La Coustume aux chapitres D’aides cheitels.

A L’aisné doit descendre la saisine de son antecesseur. Et quand il l’aura, il en doit faire partie à ses puisnez comme ils doiuent auoir, Et doit le fief estre mis en la main du puisné pour faire les parties, et l’aisné doit choisir. Les parties aux puisnez qui ne sont pas presens, demourront à l’aisne en garde iusques à tant qu’ils la requierent, ou que leur mort soit leué ou prouuee. L’aisné a telle dignité sur les puisnez, qu’ils luy doiuent porter honneur et reuerence. Et ne luy doiuent dire ne faire iniure ne villenie, ne à son aisné fils, ne à sa femme. Et s’il les accuse de ce, ils seront tenus de respondre en sa cour.

Quand on tend à faire les honneurs, biens, emolumens et profits egaux : et neantmoins les affaires humains sont tels qu’il n’y peut auoir telle equalité, qu’il n’y ait ma tiere de chois, et que de plusieurs choses l’une ne soit plus appetee que les autres par vn chacun qui y participe : on a accoustumé pour la reuerence de l’antiquité, de deferer ledit chois et l’honneur au plus ancien : comme icy entre freres à l’aisné d’iceux : et entre officiers d’vne mesme dignité, comme sont conseilliers de la Cour au plus ancien receu : et ainsi des aduocats et autres. Or de l’aduantage que l’aisné a sur ses puisnez au partage de la succession, sera dit plus amplement cy apres comme en lieu conuenable, au Tit.de parties d’héritage . Ce pendant nous noterons ce que dit monsieur Papon en ses arrests, Que si l’aisné repudie la succession de pere et mère, et ses freres l’acceptent : celuy qui est aisné d’entre eux aprés le repudiant, ne peut sur les autres prendre le droict et auantage d’aisneesse, comme eust peu faire le repudiant. Mais doit entre eux esgalement partir le droict et portion du repudiat, qui leur est accreuë et acquise par ladite repudiation. par Arr. de Paris du 9. de Septemb. 1552 et ce qui est ici dit, que les puisnez sont tenus à respondre en la Cour de l’aisne, s entend des nobles tenans, pource qu’il n’y a que les fiefs nobles qui ayent cour et usage.