luxurieusment. Se li peres depart en sa uie les parties a ses emfanz. et chascuns a tenue sa part longuement et en pes el uiuant au pere. les parties ne seront pas tenables apres sa mort. mes se il est auis a aucun. des freres que melleur partie li auiegne. il l aura selonc la costume del pais. se il n a tenu par lonc tens apres la mort som pere la premiere partie que ses peres li dona sanz riens clamer.

De la garde des orfelins iiii

Q vi gardera l oir orfelin que il couient estre en autrui garde. la mere ne le gardera pas. por qoi : por ce qe se elle prenoit mari et elle en auoit emfanz. li enfant por la couoitise. de l eritage ocirroient leur einzne frere. et seroie ᷠt oirs. ou li mariz meismes ocirroit som fillastre por doner a ses filz l eritage. Qui le gardera donc. le garderont si cosin. Nanil. por qoi : que il ne beent par auenture a sa mort et couoitent son heritage. parque il ocient linnocent. Por oster donc tel desleaute et por eschiuer tel cruelte fu il establi. que li orfelins spot e, ma garde a celui : a qui ses peres estoit liez par homage. Qui est cil. Ce est li sires de la terre qui l eritage ne puet auoir en demaine. Quar cil oir qui sont de noble lignage ont pluseurs oirs. et par desus ce il doiuent estre norri en buenes mesons et ensegniez d onestes ensaignemenz. et quant il sont norri es mesons lor segneurs il sont tenuz a seruir les plus lealment. et a amer les plus en uerite. E comment pueent li seig gneur hair ceus que il ont norriz. i les ameront par noreture de pure amor. et garderont seelment lor lois. et leur tenemenz : et metront les oissues de lor terres en leur auancement. Mes auarice est orandroit si montee. que li segneur gastent les biens as orfelins.

⸿ Se il auient que uns orfelins tiegne aucune chose del duc. ia soit ce que ce soit poi. et il tient plusors autres tenemenz d un autre segneur ou de pluseurs. li dus : aura la garde de l orfelin et de toz ses tenemenz et tandra tout en sa main de qui que il les tiegne. quar li duc qui doit gouerner tout le pueple doit garder et govuerner l orfelin plus lealment.

⸿ Li orfelins qui est oirs ne se doit pas marier sanz l asentement son segneur. qui le doit marier lealment ne la pucelle qui est oirs autresi.

⸿ Li fil au vauassor. et a boriois. et a uilain. et al sergent ne seront en nule garde fors en celle au sergent qui sera en la sergenterie le duc :

De la partie as neveuz

L i filz puisnez est plus prouchiens oirs en l eritageen som pere qe li emfant al ainz ne qui morut ainz que ses peres si comme il auint del roi Iehan : dengleterre. et de moult autres. E cist iugegemenz est tresfaus. E apres el tens de la guerre. quant li rois. Richarz estoit em possession de la terre les filles ne porent au oir nule partie. de nul heritage qui escheist de la mort leur pere. en contre leur neueuz qui estoient fill de leur frere.

De la partie as suers

L en tient generalement que les suers partent communement les escheoites en tel maniere. que se aucune qui soit mariee. a fet en son mariage boenes mesons ou plente vignes ou marle terres : elle choisira son mariage que elle a amende. Ne poquant il sera contez o les escheoites : si que les autres suers qui ne sont pas mariees prandront les leur parties o les escheoites. li muebles ne sera pas raportez a partie. quar chascun puet donner son mueble. a qui que il uelt. et se li muebles est communs as freres. et as suers. et aucune chose en est donee. por mueble a une des suers. ou a pluseurs en mariage. a la porte de liglise. si que li frere ou les autres suers. ne le contredient pas. i cele chose remaindra a la mariee. a toriorz : que les autres ni partiront pas ne ne sera pas raportee a partie. o les escheoites de leritage

Del mariage as suers

S E uns orfelins a suers qui soient en aage qe elles puissent estre mariees elles n atandront pas que leur frere soient en aage. einz seront mariees par leur amis : et par leur paranz ou de mueble ou d eritage. ne por quant elles auront regnables mariages. E quant li freres uandra en aage. Se li mariage ne sont resnable il seront fet tenable ou par la iostice ou par les amis. En tel maniere que se li mariages est amandez ou par marler la terre. ou par fere mesons. La ualor de l amandement n i sera pas contee. ainz gardera l en que li mariages ualoit au ior que il fut donez. a la suer a l orfelin. a la porte de l yglise. einssi auint il de Nicolas : tronsebot. et de sa suer qui fu fame. Robert de tornebu : E ce fv iugie en l asise al ual de ruuill :

Des chemins

L I conte et li baron et li cheualier qui auoient la garde des chemins en leur terres trestoient malement les marcheanz et les autres qui passoient par les chemins et toloient as innocenz. et a leur primes leur deniers. Ne ne se recordoient pas des commandememenz nostre segneur qui dit. Tu ameras tom prime si com me toi meismes. il establirent felenessement et des lealment en leur terres paages. et treuz. qui porce que il furent establiz des pieca ne pueent pas estre abatu del tout. por eschiuer tel force et tel toute. Li dus qui doit gouerner tot le pueple gardera les chemins si em pes que se aucuns asaut autre en chemin. et il li fet sanc et plaie. et il est pris. il lespeneira par les membres. et se il locit il em perdra la uie..

⸿ Se aucuns est naurez en chemin il porra prouer son sanc par bataille de sa main. ou par autre qui estoit o lui qui uit le mesfet li naurez ou ses auersaires si deliuerra par serement selonc la loi du pais et se aucuns est naurez dedanz la banliue. li malfetors se deliuerra par son serement. et par celui a xlviii homes selonc la costume. Se marcheanz qui passe par chemin doit a aucun. ne il ne sa marcheandise ne seront pris par chemin fors par la main a la iustice le roi : Mes se il doit en son ostel s i rende. Nus homs nost prandre d aucun ne por treu ne por paage fors ce qui fu pieca establi qui ne pueit estre abatv.

D assaut de porpris et de charrue iiii

S E aucuns assaut home dedanz le porpris de sa meson. et il li fet sanc o arme esmolue. il lespeneira par les menbres. se il locit il en receura mort. autresi a la charrue. La charrue doit estre en la pes le duc. et en sa desfausse. il garde cels qui la mainent. li guaengnierres ne soit pas destorbez darer. ia soit ce que aucuns ere a tort en autrui terre.

⸿ se li puissent costiue a tort la terre as moins puissant. cil qui la terre est s em plaingne. E se li guaengnierres est atainz que il oit fet tort. cil a qui la terre apartient aura sa terre aree ou semee. Ce est donc profitable chose que l areure ne soit pas destorbee. E li gaengnierres qui ara a tort autrui terre l amandera par son chatel en la cort av segneur selonc la costvme del pais.

⸿ Se quens ou barons ou autres puissanz homs uelt tolir terre par couoitise a son home ou a son. voisin. il ne le pourra pas fere. quar il sera requine par le serement de xii leaus hommes. li quiex en ot la derreniere sesine E se li puissanz hom est convaincuz de la sesine. il remeint en merci de toz ses chatex. et li autres a son heritage.

⸿ Autresi se li mains puissanz ere la terre. au plus puissant de la charue ne soit pas destorbee. Mes si comme nos deismes deuant. la sesine del derrenier aost sera queneue. par le serement a leaus homes del uisne.

De tolir autrui terre

S E aucuns puisenz plede contre son fueble home ou contre son fueble uoisin. et il li uelt tolir sa terre par plet porce que il se fie en sa richece et em force de champions. et nom pas en nostre segneur. E li poures hom est em possession de la terre. il aura le requenoissant de xii cheualiers. ou vauasseurs par leur serement. li quiex a gregneur droit en celle terre. se bataille n en a ia este gagiee. Mes se il n est em possession il n aura pas le requenoissent. E se li puissanz homs est convaincuz de la cause. il remaint en la merci le duc de toz ses chatex. por la fause demande. et au poure home remaint sa terre.

⸿ E en contre ce se li poures hom qui tient sa terre est convaincuz. et il la porsis malement et a tort celle terre. il pert la terre et remaint en la merci le duc por le deforcement.

De gage et d aumosnez et de monoierie

S E aucuns. a engagie sa terre a aucun prestre et li prestres muert. et li autres prestres qui uient apres lui est couoitens : et ueut auoir celle terre el non de l yglise : il ne puet auoir la. quar il sera requeneu par le serement de xii homes del uisne. sauoir mon se ce est l aumose de l iglise. au deuant dit prouisoire ou li fieuz au lai. Se li prestres est atainz de son tort. il remaint en la merci le duc. por le deforcement et de toz ses chatiex se il a riens en fieu lai. et li lais oit sa terre mes la laie iustice ne metra pas la main en l aumosne av prouoire. ne es choses qui apartiennent a l iglise

De fie engagie. iiiii

P luseur riche home pranent les terres as poures en gages. et les tienent par lonc tens. et puis uuelent muer le gage en heritage. ce ne pucent il fere quar rement a xii leaus hommes del uisne. sauoir mon se ce fu li heritages as poures qui fu engagiez as riches. et se cil qui tienent en sont ataint il remaindront en la merci le duc. por le deforcement. et perdront les deniers du gage que li dus aura : et la terre remaindra a ceus qui lenguagierent.

⸿ Se li plaintif sont ataint que il oient tort. il remaingnent en la merci le duc por leur fausse demande. et la terre remaint a celui qui la porsiet.

⸿ Cist troi renquenoissant sont fet par le serement a xii homes leaus qui sachent la uerite de la chose. et se dui ou trois se font non sachant de la uerite. li requenoissenz sera fez par autres qui la uerite en sachent. einssi puet l en fere iusqu a iii foiz. et se l en ne puet trouer xii leaus homes qui sachent plainnement li quiex i a droiture. l lune partie et lautre revandra au plet. se cil qui se plaint uelt pleder si que cil qui tient si tiengne iusqu a tant que la chose soit terminee par droit ou par plet ou par bataille.

De fieu et de loage

A vtresi est fez requenoissanz sauoir mon se la terre de que lem plede est heritages. ou moitoierie. ou sauoir mon se une meson ou une terre est tenue a loage. ou ce est heritages.

⸿ Porce fu il establi que autresi comme la droiture a aucun est escleriee a toriorz par bataille vaincue. est elle escleriee a toriorz par le serement a xii hommes.

Dessesine.

I ll i a i autre requenoissent. qui est fez en autre tel maniere. Ce est quant alcuns muert sanz propre oir. Ce est sanz fill ou sanz fille. et aucuns entre en son heritage qui dit que il est li plus prouchiens oirs. al mort. ia soit ce que ce n est pas uoir. il sera requenev par le serement a xii homes li quiex sera li plus prov chiens oirs al mort. iasoit ce que ce n est pas uoir. il sera requeneu par le serement a xii homes. li quiex sera li plus prochiens oirs al ṃọꝛt.celui qui morut. puis le derrenier ıoꝛ daost. et cil aura l eritage.

⸿ E se aucuns qui soit plus pro chiens oirs al mort. suefre que autres porsiee l eritage al mort par xii ı̣ọrzaolz. que il n en fet plainte par deuant la iostice. il n aura pas puis requenoissent sus celui qui tient. ainz sera la chose terminee par plet ou par bataille.

De deuestement feit sanz jugement.

N vs nost desuestir home d aucune chose fors par lordre des iugemenz. il sera donc requeneu par le serement de xii hommes del uisne. li quiex en ot la sesine el derrenier aost et si li dui ou li troi se font non sachant de la uerite de la chose. elle soit terminee pa les ix se il en seuent la uerite.

⸿ Autresi est il de la sesine au pere a l orfelin del ior que il morut et de toutes autres dessesines : quar par dessesine n est pas tolue autrui doiture quar la iuree n est pas fete de la droiture. me de la possession.

De presentement d yglise

A vtresi est il fez requenoisanz de presentement d eglise qui presenta a aucune yglise la derreniere perssone.

⸿ il est costume en Normendie que li seigneur de la terre aient es yglises la droiture del patronage. se leur pere lorent en leur terre.

⸿ Li lai se doiuent donc porueoir que il presentent a l euesque persones convenables. et li esuesques est tenuz a receuoir les se elles sont convenables.

⸿ il a souant contanz qui presenta en avcune yglise la derreniere persone. et cil contanz est finez en cort laie par le serement de xii leaus homes si comme nos deismes en dessesine.

De veue de terre.

ı l conuient en toz requenoissenz que cil qui iurent uoient les terres et les mesons. ou les caues. ou les bois ou les autres choses de qoi li seremenz doit estre fez ainz que il jurent. E autresi li champion ainz que il iurent

De brief de requenossant

N vl requenoissanz ne sera fez fors par le brief le duc. ou a sa iustice. qui est euz legierement. Quar li clerc sont establi a fere les bries qui oent les plaintes as homes. ⸿ Quant li bries est aportez au baillif le duc. el pais a celui qui se plaint. il fet le plet estre en pes iusqa la premiere assise. de sa baillie. E dedanz ce li balliz fet ueoir la terre. et metre en escrit les nons des iureeurs. seur la ueue de la terre Tuit li plet. et li non des ivreeurs sont en l assise es roles. qui sont garde bien et lealment.

D assise

L Es assises sont tenu es par les cheualiers et par les leaus homes. Chascuns doit estre iugiez par ses pers. li baron et li cheualier qui seuent les etablissemenz de la loi. et qui criement dieu pueent bien iugier li uns l autre. Mes il ne loist pas a vilain. ne a aucun del pueple. a iugier cheualier ou clerc.

De juree.

L i iurreeur soient eslev lealment par la iustice sus la ueue de la terre. tel qui ne soient del lignage a l lune partie ne a l autre. ne leur home. ne qui aient uers aus aucun signe de haine.

De cel qui tienent l assise

T roi ou quatre cheualier ou baron qui sont eslev a tenir les assises. doiuent iurer que il tandront leal iustice et garderont les establissemenz del pais et les droiz as innocenz et les rolles. et que il ne prandront pas loier del malues por greuer linnocent. ⸿ Li rolle sont garde por oser les contanz des choses qui ont este iugiees en assises.

De recort

T out ce qui est iugie en assise a recort. et ce qui est termine en aucune cort par bataille a autresi recort.

Del segneur qui ne seit droit a son home

S E aucuns sires ne uelt fere droit a son home. en sa cort il a eu le commandement le duc. ou a sa iustice de fere li droit. Li homs gagera defaute enuers son segneur. se bataille n en a este gagiee. E celle defaute iurra il o ii autres homes en la cort son segneur. et puis sera li plez en la cort le duc per a per. entre le segneur et son home.

⸿ Se li sires la terre ou le fie de que li contanz est d autre segneur que del duc. et li sires de qui il tient uelt auoir sa cort de ce plet il ne l aura pas. quar li homs mosterra la defaute en une seule cort.

⸿ E se aucuns se plaint d un autre en la cort le duc. auant qan la cort au seigneur qui home il est et iorz est asis a l une partie et a l autre par la iustice au duc. et la ueue de la terre est fete. et dedans le ior qui est assis apres la ueue de la terre. nuz ne requiert la cort. se il la demande al ior qui est asis. a pledier. il ne l aura pas. Cez defautes sont establies por la desleaute ou por la folie au segneurs.

De guerre.

N us homs nost fere guerre enuers autre. Mes qui leur fera tort si se plaignent al duc et a et a sa iustice. et se ce est cause citeaine il. fera amander le mesfet par chatel. se elle est criminnal il le fera amander par les membres.

De partie de freres

S E li freres ainz ne uelt tolir a son frere puisne sa partie de la terre partable. et dit que il donna a son puis ne deniers por quiter li sa partie de la terre qui li aferoit de quoi il ne fu onques sesiz. ce ne li uaut riens : Qar coment pot li puis ne vendre ce que il onques not. Nule partie de terre ne sera ferme entre freres. se li puisnez n a ev aucune partie de terre. et porsise la par aucun pou de tens ⸿ Se il auient que pere et mere aient filz ou filles de que li premiers ou li seconz praingne fame et ait emfanz. et il not omques nule partie de terre el uiuant de som pere et sa mere. et il muert einssi : si emfant nauront pas l eritage. leur aiel : ainz l auront li autre emfant. ia soit ce que il sont puis ne. que li peres a cez n estoit. qar li fill sont plus pres de l eritage leur pere que li neueu. il n est pas des suers autresi comme des freres. quar la fille uendra en l eritage en liev de sa mere.

De vente de bois

L i bois ne sont pas uendu el trepas de la marche fors par l assentement le duc et a sa iustice.

De terre donee

S E li freres done a son frere. ou la suer a sa suer. ou li cousins a son cosin partie de terre. et il em prant homage. se cil qui en a fet homage muert sanz oirs. li heritages ne reuendra pas a la table au segneur dont il parti mes a prochiens paranz ou cosins.

⸿ Se aucun sires done a aucun terre. por son seruise. et il en a son homage. et uns autres homs qui oit gregnor doiture en celle terre. l en emplede. et l en trauaille. et il pert celle terre par plet. li sires qui li dona ne l en respondra pas ne ne li eschangera pas a autre terre. Qar li plez napartient pas a l omme mes au segneur : qui doit garantir son don : Mes se il fu requis devant le plet de garantir son don. a son home. se il pert celle terre ou par plet ou par defaute. il est tenuz a eschangier a son home le don a la ualue.

Des omecides

S E li peres ocit son fil par mesauenture. face sa penitence que sainte yglise li eniondra. et se il locit par felonie ill ira en essil hors de la pooste le duc. et sa fame ira o lui. E quant il sera morz la fame porra reuenir a son heritage. se elle uelt quar por ce que li filz est du sanc et de la char au pere. li peres ne sera pas liurez a mort por ocirre som fill.

⸿ Se li freres ocit som frere par mesauenture. ou li cousins germain. son cousin germein. ou l lune suer l autre. ou la mere son fill ou sa fille. face la penitence qui li sera eniointe en l iglise..

⸿ Se li uns freres ocit l avtre. ou l lune suer lautre/ par felonie il en sera liurez a mort. et se il le mehangne il lespeneira par les menbres.

⸿ Se la mere ocit son fil ou sa fille par felonnie. elle ira en essil hors de la pooste le duc autre si comme li peres. Se li sires ocit son home il en receura mort. E se li homs ocit son segnor se ce n est par mesauenture il soit trainez et panduz. et se ce fu par mesauenture il en receura mort.

⸿ Se li filz ou la fille ocit son pere ou sa mere par mesauenture. face en la penitence qe seinte iglise li enioindra. et se ce fu par felonie li filz soit trainez et panduz et la fille soit arse.

Des fuitis

L i dus ne puet fere pes d omecide enuers celui qui la fet. se il n est auant reconciliez as amis a celi qui l ocist.

⸿ de larrecin de murtre de traison. darson de meson par nuit. de roberie. ne puet nule pes estre fete. o ceus qui en sont convaincu : mes se il sont pris il soient pandv. ne li dus ne sa iustice n em praingne deniers.

⸿ Ne por quant se cil malfeteur sont de noble lingnage. et aucune gent de religion les requerent a estre en leur religion. si comme a seruir toute leur uie. au temple et a lopital. il le porront auoir par l otroi a la iustice.

⸿ se li homicides puet aquerre la pes as amis a cels que il a ocis ce ne uaut riens se il n a la pes le duc. E se il a pes d une part et d autre il ait les lettres le duc. en qe sa pes soit contenue. et les port seellees a son col i an et i ior sique il soit veuz as assises. et as foires. et al marchiez del pais. si que li sergent ne le truissent sanz le seel le duc. et que tuit cil qui uerront la droiture et la leal iustice le duc. se gardent dam cheoir en autre tel homecide. Se cil homecides est quens ou barons. ou de noble lignage il ne portera pas a son col les letres. le duc einz les aura en tor lui segreement. quar tel home quiu si sont de grant non ne pueent aler seul par pais ne celeement. mes dedanz xv iorz sera leur pes seue aual le pais veillent. ou ne voeillent.. La menue gent porteront a leur col le seel le duc i an. et i ior sique il soit ueuz des uoisins. par qui testemoines li homecides sera seurs se il pert ses letres par mesauenture dedanz l an et le ior.

⸿ Ia soit ce que homecides ait la pes le duc. ne por quant ne il ne si oir nauront son heritage. que il perdi por lomecide. ainz l aura li sires del fieu. et autresi de toz les fuitis.

Des pes fuitis

L I conte et li baron et tuit li home sont te nuz par leur serement a garder la pes le duc. et leal iustice. E se aucuns est fuitis por aucun crime. et il est apelez a trois assises as marchiez del pais deuenir a l asise et as plez por fere le droit del pais. et il nose uenir a la iustice. si chatel soient pris. et soient randu a la iustice. et ses nons soit escriz es roles le duc. E sa meson soit arsse se elle est en uile. E se elle est em borc ou en cite elle soit abatue et portee hors de la uile. et arse en droit midi : Ce fet l en que tuit voient la leal iustice le duc. et aient peor eincheoir en tel perill. Li uergier au fuitif doiuent estre abatv o congniees en droit midi.

Des receteeurs

T vit se poruoient donc que il ne se consentent as fuitis ne que il ne les receuent en leur mesons : Qar se li fuitis est pris en la meson a aucun : li receterres predra tot ses chatex. et sera em peril de uie et de membres. ⸿ Quant li fuitis sera pris il sera puniz par le cors. ⸿ Se li fuitis demeure avcun pou de tens en une vile. uoiant les uoisins. toute la uile. et li sires meismes se il maint en la uile lespeneiront par perte de toz leur chatiex. et li fuitis sera pris. et puniz comme nos auons dit.

De prison.

S e uns forz hom ocit avcun et mehangne et nus del lignage ne le suit. la iustice prandra lomecide. si sera tant en la prison le duc que il se purgera par iugement deue.

De mehaing

N vs hom ne nule fame ne puisse apeler aucun mehangnie de nvle chose fors de som propre mehaing. de que li malfeteurs se purgera par iugement de fer.

De tesmoinz

N vs n est tenuz a respondre de riens se cil qui demande n a tesmoing prest au premier ior. et par son testemoine. Cil qui respont sespurgera par son serement des choses que il nie selonc la costume del pais. ou il prandra le serement de cel tesmoing. par qui testemoine il est contrainz de respondre. einssi est il de uoisin enuers uoisin. Mes il n est pas einssis entre le segneur et son homme. Quar li sires auran sanz tesmoing le serement de son homme. une foiz en l an..

⸿ Li foretier n amenront pas tesmoing. seur le mesfet de la forest. ne li preuost en leur preuoste. Ne li sergent en leur sergebteries.

De bataille

T vit cheualier et tuit sergent ont en leur terres leur iustice de bataille. en cause citeaine. et quant li champions sera uaincuz il auront lx solz. et i denier de la recreandise. et la iustice de leur larrons auront il et leur chatiex.

D essoines

P let et bataille pueent estre essonie. ou respoitie par trois foiz. a chascune foiz par ii homes. E apres le tierz respit. se cil qui tient ne uient auant. cil qui demande sera mis en possession de la chose. et en aura les issues en ses propres us. E se li demanderres ne uient auant. cil a qui il demande tandra la posession qui li sera aiugiee. a tor iorz por la defaute av plaintif.

⸿ La quarte essoine puet estre fete mes ce auient pov. par maladie de langor qui dure par lonc tens. E celle langoꝛ sera ueueu par leaus hommes. sauoır mon se cil qui gıst en son lıt se faınt que ıl soıt malades: E celle lan gor sera ueue par leaus hommes. sauoir mon se cil qui gist en son lit. se faint que il soit malades e celle langor doit l en atendre i an. et lors uiegne se il puet. ov il enuoit responssaill.. ⸿ Cil par qui requenoissanz doit estre fez ne pueent estre essoine. que une foiz. et li seremenz as essonieors en est pris. ill i a pluseurs manieres d essonier por maladie qui est prise en uenant a la cort por prison por guerre. por pelerinage de sainz. por estre hors del pais por les besoignes temporeus. Li essonieeur diront la maniere de l essoine. mes il ne nomeront en asise ne ior ne terme : en avtre corz il nomeront ior si comme a viii iors ou a xv selonc la costume del pais. ⸿ E est del malade tant sevlement.

De maladie

E se aucuns est malades iusqual cel terme. il puet essoniez estre por la maladie iusqu a la tierce foiz. et lors il sera ueuz par leaus hommes se il est detenuz par maladie de langor

De delaiemenz

D E l emprisone sera atanduz li termes tant que il puisse renablement issir de ṗsons : de guerre atandra l en iusqu a tems de pes ov de triues. de pelerinage doutre mer an. et iorz : De pelerinage de rome an et ̣ ịoṛzii mois. et ii iorz. de pelerinage de saint iaque ii mois. et ii iorz. Autresi de saint Gile i mois et i ior. et autresi des autres selonc la maniere du pelerinage.

⸿ Se aucuns est por les choses temporex en espangne. il aura terme de reuenir ii mois et i ior. Se il est en engleterre il aura xli ior.

D assises

S E aucuns est semons de pledier en cort. a conte ou a autre cheualier et il le conuient a cel ior meisme pledier por autre chose en la cort le duc ou fere i requenoissant. il se porra essonier por ceste cause en la cort son segnor.

⸿ Tandis comme assise sera tenue en aucune contree. ou en aucune visconte. nus hom. ne soit tant hardiz que il tiegne plez en sa cort. Quar li baron. et li autre preudome se doiuent assembler a tenir les assises et a fere leaus iugemenz.

De seruises

L i freres ne doit pas seruice a son frere ne li cousins germains li uns a l autre. ne nul de la ligniee iusqu a tant que il uiegnent al qart degre. selonc la maniere del tenement et del pais. sera mis cil seruises sus la terre.

De garanz

L i segneur garantiront a leur puisnez leur terres. de toutes querelles autresi comme leur demaine. ne leur demanderont por ce rien que il ne doient. Li oir garantiront autresi as vveues leur doeres. et leur mariage autresi comme lor demaine.

De relies.

Q vens releuera sa contee si comme contee. et li baron sa baronie de leur segnors selonc la coutume du pais. le fieu de hauberc si comme il doit. Li autre tenemen seront releue par acres et chascune acre de terre dorra xii deniers . et del chevel manoir v solz. Li autre home del pueple relieuent por la mort leur peres et leur meres. ou as oirs de la terre les tenemenz que il tiennent en leur main propre. et se aucuns tient d els il aidera a son segneur a paier son relief. et li dorra demi relief. ce sont vi deniers de chascune acre.

D aides

S E aucun sires fet de son einz ne fill cheualier. si home li doiuent aidier autresi comme de demi relief. et autresi a marier sainz nee fille. nus ne denant a ses homes tailles ne toutes fors par les letres au duc et par son ostroi : Ce est asauoir por grief de guerre ou por autre droite cause ou por cez choses que nos auons dites.

D usures

S E aucuns vseriers muert. et il est atainz par le serement de xii de ses uoisins. que il ait maintenu. vsure dedanz l an. et le ior que il muert. li dus aura toz ses chatiex. en qui terre que li useriers maingne. sa fame ne si emfant nauront riens de ses chatex. ne li prouoire plus. mes li heritages remaindra a la fame et as enfanz.

De prandre fame a force

S E aucuns prant par force une pucelle en ville ov en champ ou em bois. il conuient que elle crit se elle puet. si que li uoisin qui orront le cri prainggnent le malfeteur se il pueent. E des que la mechine porra : elle doit aler a la premiere iustice le duc que elle porra trouer. et la iustice fera ueoir la meschine et sa bleceure par preude fames. et leaus qui sachent quenoistre se elle a este prise a force : Quant li malfeteurs sera conuaincuz en ceste maniere de sa maluestie. par le serement a preude fames et a leaus. il se purgera par iugement deue se il ueut. E se il perist il lespeneira par les membres.

⸿ E se il ueut prandre la mechine a fame einz que il soit convaincuz de sa malice. il ait la fame se li parant a la mechine et elle le vvelent.

⸿ Se la mechine a aucun uelt auoir son ami a mari. si a force que elle li dit que il l a prise par force. et elle est ueue par preude fames que elle n est point bleciee. et elle ofre a prouer le en iugement. elle ne sera puisoie. einz sera batue et chaciee hors. porqoi : por ce que ill i a moult de fames. si plaines de maligne esperit que elles uovdroient bien metre leur uies en auenture. par si que elles poissent ocirre leur garçons que elles heent.

⸿ Se aucuns prant par force la fame son uoisin. la fame nel prouera pas Mes il lira a son uoisin a prouer le par bataille se il uelt. et se il est proue il lespeneira par les menbres E se li mariz est uaincuz il paiera lx solz. et un denier. por la re q̣ueṇoıssẹnc̣e creandise. et sa fame soit fustee. et chaciee hors. et par de la loi de testemoine. mes il li loise bien a defandre sa uie en cause criminal. chascuns qui est uaincuz par bataille pert loi de testemoine.

⸿ Se aucuns prant a force famevveue. et eriz en est oiz. elle ne prouera pas la force par ses uoisins. mes se elle a aucun home aucun home ov aucun parant qui ait ueu le fet. et ait este bleciez por ce il porra prouer le malfeteur par bataille. de sa bleceure. et del mesfet qui a este fez a la fame. E se li malfeteurs est uaincuz il lespeneira par les membres. Se li autres est uaincuz il paiera. lx solz. et i denier. por la recreandise. et la fame sera fustee et chaciee hors.

⸿ Se la veue fame n a nul tel home qui vville ce fere. li fus tendra le malfeteur em prison tant que il s en isse par pes ou il se purgera par iugement deue. se einssi est qe la force soit queneue par les uoisins.

De prison

T oz mesfez de que homs est mal renonmez met le malfeteur em prison par la iustice. ia soit ce que nus ne l en demant riens si que il sera tant em prison que il soit purgiez par iugement deve.

⸿ Se aucuns prant fole fame par force. et il ne li ueut doner sa deserte. il sera en la merci le duc de toz ses chatex et la fole fame aura sa deserte. et tuit si damage seront restore a li. neis se sa robe est depeciee. se einssi est que la force soit queneu par les uoisins. et se cil qui li fit la force n a nul denier. il fera penitence en la prison le duc par viii iorz.

De prison.

S E aucuns plege home qui soit repris. de la mort a aucun ou davcun crime. et il le plege de uenir a cort. et de respondre. et cil est. fuitis et ni uelt venir. li pleges lespeneira par perte de tout son chatel. ia soit ce que li malfeteurs fust tenuz que il i perdist membre ou vie.

De pleges qui apartienent al duc.

C i sont li plet qui apartienent au duc. Apartenance d yglise. brisevre de chemins. asaus de pes briseure de mesons. asauz de charrue. desesine. tuit li requenoissant.

Des jurees

ı l oist a toz homes a tenir iuree en leurs corz par l assentement des parties de toz chatex. et d eritage. et a eslire les iureeurs par l asentement a l lune partie et a lautre E ce napelle l en pas reqenoissent. Mes iuree de defaute. et de fame prise a force. et de multre. et de roberie fete en tens de pes : et de cels qui sont fuitif por aucun crime. cist plez et ces jurees ne pueent estre tenu fors en la cort le duc.

D assises

A ssises sont tenues une foiz ou ii par an. en chascune uiscomte. a ors sont li baron iure semons a tenir. les assises et doiuent enquerre. que li uisconte. et li sergent naient mal fet a leur baillies. enuers les innocenz. et que il noient recete larrons et autres malfeteurs par deniers qui leur aient este done. et que il noient fet pes celeement domecide qui soit atainz par le serement de xii cheualiers del uisne. E se il trueuent que tel chose oit este fete. il la doiuent fere amander lealment et fermement.

⸿ Se uns tres poures homs se plaint d iceles iustices. Li baron iure qui tienent l asise garderont le droit au poure. si que li poures porra pledier o le uisconte en sa uisconte. per a per. Es se li uisconte a fet desleaute contre le poure de cause citeaine. il lespeneira de toz ses chatex. E se ce est de cause criminal. il sera mis en la prison le duc. tant que li dus en ait commende sa uolente

D amandes

L I baron iure font uenir les sergenz de la uisconte. et des plus leaus cheualiers du pais viii ou xii ou xx selonc ce que la baillie est grant. a dire uoir par leur serement des chatex a cels qui en l asise sont chaoit en la merci le duc. Se quens ou barons ou arceuesques ou esqes. ou abes est chauz en merci. il em paiera c livres. cheualiers paiera al moins x solz. ov neant. vilains ou bas hom v solz. ou neant. Se uns po poures cheualiers est felon entre ses uoisins. et fet uolentiers tort. et ne cuent point la merci le duc. por sa pourete. il sera mis em bons fers chies aucun boriois. et il uiura i mois. ov tant comme l asise esgardera. E sera sa terre vandue ou engagiee. E li denier de leritage qui sera uanduz ou engagiez seront mis el tresor le duc. E se ce est i bas hom il face sa penitence en la uilaine prison le duc. se il est cheualiers. la uerite de ses chatex soit seue par cheualiers iurez. et li dus le soit toz fors son hernois ce sont ses armes son destrier et som palefroi. et son roncin. et si filz auront leur roncins. et il et sa fame et si emfant auront leur uiure regnablement par els. et ses bouiers et ses charrues et la semence a ses terres semer. Se il est boriois ou autres bas homs il aura autresi son uiure. et les despenses a sa charrue se il a charrue. et ses armes iurees. Totes les autres choses aura li dus par le serement as cheualiers

D asmosne.

I l a este dit deuant geralment qe se aucuns prestres a aucun tenement el non de liglise. et uns lais li uelt tolir par requenoissent. li requenoissanz corra sauoir mon. lequel li uisnez en a ueu em possession. ou le prouoire ov le lai : Mes il auient souant que uns malades done de sa terre a yglise en sa maladie pardeuant le prouoine et pardeuant ii ou iii de ses uoisins. si que li communs del uisne ne le set pas. et muert einssi. E ses filz uelt aler contre le comman ennt dement son pere. et le don. et demande requenoissent. se ce est lais fieuz. ou almosne. E porce que li visnez lemet en non sauoir la querelle ne sera pas terminee en la cort laie. mes en la cort de sainte yglise. Neporquant nos en auons maintes foiz oi plet en ḷa coꝛt e ſaınte ẏgẏlſe.𛲄entre l arceuesque de Roem. et Guillaume le marechal.

⸿ il auient souant que aucun lai donent a aucune yglise. terre en almosne pardeuant esuesques et pardeuant pluseur clerc. et poi de lais. et dedanz l an que cil dons est fez li lais ueut tolir ov ses oirs. celle terre a l iglise par requenossent sauoir mon se ce est lais fiez ou almosne. il naura pas le requenoissent. quar li uisnez ne set riens del don. Mes la uerite sera en qui se parle leal testemoine de l euesque. et de ceus qui furent al don : Mes se il auient que li dons soit fez en une yglise par deuant les parroissiens. lors em porra requenoissenz estre fez se plez en est meuz entre le lai et le prouoire.

⸿ Chascuns puet donerdoner de sa terre en almosne iusqu a la tierce partie de son heritage. E se li encesseur donerent en aumosne tot le tierz de lor heritage. li oirs ne porra pas doner en aumosne les autrestierz des autres ii parz fors par l asentement de ses oirs. et des segneurs del fieu. Qar einssi perdroient li segneur leur fiez et leur seruises de leur homes. et les yglises tandroient a par un pou toz les tenemenz. ⸿ Li home as euesques ou as abez. ou a aucune yglise. ne pueent doner nule terre en almosne se elle n est dedanz l an uandue a aucun qui soit reseanz el fiev

⸿ Il li a pluseurs tenemenz qui ne pueent estre done a yglise en almosne. Qar l iglise ne puet fere seruise de cel tenement porce que li seruises est uilains. ou si gries que il ne loist pas a l iglise a fere le. Et porce quant tel terre ou tel rente est donee en almosne. elle doit estre vandve dedanz l an si comme nos auons dit.

⸿ Rentes et terres qui sont donees a aucune yglise en al mosne. doiuent estre porsises par durablement par les mains de l iglise. se elles furent donees renablement si comme nos auons dit.

⸿ Il ne loise pas a euesque ne a abe ne a prouoire ne a aucun autre qui tiegne almosne a uendre la. ne a doner. Quar les choses qui sont propr ịt ̣es a iglise. ne pueent estre estrangiees ⸿ l en doit entendre que les terres et les rentes que li prelat achatent des biens de l iglise. se li contreres n est prouez apertement. E einssi ne pueent elles estre ne uandues ne donees.

D assaut

I l auient aucune foiz que li home ou les fames. ou les fames qui sont naure se plaiggnent que il ont este naure. en la porpresture de leur mesons. ou a la charrue. ou el chemin le roi. et li sires en qui terre ce est en demande sa cort. il ne l aura pas se l en ne uoit ou la mellee fu fete par le dit as hommes que l en dit qui furent a la mellee. par auenture la mellee fu en une nouele sente. sente n est pas chemins. ou elle fu deler li porpresture de sa meson. ou as chans. et nom pas a la charrue. Se la mellee fu fete de nuz il n i doit auoir poite de veue des lieus. se li home qui furent a la melles. ni sont nomme. par l assentement a l lune partie et a l autre. et se la melle fu ov de iorz ou de nuiz. et il n i ot nul home. nule ueue ne doit estre fete. einz en enquiere l en par celui qui se plaint.

De la cort as segneurs

C hascuns sires oit ses plez et son larron. et sa segnorie en sa terre. esceptez les plez qui apartienent au duc : de qoi nos deimes deuant. de que il auint que bertrans de verdun prist par achoison de larrecin pierre de foliotee. et le tint a yvri sont a liglise. em prison. et Rogier de. s. andriu : le uolt auoir comme son home et iugier par sa cort. Bertrans ne le uolt randre. einz dist que se Rogiers l eust auant pris il en eust la iustice. Mes porceque il auoit recete en sa terre. et la iostice le duc lauoit pris. il em feroit la iustice. Rogiers noia contre ce que onques a son esciant nauoit recete laron en sa terre. E por ce que Rogiers ne pot estre conuaincuz del recetement il ot sa cort de cel home.

De forfez de bois

I l ne loise pas as segneurs de terre a metre les homes qui ont costume en leur forest em prison. por aucun forfet de la forest. se il ne sont troue ociant bestes einz leur soient lor gage randv par pleges et iorz asis de fere droit. E se plez est meuz de la costvme. et cil qui est retez dit. Je fui pris en ma costume. li lieus doit estre ueuz. et si doit l en enquerre si fu en sa costume ou el forfet de la forrest. E ce que il aura cospe ne sera remue del lev deuant que iugemenz ait este fez de la costume. ou del forfet de la forest

De moline

I l ne loise a nul home a fere nouel molin en sa terre. ne gort qui moille la terre a ses uoisins. ne qui face mal a ses uoisins ne a nul lui. E ce soit proue et requenev par le serement de xii a leaus homes.

De ce meisme

I l fu establi el tens Guillaume le senechal que chascuns cheualiers ou chascuns sergenz qui a molin. ait en sa terre seche mote. ou si home aillent moudre a son molin. et lonc tens apres li senechaus oi dire que li seggneur destuioient leur homes. par leur molins ou il auoit trop maux engles. et leur toloient a for ce paletees de farine. et fesoient uenir a leur molins les homes qui en estoient a ii liues. ou a trois. ou a plus : ou il em prenoient seche moite. li senechaus se repanti donc qe il auoit fet cel establissement. mes il ne le uost abatre. quar li segneur auoient ia eu longuement celle moite. Mes il commenda que se aucuns uoloit auoir moite de nouel. ou que il alassent a son molin. ne li home ne paiassent moute ne il nalassent av molin. einz fust requeneu par le serement a xii leaus homes. sauoir mon se il alerent onques moudre au moulin. ne paierent seche moute.

Des paranz as malfeteurs.

L I bailli le duc souloient prandre les paranz a aucun. quant il auoit fet aucun mesfet ou larrecin. ou omecide. ou mellee ou il auoit sanc ou autre chose de qoi li plez apartenoit a la cort le duc. Ia soit ce que cil que il pernoient n auoient cor pes el mesfez de ce dit li senechaus que nus n em doit estre mis em painne. fors li malfeteurs. ov cil qui est pareniers du mesfet. E ce auint duede le manc. et de ses filz. qui estoient home Rogiers de s. andriev : enuers les fortiers bertran de verdun qui n auoient pas pris i malfeteur. ainz auoient mis em prison plusors de son lignage. qui n auoient rien mesfet qui furent quite par iugement.

De responsse.

P Lainte fu fete par deuant le senechal. qe li pledeeur bestornoient lordre de droit. et metoient en la cort al cheualiers cels qui n auoient riens mesfeit. en la merci au cheualiers. en tel maniere que se aucuns fust restez d aucune chose. et il ne respondist mot a mot. a toutes les paroles. et ne s en offrist au derrenier il fust en la merci au segneur de la cort : de ce dist li senechaus que se aucuns est acusez. et il nie maintenant tot. il respont bien. ia soit ce que il ne respont pas mot a mot. a chascune parole. Mes se il demande a consellier soi des choses de qoi il est acusez. et il se part del liev. et se va conssellier. il doit respondre mot a mot. et recorder toutes paroles a l acuseeur. et respondre li. ou il remaindra en l amande de la cort. E se il dit einssi. qe ni tot par les paroles dont uos me restez sanz recorder les. et bien en atendra le iugement de la cort si comme nianz : par ce que il dit ce : osfre il a desrenier sen. et respont bien. la soit ce que il ne parole point del derresnier. Cil qui est restez et respot mot a mot. a chascune parole. et osfre a desrenier s en est bons pledierres. Qar ce est commune chose en cort laie. que cil qui eissis respont et nie. se desresne par son serement. se cil qui le recete a tesmong.

De plez d acusement de sergent.

I l auint el tens Guillaume de Wasquill que ferranz li ferranz resta. i· des homes. Rogier de saint andriev. que il l auoit troue portant a son col lx hestres. a ce respondi estiene de seint lucin. que se tex hom eust voiture il l eust gastee toute la forest. Quant li senechaus oi la chose par Rogier qui s em plaint a lui. il dist que li sergenz auoit aportee trop fause plainte en la cort le duc. et que il ne deuoit pas estre oiz ne estre plus en la sergenterie le duc. et einssi s em parti li homs quites. Li senechaus fu coreciez si commenda que li sergent le duc qui doiuent lealment mener le pueple. n acusent pas les genz deslealment. et se aucuns est atainz de tel deslealte il soit mis en prison. tant que cil qui est dus le deliure. ce est li rois de france.

D amander leurees a torz

L I pledeeur souloient metre en merci les simples homes qui sanz le commandement a la iustice. s agenolloient a fere leur seremenz et qant il ooient que il estoient acuse de ce que il sestoient agenollie. si se leuoient et li pledeeur les acusoient derechief de ce que il sestoient leve sanz le commandement a la iostice. et einssi les escriuoit li clers en merci. de ce dist. Normanz dogier vi le que il auoit tant vescv que il ueoit ioer en la cort le roi a bernart le becceant. si comme li emfant ioent et dient or sus bernart. et se il ne se leuast maintenant il fust tainz de charbon en la face : Autresi taignoit li clers en son parchemin les simples genz en merci. por eschiuer tex acheisons commanda li senechaus qe li pledeeur qui si deslealment iugeroient. fussent mis en la prison le roi : tant que il eussent paie tout leur chatel. iusqu a la derreniere poiteuine. et fussent d ilec en auant tenuz por desleaus entre leur voisins.

Vne Juree

U ne iuree qui fu fete el tens le roi henri. par Guillaume le fils Iehan. par Guillaume del pais. par Guillaume seluain. par Guillaume de saint Iehan. par. Rogier suart. par Robert de parci. par Garn de surede. par Nicolas de la rue. par Guillaume de Gamai : par Guillaume de Gameuille par Richart de roncei. par Giefroi de noire eaue. et par pluseurs autres.

De garde d enfanz

T vit cil se consentirent comment li dus. de normen die doit auoir. par droit la garde de sesẹſ họmẹs. filz a ses homes. qui tienent de lui par droiture d eritage. sergenteries ou aluez. ou fieuz : et si doit auoir le don des filles a ses homes se il n i a oir male. et tuit li tenement qui apartienent al filles par heritage. de qui fieu que il soient. doiuent siure la donoison le duc.

De Wereq.

I l distrent del wereq que se Nes est depeciee si que nus n en eschape qui sa dire qui les choses estoient qui sont uenues a wereq. li dus en doit auoir l or et l argent et lui mirre. et le rohal. et le vair. et le gris et les piaus sebelines. et les dras de soie. le trossel lie les destriers. et les frans chiens les frans oisiaus et les ostoirs et les faucons. Se aucuns prant aucune chose del wereq. et il ne le dit a iustice ainz que il li soit demandez. li plez en apartient au duc. Toutes les autres choses apartienent as barons. en qui terre li wereq arriue.

De craspois

I l distrent du craspois que se il est naurez en en aucun port. et il s em fuit. ou que il uiegne apres i flo. et une retrete. se il uaut plus de L lb'. il est le duc. et se il uaut moins il est au baron en qui terre il arriue. Lam doit sauoir que de toz les barons de Normandie il n i a fors l euesque de baieux. et le conte de cestre. qui aent engins a prandre craspois : mes cil le sont au port l euesque. et par la uille le le conte.

De tresor

I i distrent que li tresors trouez est au duc. et li plez en est suens.

Des plez de l espee

I l distrent que cist plet apartienent a lespee le duc. homecides comment que il soit fez ou en apert ou eu repost que l en apele murtre. li plez et la iustice. et la forfeture en apartienent au duc. ou a cels a qui il et si encesseur le donerent. E autresi de membres tranchiez ov brisiez. Autresi des choses tolues par force. que l en apelle communement roberie. et degast fet par force : et de fame prise par force et darson. Ce est de mesons arses et de blez ars. et assaur quiest fez a1 aug dedanz les qattre parties de sa meson et assaut de de charrue. et d asaut du chemin le roi par que l en ua de cite a cite. ou a chastel real. et dasaut en la uoie daler en la cort le roi. de brisier triue qui a este donee par la iustice leroi. et toute la iustice de l ost ou de la monnoie apartient au duc tant seulement.

D omicides

L I rois henris dengleterre. mande saluz as arceuesques. et as euesques. as abez et as contes. et a toz les feels ihucrist. et as filz de sainte iglise qui sont en Normendie. sachiez que il fu establi et conferme. par deuant l arceuesque hue de. Roem. et leuesqe Jehan del siuis. et leuesque a. deureues. et l euesque Iehan. de Ses. et par deuant mes autres barons en commun chapistre et par commun assentement. des ocieeurs qui en triues et en la pes de sainte yglise ocient homes et brisentṃoſṭıers. triues que se aucuns ueult apeler cel homecide par bataille. la bataille sera gagiee. et tenue en macort. E se il en est conuaincuz li euesques en qui eueschie ce sera fet en aura samande. Ce seront ix livres. du chatel al vaincu par la main de ma iustice. E se il remaint point de son chatel. li remenanz sera miens et se ses chatex ne soufist a paier a l euesque iusqu a ix livres. li euesques ait tot ce qui i est. si que riens n en sera pris a mon hoeis devant que li euesques ait eu toute samande se li chatex soffist.

⸿ Se il n i a qui ueille prouer l omecide. il se purgera par le iugement de sainte iglise et se il en est ilec convaincuz il soit de la mande l euesque. et de ma merci. si comme il a este dit deuant.

⸿ Se homecides ou aucuns qui oit brisie la triue. ne uelt uenir a droit. et il senist de la terre. il sera autresi de l amande. E se il fet pes o moi. l amande l euesque ne sera pas en la pes que ge ferai : einz la randra a l euesque. ou il fera pes o lui. Ce fu fet a Roem m et c et xxxv anz. apres lincarnacion. a ce fere furent presant l euesques. Nicolas dely R de sigi. et pluseur autre.

De la franchise as clers.

C E sont les choses que li rois. Richarz dangleterre commanda. a la roche doreual. que fussent amandees. Si estoient presant li arceuesques de Roemn. et li euesque de normendie. La premiere chose fu des prouoires et desclers que lem pandoit. si commanda que l en ne le feist plus. et se tiex sacrilieges estoit fez il fust espeneiz si comme il deuroit.

⸿ Des clers pris et mis em prison que il soient randu a l euesque des que il les requerra.

⸿ Se cels qui fuient a garant a l yglise. ou a laistre de liglise. que il aient lencian ivgement. Ce est que il foriurent la terre dedanz le terme qui est establiz de viij iorz. et lors s en aillent seurement. ou il se randent a iugement de la cort le roi. ⸿ Que requenoissenz ne soit fez en cort. de possessions a yglises : que elles aient tenues par xxx anz.

⸿ Q' taille ne soit fete sus clers yglises ne sus leur possessions : Mes se persone ou vicaires d iglise a fieu lai si en respongne selonc la quantite del fieu se il lain me.

De bries et de requenoissanz iiiii

L En doit auant tretier de la possession qe de la propriete et meesmement des causes qui sont entre lieus religieus et lais des patronages des iglises qui sont terminees ar letablissement au roi felippe de france.

De dessesine.

S E aucuns est despoilliez de son tenement puis le derrenier aost. ou puis celui deuant le derrenier. il doit demander sa sesine par cest bries.

⸿ Li rois ou li senechaus mande saluz au bailliz de tel leu.̣e qoı ıl fu ſeſız au errenier a oſt.

⸿ Commande a H que il resesisse sanz nul delai R de son tenement qui siet en tel leu de que il fu sesiz au derrenier aost. ou a celui qui fu deuant le derrenier. de qoi il la puis dessessi a tort. et sanz iugement. et se il ne. le fet. se li autres te done plege de siure sa clameur semon xii cheualiers leaus. et les hommes del uisne que il soient a la premiere assise de ta baillie. aparellie a fere requenoisant par leur serement. et fai dedanz ce ueoir la terre et semon Ij que il soit a la ueue et a lassise. et a les otoi les iureeurs et le semonneeur. et cest bries.

⸿ Em cest requenoissant ne puet auoir. que une essoine et une defaute. E se cil qui est acusez se defaut plus. il sofferra la paine as defallanz. et li requenoissanz sera fez autresi comme se il fust presanz. et porra bien gue anguier par le requenoissant. Neporquant il sera en merci por la defaute. Il ne puet en cest plet nommer plet ne garant. se il n a uoche le roi a garant ou sa iustice qui li salue cel ior. Se li demanderres se defaut et li autres uient. la cause sera en crole. et li demanderres sera en merci por sa defaute. Neporquant il porra commencer le plet dedanz l an qui fv dessesiz dedanz aage. il ne sera pas escusez por l aage. cist requenoissant nont essoines ne defaute fors si comme nos deismes. el premier chapistre.

De brief de deforcement

S E l en desforce a aucun l eritage a son encessor il se porra plaindre dedanz l an de lesforcement E se il est dedanz aage il s en porra plaindre quant il onques uoudra. iusqa tant. que il ait acompli xxi an. et auoir cest bries. ⸿ Li bries est tiex por celi qui est en aage.

⸿ Comande a a ij que il l est a R auoir. tel sesine comme ses peres ou ses encesseurs ot. en celle terre au ior que il morut. ou puis de derrenier aost deuant ce que il morut. et se il ne le fet autresi comme el brief devant. por ce lui qui est dedanz aage. sera li bries tiex.

⸿ Comande a Ij que il l est ·R· qui est dedanz aage auoir tel sesine. comme ses encesseurs ov ses peres. ou en celle terre au ior que il morut. ou en l an que il morut. E se il ne le fet. autresi comme devant. cist meismes requenoissanz cort contre celui. qui est dedanz aage. se il entre en la possession a aucun.

De bastardie

I l auient aucune foiz en cest cas. que cil qui tient niee que li demanderres n est mie del lignage a celui a qui il se fet oir. E ce est esclerie par le serement as uoisins. E aucune foiz dit il que bien pueit estre qu il est del lignage a celui qui morz est. mes il est bastarz et lors se la cause de la batardie est proposee en la cort le roi qui ait recort. elle doit estre enuoiee a l euesque dellieu otiee letres.

⸿ Li rois et li senechaus mande saluz a l euesque de tel lev. Come cause fust en la cort leroi entre H qui demandoit la possession son encesseur. et R· qui la tenoit R dist que H estoit bastart. et nom pas oirs. E por ce que la cause de la batardie n apartient pas a la cort seculer. mes a cele de sainte yglise. Ge uos mant que uos oiz la cavse. et me faciez sauoir ce qui en sera iugie en la cort de sainte yglise. et lors iugera l en en la cort le roi de cele terre. qui est demandee selonc le mandement leuesque. et selonc la costume de la terre.

⸿ En ceste Cause selonc la costume de Normendie. puet l en apeler de l euesque a l arceuesqe tant seulement. Qar se il remaint par le barat a celui qui tient que celle cause ne soit terminee dedanz i an. et un ior. il perdra la possession salue la cause de la propriete. et se cil qui demande lesse par barat a porsuire la cause. et ce n est pas es corpes al iuge. il ne sera ou apres l an et le ior fors de la proquie te.

⸿ Ce est generals chose que estrois requenoissanz qui sont fet par les bries qui sont escrit devant la gregneur partie des iureeurs uaint la meneur. Ne nus ne se puet desfandre qui requenoissanz ne soit fez. se l en ne dit contre celui qui le demande que la chose fu afermee au tenant. ou a iugiee par iugement de cort qui eust recort. par les bries qui sont escriz deuant. en qoi il est contenu que aucuns a este despoilliez sanz iugement.

De presentement d iglise

S E aucuns presente a yglise qui soit vacant. Se li euesques doute de la droiture del patronage. il ne doit pas maintenant receuoir celui. qui li est presanz. mes o conseil. E se aucun va encontre qui dit que ill i presenta la derreniere persone. Il doit enuoier les parties a l ostel le roi. si que la cause il2 soit terminee. ne li euesques ne doit donner a nul le benefice tant comme li plez dure devant apres vi mois.

⸿ Li plez sera terminez en la cort le roi par tel bries.

⸿ Se h donne plege de porsiure sa clamor : semon xii leaus cheualiers et les homes del uisne de celle uile que il soient a la premiere assise aparaillie a requenoistre par leur serement. qui presenta la derreniere perssone a celle yglise. de que R li deforce le presentement a tort si comme il dit. E dedanz ce fai ueoir l yglise. et semon R que il soit a la ueue et a l asise. et i aies otoi le semoneeur. et cest bries.

⸿ Selonc le serement as iureeurs remaindra la possession a celui por qui il iurront. salue la cause de la propriete qui sera menee en la cort le roi. autresi comme plet de terre. E par auenture elle soit terminee par bataille ⸿ Se li iureeur dient par lor serement que il ne seuent li quiex a este em possession de presenteri :

⸿ li euesqes del lieu remaindra lors en3 em possession. de doner la iusqu a tant que la propriete del presentement. soit autrement terminee en la cort le roi.

⸿ Se li euesques done celle yglise a aucun clerc. si comme il a este dit. cil clers tandra le benefice en pes. E quant il sera esclerie par le iugement de la cort le roi. que li presentement en apartient a aucun. Lors li iurra li clers feelte. E cil presentera dilec en auant a l iglise. En cest requenoissant si comme aucun dient. a iii· essoines. de uoie de cort et de langor. Li autre dient que il mi a essoines ne excepcions. fors autresi comme el premier chapistre de dessesine. quar la cause n est pas terminee par cest requenoissant. ainz remaint toz iorz la cause de la propriete.

De ce meisme

E Ntre les lieus et les lais fet l en la constitucion au roi phelippe de france.

⸿ Felippes rois de france par la grace de diev mande saluz a toz ses balliz de Normendie. a qui ces presentes letres vandront. Sachiez que nostre ame et nostre feel. li arceuesques. Guillaume de Roem. et li euesque de soz lui nos ont requis que des yglises wacant. em que il a contenz del presentement. requenoissanz soit fez par quatre prouoires et par quatre cheualiers : en tel maniere que li arceuesques. ov li euesques en qui eueschie li contenz sera del presentement de l iglise. et nostre bailliz de cel dyocesse esliront par buene foi les prestres et les cheualiers les plus leaus que il porront trouer. et li quatre prouoire et li quarre cheualier iurront seur sainz. et lors leur enioindra li arceuesques ou li euesque que il dient a qui li patronages doit apartenir par droit. Li arceuesques ou li euesques. et nostre bailliz examineront diligentment chascun. des prestres et des cheualiers qui auront iure. por le requenoissant lur apres l autre. E cil a qui la greigneur partie s acordera aura la droiture del patronage. et se cil viii ne pueent sauoir. auquel la donoi son de l igliseạpạrtı̣eṇt. et la droiture del patronage doit estre. il diront qui fist le derrenier presentement de celle iglise. et cil aura la sesine. E se aucuns clers em prenoit auenir contre ce. li arceuesque et lieuesque. li seroient en nuisence de celle querelle. il se consentirent tuit ensemble par boene foi que il termineront la besoingne sanz delai. et se aucuns contenz en ne soit il seroit raportez a nos. et nos em serions ce qu il nos seroit auis que biens seroit. Nule iglise ou il oit contenz ne porra dedanz ce estre donnee par l arceuesque deuant que il ait este iugie si comme nos auons dit. Se elle n a este vacant par vi mois mes lors la porra il doner salue la droiture del patronage. a celui qui la guaengnera. Li arceuesque et li euesque ne se porroit pas essoinier seur ce se il nauoit essoine de son cors. E se il auoit essoine de son cors : il li enuoieroit. lors le plus leal home que il porroit trouer. par buene foi a ce fere. Nos auons ce ostroie a la requeste a l arceuesque et as euesques de normandie. et einssi comme il est ci contenv uolons nos que il soit garde fermement. et por ce nos uos mandons et commandons que uos gardoiz ces choses et les faciez garder. Ce fu fet a Gisors en l an de grace M cc et vii el mois doitoure

De ceus qui sont dedanz aage

N vs qui soit dedanz aage. ce est qui nait acompli xxi an. ne puet estrangier point del tenement que ses peres ou ses encesseurs tindrent en heretage. se il en est entrez en possession. Ne il n en puet estre trez em plet fors par le brief qui deuant a este escrit de ceus qui sont dedanz aage. et si conuient que il oit tor iorz defandeor. ne il ne puet pledier de la proprie te. mestant seulement de la possession son encesseur que il ot l an et le ior que il morut. Es einssi puet l en pledier contre lui. E se cil qui a un orfelin en garde set pes ou dit aucune chose qui soit contre lui tout sera rapele malgre suen. et tor iorz cil qui l a en garde sera en la merci le duc. et nom pas li orfelins. Ne porquant cil qui est dedanz aage. puet pledier contre toz et tuit contre lui del derrenier presentement. d eglise. quar illec plede l en par le bries qui est escriz devant. et par brief de fieu et de ferme. et de fieu et de gage. quar cil qui einssi tienent ne sont pas por seeur mes deceueeur dautrui chose. et toz lorz demande l en comment li encesseur a celui qui est dedanz aage porsseoit lan et le ior que il morut . Se cil qui est dedanz aage a achate. ou il a aquis tenement par don ou par autre maniere. Il est tenuz a respondre en ainz que il soit en aage. et a nomer son garant qui est tenuz a desfendre le. E se il nie que il n en soit garanz ce sera enquis par les leaus homes.

⸿ L en doit sauoir que se cil qui est dedanz aage ne mueit plet ainz que il ait passe xxii anz. de la possession. a son encesseur. ou des marchiez qui ont este fez par lui ou par ceus qui l ont ev en garde. il n en doit puis estre oiz fors de la propriete.

De doeres

I l ne remaint pas por non daage que cil qui est dedanz aage ne soit tenuz a fere doere a sa mere. ou a la fame a chascun de ses encesseurs. de qui il a l eritage. ou a desfandre soi par les excepcions qui sont escrites. el chapistre des doeres. E se ses peres ou ses encesseurs. vendi ou il estrania en autre maniere son tenement. li oirs est tenuz a eschangier a ceuls qui le tienent. et la fame sera doee et tandra son doere tant comm elle uiura. et apres sa mort cil qui lauoit achatee la raura. et li oirs aura ce que il auoit donne en eschange.

⸿ Quant li mariz est morz la fame demande avcune foiz son doere de l eritage son mari. et aucune foiz destrange. Ne elle ne puet demander fors la tierce part del tenement. de que ses mariz estoit sesiz quant il la prist a fame en la face de sainte yglise. Ne porqant se il n en estoit pas sesiz mes ses peres uiuoit qui tenoit l eritage. se il fu presanz quant ses filz prist celle fame. et il sasenti au mariage et le porchaca. la fame doit auoir en doere le tierz de la partie qui pooit escheoir a son mari de la mort a son encesseur. se elle fu doee de certaine chose. qui ne passe pas la tierce part de leritage son mari : elle s en doit tenir a paiee. se la fame a l encesseur son mari de qui li heritages li uint fu doee de cel meisme heritage. Ele aura le tierz de tout l eritage tant com elle uiura. et la fame a l oir aura le tierz des ii parz de l eritage. E quant celle qui auoit doere de tout sera morte. Lautre aura le tierz de ce que la morte auoit en doere. ⸿ Se fame demande doere a un estrange. Cil estranges n est pas tenuz a respondre a li se li oirs n est presenz. et si puet nommer l oir a garant par la reson de son encesseur qui li uendi la chose ou chania ou engaia. et li oir sont tenu a garantir le ou a desfande le contre celui qui porsiet. E tant comme li plez durt. cil qui tient ne sera pas despoilliez mes li oirs parfera a la fame son doere. se il a de qoi : E se il n a de qoi elle aura son doere en la terre. que elle demande se ses mariz en estoit sesiz quant il les posa : Se cil qui tient prueue sa defanse la fame aura le tierz de ce tenement. et li oirs li fera eschange maintenant. E quant la fame sera morte. Cil tenemenz reuandra a celi qui le tenoit. et li oirs aura son eschange.

⸿ fame ne doit pas estre doee el cheuel manoir. se ses mariz a tenemenz aschans. qui uaille le tierz de son heritage. Se il n a tenement as chans elle puet estre doee el menoir. en la tierce partie tant seulement. Se il a diuers menoirs il li doit doner son doere en i si que il ne soit pas contez en la tierce partie. E se il sont d une value il li doit assigner en un tant seulement que il uaille la tierce part des ii

⸿ Li homs ne puet riens fere del tenement de que il estoit em possession. quant il prist sa fame que elle n en ait son doere empres sa mort. E apres la mort a la fame li achateeur ou li autre qui l auoient par quelque marchie que ce fust. le rauront et nom pas li oirs ⸿ Toutes les doutes qui nessent de doere sont terminees en iugement. par enquestes ou par demande que li iuges fet

⸿ En cause de doere ne puet auoir que une essoine. ne langor ne defautes ne autres delaiemenz si comme il a es plez qui sont meu por la propriere. quar la fame ni aquiert riens fors a sa uie. Ne elle ne puet pas damagier son doere en greuence de l oir. et si ne pueit pas demander doere es choses que ses mariz aquiert apres le mariage. E se li oirs dit contre la fame qui demande doere. que elle est em possession del doere. il i doit auoir ueue.

⸿ Se fame est doee de mueble elle doit auoir. son doere del mueble empres la mort son mari. se li muebles sosfit. et il doit estre contez entre les autres detes. sanz conter li la part a la fame. et se li muebles ne soffit l en doit recorre a l eritage et a l oir. tant que la fame oit la ualeur de la tierce partie. li plez del mueble qui est donez en doere. apartienent a la cort de sainte iglise. et cil de terre al roi tant seulement.

⸿ Se li mariz pert son heritage par barat. ou por son mesfet. si comme se il est dampnez a mort. ou il forsiure la terre la fame part son doere. mes elle ne part pas le tenement que elle a par deuers lui.

De mariage

Q vant aucune chose est donee a home de par sa fame. que l en apelle communement mariage se plez en n est. la cort de sainte yglise iuge del mueble. et la cort le roi de la terre. Se aucuns done terre en mariage a sa fille. ou a sa suer ou a sa cosine. il ne puet pas aler contre som fet. mes apres sa mort si oir rapeleront. qanque il dona plus que le tierz de son heritage de qoi la fille ou la suer doit estre mariee. E ce doit estre entandu se il n a que une fille. ou que une suer. se il en i a plus il ne remaindra a celle mariee. ne a ses oirs. fors la partie de la terre qui li afiert. Qar toutes les suers ne pueent auoir que la tierce part de l eritage a partir entr eus. ⸿ Quant la suer uient a aage de marier. se ses freres. ou ses cousins o qui elle pert a l eritage. ne la ueut porueoir auenantment. de mariage. et elle se plaint de lui. et elle fet semondre en la cort le roi : il aura terme i an et un ior a porueoir la dedanz ce de mariage. selonc sa condiction. et selonc son tenement. et a maintenir la dedanz ce selonc son pooir. E se il ne le fet. des lors doit la iustice le roi acomplir. sa defaute. et assigner a la suer se elle est seule. la tierce partie de l eritage. ou sa part del tierz se il lia plus que lui. et lors se puet elle marier a qui que elle uovdra. et tant comm elle sera sanz mari elle puet fere de sa terre autresi comme li oir malle. E se elle se marie nus marchiez qui soit fez de la terre a la fame tant comme li mariages dure ne uaut. ainz sera toz rapelez apres la mort au mari. et ses oirs est tenuz a eschangier se il a de qoi. et por ce li mariz n est pas tenuz a respondre de la terre sa fame. ne ce ne grieue de riens la fame que l en em plede contre li. Ne elle n en doit pas respondre en derriere son mari. et ce qui est fet autrement doit estre rapele.

⸿ Ceste cause a essoines et il puet l en nommer garant. si come il fu dit deuant el titre des delaiemenz.

⸿ Fame ne pert pas son heritage por le mesfet son mari se il forsiure la terre. ou il est fors baniz. la fame ne sera pas tant comm il uiue em possession de son hritage. ne n en aura les fruiz. ainz l en aura li rois. Es quant ses mariz sera morz elle aura son heritage. se elle ne fu danpnee autresi comme il.

⸿ Qant fame est weue se elle est emplediee de son heritage elle aura terme de respondre iusqua i an. et un ior. se elle n a garant qui la puisse desfendre. et elle ueult delaier le plet. et ce a lieu en la fame qui onques ne fu mariee.

De defautes

Q vant ascuns se plaint d un autre qui detient son heritage. et l en a pris pleges de lui de porsiure sa clameur. Cil qui tient est semons par le serͬgent que il uiegne a respondre. a certain ior : qui contiegne as moins xv iorz. autrement aura il i autre terme qui contiengne i tant de tens. se cil qui est semons a cel ior ni uient. se li sergenz garantist la semonse il sera iustisiez par le mueble se il l a : E se il n en a il se iustisiez par la chose demandee en non de mueble. et uns autres iorz sera mis aus plaintis. et se li tenanz ni uient la iustice sera agregiee par ses auoirs. ou par la chose demandee en lev d auoirs. Si assignera l en i autre ior as plaintis. et se li tenanz ni uient Li tenemenz sera pris en la main le roi : a loie de parroisse. et des uoisins cheualiers. et vauasseurs qui en puissent fere recort. Ne il ne li est pas puis randuz fors par iugement. E se il est negligenz a autres ii iorz qui li sont assigne avenantment. de requerre sa chose. ne il ne repleuist ses auoirs se il est presanz el pais. e ce a este fet en cort qui oit recort. il sera en peril de perdre la possession de la chose demandee. salue la cause de la propriete. Se ce fu fet en cort qui nait recort. Cil qui est einssi de failliz em purgera ses de fautes. par son serement ou par celui a v homes. ou il lespeneira par le chatel sanz peril de perdre leritage. et revandra au plet se il donne bone seurte

Des responsses

S E les parties uienent a cort li plaintis doit mostrer sa plainte. et li tenanz metre ses resons. et lors doit assise la veue del tenement. neis se cil qui tient ne la demadoit pas : Quar sentence ne uaut riens se elle n est donee sus chose certaine.

D essoines.

E t por ce par la ueue se puet li tenanz essonier. sanz peril de l eritage. quar il se deliuerra toriorz par painne de chatel.

⸿ Les essoines sont fetes en ceste manere. Il sessoine premierement de maladie. qui li est prise en la uoie de la cort. ou de mal resseant. Se il sessonnie de uoie de cort il le puet fere par un home. quil die ou il gist. et qui di que il uenoit o lui. E de celui doit lem prandre bons pleges. dauoir son segñ a ior. se li assignera l en ior auenant. quar il se porra essonier autre foiz avtre foiz. Se il sessonie de mal reseant il le doit fere par ii homes. et si conuient que il sostrent le ior deuant al sergent de la cort. E au ior cil dui essonieeur seront oi. o celui qui estona l auoie. de cort. si leur metra l en ior auenant a auoir lor segneur. E a cel ior se porra il encor essonier de ce le meisme maladie. et fere le sauoir le ior deuant al sergent de la cort. et cil qui les son seront amenront oels les premiers essonie eurs. et a cel ior commandera l en que li malades soit ueuz par iiii. cheualiers as mains. et par vauassors qui aient recort. et se il trueuent le malade il li assigneront termeuise unan. et un ior que il iur langor. La forme del serement est telle. il iuira que il est si malades que il ne puet uenir a cort a que il neuestira braies en sa meson ne nistra de son menoir deuant que il uiengne a la cort por osfur soi comme sains. E se l en trueue que il em face autre chose. il sera em peril de perdre la terre. qui li est demandee se elle a este ueue ou prise en la main le roi par cort qui oit recort. si comme il fu dit devant. qar nule defaute ne nule essoine ne vaut deuant la ueue de la terre. fors par cort qui ait recort. Mes defaute qui est fete en cort qui porte recort tost possession. essoine qui ne puet estre saluee. ou par que li essoinez ne pueit estre saluez. vaut autretant comme defaute.

⸿ Se li cheualier le uoient sain. ou il doutent de sa maladie. il li assigneront ior a quinzainne as mains. et a ce ior est il tenuz de uenir. ou a fere si a porter. por auoir le iugement de la cort. et lors soit pris de lui li seremenz de langor. en la devant dite forme. ou se il ne le ueut fere il respongne maintenant.

⸿ Quant li anz et li iorz est passe il est tenuz a uenira cort. et a respondre ou par soi ou par procurateur que il a tort en cort. et cil a tornez ne pueit fere essoine ne defaute se ses sires en atant fet que il n en puet plus fere. Ne en une cause ne puet l en fere que une langor. Cil qui se sera essoniez aura este ueuz. ainz que il oit fet toutes ses essoines. il ne se porra puis essonier. ⸿ se aucuns a commencie ses essoines par mal resseant. ia soit ce que il se soit essoniez trois foiz apres ce que il aura este ueuz par cheualiers. il se porra encore essonier une foiz de uoie de cort sanz plus. ⸿ Quiconques sera essoniez et aura salue ses essonnes par la loi qui est escrite devant. ou il aura amende a la cort. il ne porra pas recommencier. ses essoines se il ne iure langor. mes quant la bataille est gagiee. les essomes porront estre recommenciees sanz langor.

De la cort as segneurs

Q vant la terre qui est demandee a este ueue. la cort doit estre randue au segneur del fieu. se il la requiert. et si li doit l en commander que il li maint la querelle par droit. et se il ne le fet chascune des parties puet forsiurer sa cort et dire en sa cort la cause. del tort fet ou de la defaute. et auoir en tesmoing. et en ceste cort pueent estre fetes essoines et defautes. ⸿ li segneur pueent auoir leur cort de leur homes. qui sont acuse de larrecin. iusqu al forsurer la terre

De la cort le roi

D E ceus qui sont disfame ou fuitis apartient la cort au roi. et de ceus qui sont pris a larrecin.

⸿ Et quant la defaute ou li torz fez de la cort al segneur est prouez. la cause reuient a la cort le roi. o les essoines et o les defautes se il l. a eu langueur.

De garant

A pre la ueue puet li tenanz non son garant. E se il ne uelt uenir au ior qui est assienez il sera iustisier tant que il li uiegne. et le garantisse ou il li faille. einz qui il le garantisse la chose sera ueue. se il la doit garantir. E apres la ueue se il la doit garantir. il est tenuz a deliurer li. E se il s en defaut cil qui la trest a garant pert la possession. et l en doit enquere sanz delai. se il li a failli a droit ou a tort. Se il li a faili a tort. il est tenuz a randre li son damage. autresi est il del secont garant et du tierz. mes se li tierz nome le quart. il conuient que il le desfande maintenant que li tenemenz sera ueuz : qar outre le quart ne puet l en nomer garant. Ce a lieu neis en la chose emblee. qui en iugement doit estre mostree. a ces qui sont nomme a garant

de partie d eritage entre freres

L i tenemenz a l encesseur doit estre departiz egalment entre ses oirs. se il n est fet autrement par commun assens. E se aucuns des oirs est en aage. et li autre iust pas. la partie sera tenable quant a cels qui sont en aage. mes cil qui estoient dedanz aage la porront rapeler quant il vandront en aage. se il atandent i au ou plus. puis que il seront en aage. il ne le porront puis rapeler. Cil rapeslemnz pueit estre se malgre a celui qui a le plus ioene en garde. et se les parties a aucun sont amandees ou par hebergemenz ou par plentes. les parties doiuent estre rapelees auenantment qe il ni soient damagie.

⸿ Li ainz nez aura toriorz le chois. se il ueut. E se il ne uelt choisir la iustice choisira por lui. et dorra as autres leur parties. Se il a en l eritage baronie ou fie de haube. ou sergenterie ou autre terre qui ne soit par partable. et il li a escheoites il sera en la uolente a l ainzne. d auoir la terre qui n est pas partable. ou les escheoites. et li autre auront ce que il ne choisira pas. Se il li a ii fieuz de hauberc et escheoites et li secont autresi et li seur plus remaindra. E se il n i a que un sol fieu. li ainz ne l aura. et fera as autres liuroisons tant comme il uiura selonc la quantite del tenement. et se aucuns des oirs se plaint de son ainz ne. ou de celui qui tient l eritage. et il en demande partie. cil qui tient doit estre semons a cort. E quant il est en cort li iuges li demande se il est freres ou cousins a celui qui se plaint de lui. et se cil mie que cil n est pas de son linnage. enqueste en est lors fete par les le aus homes del uisne. et se li seremenz dit que il soit del lignage. et que il est des oirs a celui qui li heritages fu. il aura sa partie sanz nul empeeschement. E sanz nule ueue fere. il aura par le serement des uoisins. la possession son encesseur. mes l en enquera se il est profitables. se il a doute seurce.

⸿ Cil qui tient dit aucune foiz contre celui qui demande. que a tort li demande. quar il a eu porsa partie terre. que il li mosterra bien. et seur ce conuient il que il oit tesmoing en cort qui offre a prouer le. E se li autres le nie l en assignera la ueue de la terre. par que cil qui tient seuelt desfandre. et a celle ueue douient estre li uoisin qar il iurront apres se cil est ou a este em possession de la terre. qui a este mostree E se li seremenz dit por celui qui tient il sera deliurez se il est contre lui il sera maintenan condampnez

De bataille

S E li iureeur en doutent. la cause. sera terminee par bataille et lors aura li sires del tenement sa cort iusqu a la defaute si comme il est contenu el chapistre des delaiemenz. et se li tenemenz est tenuz de pluseurs segneurs nus dens n aura la cort ainz sera la cause terminee en la cort le roi. et quant vendra au prouer par bataille cele cause aura toz les respiz qui sont escrit el titre des delaiemenz. en essoines et en defautes E en langor. mes l en ni puet pas nomer garanz

De relief et de garde

L Es baronnies sont releuees enuers le roi par. c. livres. fiez de cheualier est releuez chascun par xv livres. de qui que il soit tenuz ou del roi em chief ou d autre.

⸿ Li oir as cheualiers et as sergenz. et leur tenement et leur fieu sont en la garde a leur se gneurs tant comme il sont dedanz aage. se il ne tiennent del roi en chief. Li avtre fieu sont releuez par diuers leus. en duiersses manieres.

De propriete d eritage

L En plede em pluseurs manieres de propriete d eritage. ⸿ Quant l en em plede et iort est assignez et li auersaires est presenz l en propose einssi por le plaintis. a. se plaint de. B. qui a tort li desforce sa terre. que il tient a baieues. de que ses peres. ou ses aieus. ou ses encesseurs fu sesiz en tens de pes puis le coronement le roi. Richart. comme de son heritage. et en ot les fruiz et les issues de la terre. ce est asauoir froment et orge. et pomes et tex choses. et se cil qui tient le uelt noier. Cil qui demande est prest de prouer. le par lui ou par tesmoing. et par garant qui le uit et oi. Il conuient que soussisanz temoinz le tesmoingne qu il die que ce est uoir. et que il est prerst de prouer en une eure de ior a l esgart de la cort. Cil qui tient est tenuz a respondre et auier mot a mot. E se li tenemenz a este ueuz la bataille sera gagiee. si que cil qui tient dorra premierement son gage. et pleges del desfandre. et puis cil qui demande prouer. Quant la bataille sera gagiee en la cort le roi : ou en celle a i autre par deuant ii chevaliers almains et par devant autres qui aient recort. il recorderont toutes les de fautes et toutes les essoines. autresi comme se ce fust en assisse. E cil qui ne porra saluer ses essoines. et ses defautes sera em peril. deperdre la cause si comme il est contenu el chapistre des delaiemenz.

⸿ Se cil que tient ueut il se puet metre el requenoissant. Qar il est en son chois de desfandre soi par bataille ou par requenoissant. Quant li requenoissanz sera gagiez l en asserra i ior e qoi il doit a porter le garant de la cort le roi. par un bref que il emperrera en ceste forme.

⸿ Li rois ou li senechaus mande saluz a tel bailli B est plainz qe A l emplede a tort. del tenement qu il tient a baieues. de qoi il se met el requenoissent. et por ce se il te done plege de por siure sa clameur. semon lors par buen semoneor xii leaus cheualiers et les homes del uisne. que il soient a la premiere assise de ta bataille aparellie de requenoistre par leur serement liquiex a gregneur droit en cel tenement. Cil qui tient ou cil qui demande. et fat dedanz ce ueoir la terre. et se non celui. qui la demande que il i soit por oir le requenoissant. et aies o toi le semonceur et cest bries. Cil requenoissanz a de l aremenz en essoines. et en defautes. Cil por qui tuit li iureeur diront par i a cort guaengnera. se i des ·x· il contre dit as xi· ou li dui sont non sachant. li requenoissanz ne uaut riens. ainz doit l en recorre a prouer par bataille. et lors est autre foiz randue la cort al segnor. del fieu en la forme qui est escrite el titre des delaemenz. et lors reuienent les essomes. sanz langor se elle a une foiz este iuree et les defautes. et li autre delaiement fors de nomer garant. Quar par ce que il reeut seur soi le requenoissant et la desfausse. perdi il a uochier puis garant E einssi fet l en en toutes les causes. en que l em plede de propriete d eritage.

De feiu et de gage.

I l auient aucune foiz que aucuns chalenge son heritage comme celui qui a este engagiez ou par li. ou par son encesseur. en cest cas doit l en aler auant selonc i brief qui est fez. en ceste forme.

⸿ Li rois ou li senechaus mande saluz a tel bailli. Se. a done plege de porsuiure sa clameur. semon par bon se moneeur xii leaus chevaliers et les homes del uisne que il soient en la premiere assise de ta baillie a parellie a requenoistre par leur serement. se la terre que s. li deforce a baieues. est fieuz ou guages engagie. puis le coronement le roi : Richart. et por combien il fu engagiez. et puis autresi comme el brief deuant Toutes ces causes aient leur delaiemenz. et une seule langueur. Mes il couient que li iureeur s acordent si comme il a este dit. autrement covandroit il recorre a prouer la bataille. et lors auroit li sires del fie sa cort si comme il fu dit el titre des delaiemenz. Se li requenoissanz s acorde que ce soit gages. et nom pas li fieuz as tenanz li rois aura les deniers que li demanderres et li iureeur nommerent. et cil qui est convaincuz sera e la merci le roi : et li autres por qui li seremenz aura este. aura sa terre sanz contre dit. en cause de fieu et de ferme. et de fieuz de prest. et de fieu et de garde. a autre tel bries et autre tel pleit. ⸿ autresi fet l en en cause de fie. et daumosne. fors en tant que lais ne puet pledien en contre yglise. de chose que l iglise a porsise em pes par xxx anz. Cest preuiliege a yglise d ancien tens. et orandroit usent li lai d icel meisme preuiliege. par une nouelle istitucion. qui a este fete en l eschequier.

Des dampnez et des forsbaniz

S E aucuns a este dampnez a mort par iugement. por son mesfet ou il a foi la iustice et est forsbaniz. ou il est foiz a yglise a garant. et a fire la terre et tuit si bien le roi. et ses mesons soi ses et si abre destruit. et sa tre est tenue en la main le roi i an et i ior et dilec en auant la terre est randue au segneur del fiev. et si oir en sont desherite. si que il ne pueent recourer l eritage ne pardon de segnor ne par eschange ne par marchie ne par autre manere.

⸿ Se pluseur frere sont et li uns mesfet. Cil qui nont riens mesfeit ne perdent pas leur heritage. ne ne sont pas danpne por le fet leur frere. et a soit ce que cil qui mesfist fust em possession de tout l eritage. qui que il fust ou li ainznez ou li puisnez Cil qui est forsbaniz. ou qui a porsiure la terre. ne puet pas recourer a som heritage. ne a demande. ne a desfandre soi. quar il est ia dampnez. Mes il puet recourer par la uolente le roi a reuenir. en som pais. ou a demorer i si que il ait les letres le roi pandanz en ceste forme. li rois mande saluz a ses ballis de Normendie. sachiez que nos auons pardone a Th. le forbanissement qui estoit fez de lui por la mort. P. et por ce nos uos mandons que il oit nostre pes en nostre terre. si que il face pes o les amis al mort. que nos n en oions clameur. Ces letres le tienent en pes en Normendie. tant comme li ami al mort se tessent. Mes se il se plaingnent de lui il conuient que il isse de la terre. et que termes li soit mis a issir en. et les letres ne li uaudront pas puis.

De terre asmosnee. ou donee.

C hascun puet doner iusqu a la tierce part de som frant tenement en asmosne. et por seruice si que li sires del fieu ni oit damage. quar il fera toriorz sa iustice en son fiev. Ne il n est pas tenuz a oir celui a qui la terre est donnee. se il ne done pleges d auoir son garant a ior. por fere uers lui ce que il deura. E cil qui li dona est tenuz auenir et a deliurer le. ou il est contrainz par la iustice le roi. se cil qui donna la terre muert sanz oir. ou il soi fet terre. toz li fiez reuandra au segneurs. la ne remaindra por le don s il ne s i assenti. Ce pueit estre fet malgre as oirs.

De vente de terre.

H oms puet vendre tout son tenement. si que li sires uait damage. si comme il fu dit el chapistre des dons. Mes se li oirs ueut retenir celle terre por le pris qe est osferz al vendeeur sanz barat. il en sera plus pres. E se l en doute de la quantite del pris. la rente sera escleriee par le serement a l achateeur. et al uandeeur. et a cels qui furent al marchie.

De fiefement de terre.

H oms puet doner en fieu son tenement. et la droiture as segneurs sera toriorz sauue. si comme il a este dit. ia soit ce que li sires ne sassent pas au fieufement. Quar ne li sires ne li oir ne le pueent empeeschier le fieufement. por droite cause. si comme se li sires die que cil a qui la terre en donnee en fieu por son seruice. et por son homage. et por aucune rente d an en an. atandu a desheriter le. ou que il a por chatie la mort de lui ou des suens ou que il ait haine mortel entre lui et son lignage d une part. et le segnor et les suens d autre.

De partonage d iglise

A Roem en l an de grace. m. et cc. et v. el mois de nouembre. le diemenche empres les huitieues de la tozsainz. li quens. Renauz de bolongne. Guillaume li mareschaus : henris destente uille. W. li Chamberlas de Tenquaruille. Raol tesson. Iehans de praraus. leuris de ferieres. felippes de vaaci. Sil la ume de mortemer. Robert de Torci. Willaume de Seuan. Fouques Paainel. W. de hommez. Estienes de loncchamp. hues de colonces. Robert d esueual. Willaume de prareauss. Iehans de Rouroi. Li chastelains de beluene. Nicolas de montegni. Thomas de pauelli. Rogiers de meulant. iurerent et disrent. que se aucune yglise qui apartenst a la donoison. a i lai estoit vacant. et persone conuenable l estoit presentee. li prelaz la deuroit receuoir. se autres ne disoit que li parronages en apartenist a lui. En cest cas ni doit li euesques ni lui receuoir. ne doner l iglise deuant que li contenz soit finez en la cort del fiev. et lors au teste moine des letres au bailli le roi. ou de celles au segneur del fiev. il doit receuoir la persone convenable que cil qui a guaengniee la cause li presentera.

Li sergent le roi ne douient pas estre escommenie

P ersone yglise ne doit pas escommenier baron ne le bailli le roi ne son sergent. ne clere de son ostel deuant que elle oit requis le roi ou son senechal.