P Our interdire à un homme l’administration et disposition de ses biens à cause de sa prodigalité, ou faute de bon sens, il conuient auoir lettres royaux, qui soient obtenues par vn ou plusieurs des prochains parens, ayans en ce le principal interest, adressantes au iuge Royal du lieu où est demourant celuy à qui on veut faire ladite interdiction. Lequel doit estre appelé pour debatre l’enterinement desdites lettres. Et luy ouy, ou attrait en contumacez information faite au preallable de sa prodigalité, ou autre cause raisonnable, et ce principalement par le rapport de ses prochains parens et amis-et sur ce ouys les officiers du Roy : doit estre donnée sentence d’interdiction, et estre pourueu de curateur aux biens de l’interdit. Laquelle sentence doit estre publiee aux assises, et aux marchez circonuoisins de la demeure dudit interdit : à ce qu’aucun n’en puisse pretendre cause d’ignorance. Apres. laquelle sentence ainsi publiee, l’interdit ne peut aliener ses biens, encores qu’ils soient assis en autre territoire, selon l’opinion d’Imbert in Enchiri. Là où il tient aussi que pendant le procez meu sur ladite interdiction il ne peut aliener : et que les alienations faites contre et au preiudice dudit procez, sont à reuoquer, casser et annuller, s’il sensuit sentence d’interdiction. Mais ie voudroy entendre ceste opinion estre vraye, si l’acheteur ou autrement contractant auoit cognoissance dudit procez, ou autrement il fust constitué en mauuaise foy : comme s’il contractoit auec un qui fust notoirement prodigue ou insensé. Et combien que la loy die, quod si cuenerit vt furiosos sanitatem, et prodigus sanos mores, receperit, ipso iure desinunt esse in potestate curatorum : toutes. fois il est accoustumé en ce cas de faire leuer ladite interdiction par Iustice, auec cognoissance de cause, et par l’aduis des parens et amis.