François 1540.

S Vyuant nos anciennes ordonnances defendons à tous de faire et exercer estat de changeur, ne faict de change des monnoyes, sans lettres de nous adressantes aux generaux de nos monoyes, et par eux verifiees, sur peine d’amende arbitraire : et aux generaux de nos monnoyes de les y receuoir, s’ils ne sont gens de bien par commune renommee, sçauans et experimentez, auec faculté de biens pour faire et exercer lesdits estats de changeurs. Permettans neantmoins ausdits generaux que si en voyageant par nostre Royaume, pays et seigneuries de nostre obeissance pour se faict de leurs charges, ils trouuent aucuns lieux en auoir besoin, ils y en puissent commettre des qualitez dessusdites pour vn an, par manière de prouision, comme il est accoustumé cy deuant, pendant lequel temps d’vn an lesdits changeurs ainsi commis se pourront retirer deuers nous, et de ce obtenir lettres en tel cas requises.

Item et sur mesmes peines et de punition corporelle, ordonnons ausdits changeurs, ainsi proposez et receus esdits estats, qu’ils ayent à faire et exercer leur faict de change en rues ou lieux publiques, à la veue d’vn chacun : et qu’en lieu eminent de leur ouuroir, ils tiennent vn tableau, ou soit escrit le salaire qu’ils deuront auoir, tant pour chacune piece de monnoye d’or et d’argent, qu’au marc d’icelles, selon l’aualuation et supputation qui en sera faite par lesdits genéraux.

Item que sur leur tablier et bureau, ils et chacun d’eux ayent ciseaux expres y fichez et attachez, et que d’iceux ainsi qu’ils auront receu et changé aucunes pieces d’or et d’argent, monnoye blanche ou noire, en laquelle y ait escharseté d’alloy, foiblage de poix, ou tous les deux ensemble, ils les coupent et cisaillent en presence des personnes ausquelles ils en auront baillé le change. Et neantmois facent sur l’heure registre par chapîtres expres et separez des espèces d’or et d’argent monnoye blanche et noire qu’ils auront receué et cisaillee pour billon. Lequel billon lesdits changeurs seront tenus porter, deliurer ou enuoyer au maistre de la monnoye du lieu plus prochain de leur demourance, de mois en mois ou plustost, si faire se peut, dont ils feront registre : comme aussi feront de leur part lesdits maistres particuliers, et contregardes : pour en estre fait payement à tour de papier ausdits changeurs, et marchans qui les leur apporteront. Et si lesdits changeurs n’auoyent puissance d’attendre leurs deniers a tour de papier, ils pourront vendre ledit billon ainsi cisaillé à autre changeur, qui se chargera le porter à ladite monnoye ouurant, dont lesdits changeurs feront chacun en son endroict registre.

Item si se trouuent és maisons desdits changeurs aucunes espèces d’or ou d’argent monnoyees, de celles qui doyuent auoir cours, esquelles y ait escharseté d’alloy ou foiblage de poix, ou bien autres especes tant d’or que d’argent monnoyees, non ayans cours, qui ne soyent cisaillees apertement pour billon : Nous les declarons dés maintenant comme pour lors à nous confisquees : et si l’amenderont lesdits changeurs enuers nous, soit qu’ils vousissent dire les auoir en garde, gage, depost, ou autrement, si ce n’estoit par authorité de Iustice, et qu’il en apparoisse suffisamment. Aussi n’auront lesdits changeurs en leurs maisons ni allieurs, aucuns fourneaux à faire fonte, ni essais quelconques.